ގދ. ގައްދޫގައި އަޅާ ގޭދޮށު މަސްފެކްޓަރީގެ މަސައްކަތް ލަންކާގެ ކުންފުންޏަކާ ހަވާލުކޮށްފި އެވެ.
މިކަމާ ގުޅޭ އެއްބަސްވުމުގައި ސޮއި ކުރީ އެކަމަށްޓަކައި ބޭއްވި ހާއްސަ ރަސްމިއްޔާތެއްގައި ފިޝަރީޒް މިނިސްޓަރު ޑރ. ހުސައިން ރަޝީދު ހަސަނެވެ. ގައްދޫގައި އަޅާ މަސްފެކްޓަރީގެ މަސައްކަތް ހަވާލު ކުރީ ލަންކާގެ ކުންފުންޏެއް ކަމަށްވާ ސިލިކް ލަންކާއާ އެވެ.
އެ މަސްފެކްޓަރީގެ ސަބަބުން ކުރިއަށް އޮތް ބާރަ މަސް ދުވަހުގެ ތެރޭގައި ގދ. އަތޮޅުގެ ހުރިހާ ރައްޔިތުންނަށް މިކަމުގެ މަންފާ ކުރާނެ ކަމަށް ގައްދޫ ކައުންސިލުން ވިދާޅުވެ އެވެ.
ފަސް މިލިއަން ޑޮލަރު ހަރަދުކޮށްގެން އޮޕަރޭޝަނަށް ގެންނަ މި މަސްފެކްޓަރީގައި 60 އިންސައްތަ މުވައްޒަފުންގެ ގޮތުގައި ދިވެހި މުވައްޒަފުން ތިބޭނެ ކަމަށް ގައްދޫ ކައުންސިލުގެ ރައީސް ވިދާޅުވި އެވެ.
އޭގެ އިތުރުން، މަސް ޕްރޮސެސްކޮށް އެކްސްޕޯޓް ކުރެވޭނެ އެންމެ ޒަމާނީ ނިޒާމެއް ގާއިމްކުރުމާއި ދަޅު މަސް ބަންދުކުރުމާއި 25 މެޓްރިކް ޓަނުގެ ބްލޮކް އައިސް ޕްލާންޓެއް ގާއިމްކުރުން ވެސް އެ ޕްރޮޖެކްޓު ތެރޭގައި ހިމެނެ އެވެ.
އެ ޕްރޮޖެކްޓުގައި، ދިހަ ޓަނުގެ ފްލޭކް އައިސް ޕްލާންޓެއް ގާއިމްކުރުމާއި ސަތޭކަ ޓަނުގެ ކޯލްޑް ސްޓޯރޭޖަކާއި ބްލާސްޓް ފްރީޒަރއެއް ބެހެއްޓުމުގެ އިތުރުން އެއް މިލިއަން ޑޮލަރުގެ ފިޝް މީލް ޕްލާންޓެއް ގާއިމްކުރާނެ ކަމަށް ވެސް ކައުންސިލުން ބުނެ އެވެ.
