އަންނަ އަހަރު ރާއްޖޭގައި ބާއްވާ ރިޔާސީ އިންތިހާބަށް، ދައުލަތުގެ ބަޖެޓްގައި ކަނޑައަޅާފައިވާ 90 މިލިއަން ރުފިޔާއިން އެ އިންތިހާބުގެ ދެ ބުރު ބޭއްވުމުގައި ތާށިތަކެއް ކުރިމަތިވެދާނެ ކަމަށް އިލެކްޝަންސް ކޮމިޝަން (އީސީ) ގެ ރައީސް ފުއާދު ތައުފީގު ވިދާޅުވެއްޖެ އެވެ.
އިންތިހާބުގެ ދެ ބުރު އޮވެދާނެ ކަމަށް ބަލައިގެން 120 މިލިއަން ރުފިޔާ ހަރަދުވާނެ ކަމަށް އީސީން މީގެ ކުރިން ވެސް ބުނެފައިވެ އެވެ. އިންތިހާބުގެ ބަޖެޓަށް 90 މިލިއަން ރުފިޔާ ހިމަނާފައި ވަނީ އެ ކޮމިޝަނުން އެހެން ބުނެފައި އޮއްވަ އެވެ.
އެކަމާ ގުޅޭ ގޮތުން ސުވާލުކުރުމުން އީސީގެ ރައީސް ފުއާދު ތައުފީގު "އަދަދު" އަށް ވިދާޅުވީ މިހާރު ކަނޑައެޅިފައިވާ ބަޖެޓުން ވެސް އިންތިހާބުގެ ފުރަތަމު ބުރު އެއްވެސް ދަތި ކަމެއް ނެތި ބޭއްވޭނެ ކަމަށެވެ. އެކަމަކު ދެވަނަ ބުރަކަށް ގޮސްފި ނަމަ އިތުރަށް ފައިސާ ބޭނުންވާނެ ކަމަށް އޭނާ ވިދާޅުވި އެވެ.
"90 މިލިއަން ރުފިޔާ އަޅުގަނޑުމެންނަށް ދެއްވާފައި މި ވަނީ، އެ އަދަދުން ވެސް ފުރަތަމަ ބުރު އެއްވެސް ދަތިތަކެއް ކުރިމަތިނުވެ އަޅުގަނޑުމެންނަށް ބޭއްވޭނެ، ދެވަނަ ބުރު ބާއްވާ ހިސާބުން ތާއްޓެއް އެރިޔަސް އަރާނީ،" ފުއާދު ވިދާޅުވި އެވެ.
ގާނޫނު އަސާސީގައި އޮންނަ ގޮތުން ރިޔާސީ އިންތިހާބު ކާމިޔާބު ކުރި ކަމަށް ބެލެވެނީ ވޯޓުލީ ރައްޔިތުންގެ 50 އިންސައްތަ އަދި އިތުރަށް އެއް ވޯޓު މަދުވެގެން ހޯދައިގެންނެވެ.
ފުރަތަމަ ބުރުގައި، ކުރިމަތިލި އެއްވެސް ކެންޑިޑޭޓަކަށް އެ ނިސްބަތަށް ވޯޓު ނުލިބޭ ނަމަ، އެންމެ ގިނަ ވޯޓު ލިބުނު ދެ ކެންޑިޑޭޓުންގެ މެދުގައި ދެވަނަ ބުރެއް ބާއްވަން ޖެހޭނެ އެވެ. މީގެ ކުރިން 2008 އަދި 2013 ވަނަ އަހަރު ވެސް ރިޔާސީ އިންތިހާބުގެ ދެ ބުރު ބާއްވަން ޖެހިފައިވެ އެވެ.
އޭގެ އިތުރަށް ފުއާދު ވިދާޅުވީ މީގެ ކުރީގެ އިންތިހާބުތަކުގައި އެ ކޮމިޝަނުން ބޭނުންކޮށްފައިވާ ގިނަ ތަކެތި މިހާރު ގިނަ ދުވަސްވެ ބާވެފައިވާ ކަމަށެވެ. ބައެއް ތަކެތި ބޭނުންނުކުރެވޭ ވަރަށް ހަލާކު ވެސް ވެފައިވާތީ، މުޅީން އާ ތަކެތި ވެސް ހޯދަން ޖެހިފައިވާ ކަމަށެވެ.
"ވަގުތުން ބަޖެޓް ހަމަނުޖެއްސުނަސް، ފަހުން އިތުރަށް ފައިސާ ބޭނުން ވުމުން މީގެ ކުރިން ވެސް ސަރުކާރުން ހަމަޖައްސައިދީފައި ހުރީ. އަޅުގަނޑަށް މި ފަހަރު ވެސް ޔަގީން ބަޖެޓް ހަމަޖައްސައިދޭނެ،" ބޭނުންވި ވަރަށް އަދި ބަޖެޓް ހަމަޖެހިފައި ނެތަސް އަދި ކަންބޮޑުވުމެއް ނެތް ކަމަށް ފުއާދު ވިދާޅުވި އެވެ.
ރިޔާސީ އިންތިހާބަށް ނިކުންނަ ޕާޓީތައް
ރިޔާސީ އިންތިހާބަށް މިހާތަނަށް ޝައުގުވެރިކަން ފާޅުކުރި ޕާޓީތަކުގެ ތެރޭގައި ވެރިކަން ކުރާ މައި ޕާޓީ އެމްޑީޕީ، އިދިކޮޅު ޕީޕީއެމް، އަލަށް އުފެއްދި އެމްއެންޕީގެ އިތުރަށް އެމްޑީއޭ ހިމެނެ އެވެ.
ޕީޕީއެމްގެ ރިޔާސީ ކެންޑިޑޭޓަކީ ކުރީގެ ރައީސް އަބްދުﷲ ޔާމީނެވެ. އެމްޑީއޭއިން ވާދަކުރައްވަނީ އެ ޕާޓީގެ ލީޑަރު އަހުމަދު ސިޔާމް މުހައްމަދެވެ.
އެމްޑީޕީއާއި އެމްއެންޕީގެ ކެންޑިޑޭޓް ކަނޑައަޅަނީ ޕްރައިމަރީއަކަށް ފަހުގަ އެވެ. އެމްއެންޕީގެ ޕްރައިމަރީ އަންނަ ޖެނުއަރީ މަހު އޮންނާނެ އެވެ. އެމްޑީޕީގެ ޕްރައިމަރީ ބާއްވާނެ ތާރީހެއް އަދި ނުނިންމަ އެވެ.
އެމްޑީޕީގެ ޕްރައިމަރީގައި ރައީސް އިބްރާހީމް މުހައްމަދު ސޯލިހް އަދި ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވާދަކުރައްވާނެ ކަމަށް ބެލެވެ އެވެ. އެމްއެންޕީގެ ޕްރައިމަރީއަށް އަދި ޝައުގުވެރިކަން ފާޅުކުރެއްވީ އެ ޕާޓީގެ ރައީސް، މަޖިލީހުގެ ދަނގެތި ދާއިރާގެ މެންބަރު މުހައްމަދު ނާޒިމް އެކަންޏެވެ.
އޭގެ އިތުރަށް، ކުރީގެ ހޯމް މިނިސްޓަރު އުމަރު ނަސީރު ވެސް ވަނީ އަމިއްލަ ކެންޑިޑޭޓެއްގެ ގޮތުގައި ރިޔާސީ އިންތިހާބުގައި ވާދަކުރައްވާނެ ކަމަށް ވިދާޅުވެފަ އެވެ.
