ގަތަރުގެ އަމީރު ޝެއިހު ތަމީމް ބިން ހަމަދުގެ ދައުވަތަށް އެ ގައުމަށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ކުރައްވަމުންގެންދަވާ ދަތުރުފުޅުގައި ރާއްޖޭގައި ޓެލެކޮމިނިއުކޭޝަންގެ ވިޔަފާރި ކުރާ އުރީދޫ ގްރޫޕުގެ އިސްވެރިންނާ މިއަދު ބައްދަލު ކުރައްވައިފި އެވެ.
ރައީސް ބައްދަލު ކުރެއްވީ އުރީދޫ މޯލްޑިވްސްގެ މައި ކުންފުނި އުރީދޫ ގްރޫޕުގެ މެނޭޖިން ޑިރެކްޓަރު އަދި ސީއީއޯ އަޒީޒް އަލްއުސްމާން ފަހްރޫއާ އާއި ބައެއް އެހެން އިސްވެރިންނާ އެވެ. ގަތަރާއި ރާއްޖެއާ ދެމެދު އޮތް ގުޅުން ބަދަހި ކުރުމުގައި އުރީދޫއަކީ މުހިންމު ކުންފުންޏެއްކަން ރައީސް ސޯލިހު ފާހަގަ ކުރެއްވި ކަމަށް އެމަނިކުފާނުގެ އޮފީހުން ބުނެ އެވެ.
"ޓެކްނޮލޮޖީގެ ދާއިރާއިން ގުޅުން ބަދަހިކުރުމުގައި އެކުންފުންޏަކީ މުހިއްމު ދައުރެއް އަދާކުރާ ކުންފުންޏެއް ކަމަށާއި ދިވެހިރާއްޖެ އާއި ގަތަރުގެ އާއްމު ތަރައްގީގެ ބައިވެރިއެއް ކަމުގައި ވެސް އެމަނިކުފާނު ވިދާޅުވި،" ރައީސް އޮފީހުން ބުނެފައިވެ އެވެ.
އެ ބައްދަލުވުމުގައި އުރީދޫގެ އިޖްތިމާއީ އެހީގެ ދަށުން ރާއްޖޭގެ އެކި ހިސާބުތަކުގައި ކޮށްދޭ މަސައްކަތްތަކަށް ރައީސް ސޯލިހު ޝުކުރު އަދާ ކުރައްވައި، އުރީދޫއިން ރާއްޖޭގައި ހިދުމަތް ފުޅާ ކުރާނެ ކަމަށް އުއްމީދު ކުރައްވާ ކަމަށް ރައީސް ވިދާޅުވި އެވެ.
"މި ބައްދަލުކުރެއްވުން ނިންމަވާލައްވަމުން، ދެބޭފުޅުން ވަނީ، އުރީދޫއިން އެންމެ ފަހުގެ ޓެކްނޮލޮޖީ އާއިއެކު ހިދުމަތްތައް ފުޅާކޮށް، އެކުންފުނީގެ ފަރާތުން ދިވެހި މުޖުތަމައަށް ފޯރުކޮށްދޭ އެހީތަށް އިތުރުވެންދާނެ ކަމަށް އުއްމީދު ކުރައްވާކަމުގައި ވިދާޅުވެފަ،" ރައީސް އޮފީހުން ބުނެފައިވެ އެވެ.
ރައީސް ގަތަރަށް ކުރައްވާ ދަތުރުފުޅުގައި ގަތަރާއި ރާއްޖެއާ ދެމެދު އޮތް ގުޅުން ބަދަހި ކުރުމަށް މަސައްކަތް ކުރައްވާނެ ކަމަށް ރައީސް އޮފީހުން ވަނީ ބުނެފަ އެވެ.
މިއީ ކުރީގެ ރައީސް ޔާމީން އަބްދުލްގައްޔޫމްގެ ވެރިކަމުގައި ސައޫދީ އަރަބިއްޔާއާ ބައިވެރިވެ، ގަތަރާއެކު އޮތް ސިޔާސީ ގުޅުން 2017 ވަނަ އަހަރު ކަނޑާލިފަހުން ރާއްޖޭގެ ވެރިއަކު އެ ގައުމަށް ވަޑއިގެން ފުރަތަމަ ފަހަރެވެ.
