ގދ. ގައްދޫގައި ރޭގެ ވަގުތެއްގައި ގެއެއްގެ ބަދިގޭގައި އަލިފާނުގެ ހާދިސާއެއް ހިނގައި، ދުވަސްވީ މީހެއްގެ ހަށިގަނޑުގެ 90 ޕަސެންޓު ފިހިއްޖެ އެވެ.
ގައްދޫން މަންޒަރު ދުށް މީހަކު "އަދަދު" ނޫހަށް ކިޔައިދިން ގޮތުގައި ރޭ އަށެއް ޖަހާކަށްހާއިރު ހިނގި ހާދިސާގައި ފިހުނީ މުހައްމަދު ޖަމީލު ނަމަކަށް ކިޔާ މީހެކެވެ. އޭނަގެ އުމުރުން ގާތްގަނޑަކަށް 80 އަހަރު ވެދާނެ ކަމަށް އޭނާ ބުންޏެވެ.
"ޖަމީލުބެ އުޅެމުންދާ ގެއާއި ސިއްހީ މަރުކަޒަކާ މާ ދުރެއް ނުވާނެ، ހިނގާލާފައި ދެ މިނެޓުން ދެވޭނެ، މީހާ އެއްކޮށް ފިހުނީމަ ޖަމީލުބެ އަމިއްލައަށް ސިއްހީ މަރުކަޒަށް އައީ ވެސް،" މަންޒަރު ދުށް މީހާ ކިޔައިދިނެވެ.
ޖަމީލު ރަށުގައި ދިރިއުޅެމުން އައީ އޭނާގެ އަނބިމީހާއާ އެކުގަ އެވެ. ދަރިން ތިބީ މާލޭގައި ކަމުން، އެ ގޭގައި އުޅެނީ ދެމަފިރިން އެކަންޏެވެ.
"ކިރިޔާ ހިނގާ ބިނގާވެ އުޅެވެނީ އޭރު ސިއްހީ މަރުކަޒުން ދިމާވިއިރު، ގައިގަ ދެން ހަމެއް ނެތް، ވަރަށް ބޮޑަށް ފިހިފަ ހުރީ،" މަންޒަރު ދުށް މީހާ އިތުރަށް ބުންޏެވެ.
ގދ. ގައްދޫ ސިއްހީ މަރުކަޒުގެ ސީނިއާ އެޑްމިނިސްޓްރޭޓަރު ފާތިމަތު ޝަހީދާ "އަދަދު" ނޫހަށް ވިދާޅުވީ ރޭގެ ވަގުތެއްގައި ދުވަސްވީ މީހަކު ފިހިގެން އެ ރަށު މަރުކަޒަށް އައިސް ފަރުވާ ހޯދި ކަމަށާއި އޭނާގެ ހަށިގަނޑުގެ 90 ޕަސެންޓު ފިހިފައިވާ ކަމަށެވެ.
އޭނާގެ ހާލު ސީރިއަސްކަމުން ބަލަނީ އެ އަތޮޅު ތިނަދޫ ހޮސްޕިޓަލަށް ބަދަލުކޮށް ފަރުވާދެވޭތޯ ކަމަށް ވެސް ޝަހީދާ ވިދާޅުވި އެވެ.
