އަވައްޓެރި ސްރީ ލަންކާގައި އަމިއްލައަށް އަރުވާލެވިގެން 18 އަހަރު ހުންނެވުމަށްފަހު އަހުމަދު "ބޮޑު ސިއްކަ" އިސްމާއިލް އިއްޔެގެ ވަގުތެއްގައި މާލެ ވަޑައިގެންފި އެވެ.
ސިއްކަ އަހުމަދު އިސްމާއިލަކީ ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހުގެ އަނބިކަނބަލުން ފަޒްނާ އަހުމަދުގެ ބައްޕާފުޅެވެ. މި ނޫހަށް އެނގިފައިވާ ގޮތުގައި އޭނާ މާލެ ވަޑައިގެންނެވީ އަނބިކަނބަލުންގެ ސިއްހީ ހާލުކޮޅު ދެރަވެގެންނެވެ.
އެނގިފައިވާ ގޮތުގައި ސިއްކަ މާލެ ވަޑައިގެން ހުންނަވަނީ މ. ދީފްރަމްގޭގަ އެވެ. އިއްޔެ އޭނާގެ އާއިލާއިން އެ ގެއަށް ޒިޔާރަތްކޮށްފައި ވެސް ވެ އެވެ.
ބޮޑު ސިއްކަ ސްރީ ލަންކާގެ ކޮޅުނބަށް ދިރިއުޅުން ބަދަލު ކުރެއްވީ ދެހާސް ވަނަ އަހަރުގެ ކުރީކޮޅު ސިޔާސީ މައިދާން ހަލަބޮލިވެ، މާލޭގެ ސިޔާސީ މީހުން އަދި ކަމުވޮށިގެންވާ ބޭފުޅުންނަށް ނުރައްކާތަކެއް ކުރިމަތިވުމުންނެވެ.
ބޮޑު ސިއްކަ އޭނާގެ އާއިލާގެ ބައެއް ބޭފުޅުންނާއެކު: ކޮޅުނބަށް ދިރިއުޅުން ބަދަލު ކުރީ ދެހާހުގެ ކުރީކޮޅު -- ފޮޓޯ:
ސިއްކަ އަހުމަދު އިސްމާއިލްއަކީ ރައްޔިތުން މަޖިލީހުގެ ރައީސް އަދި ކުރީގެ ރައީސް މުހައްމަދު ނަޝީދުގެ ބޮޑުބޭބެ އެވެ.
މީގެ 33 އަހަރު ކުރިން ދިވެހިރާއްޖޭގެ ވެރިކަން ވައްޓާލުމަށް ތަމަޅައިގެންގެ ބަޔަކާއެކު ދިވެހިންތަކެއް ބަޑި ހިފައިގެން މާލެ އެރި މައްސަލައިގައި އެ އުދުވާނީ ހަމަލައިގައި ބައިވެރިވި ކަމަށް ސާބިތުވެ ބޮޑު ސިއްކަގެ މައްޗަށް އޮތީ ހުކުމެއްކޮށްފަ އެވެ. ނަމަވެސް ފަހުން ރައީސް މައުމޫން އަބްދުލްގައްޔޫމް ވަނީ އޭނާއަށް އަފޫއާމް ދެއްވައިފަ އެވެ.
އުދުވާނީ ހަމަލައިގައި ބައިވެރިވިކަން ސިއްކަ އަހުމަދު އިސްމާއިލް އެކަމަށް އަބަދުވެސް އިއުތިރާޒް ކުރައްވަ އެވެ. މި އަހަރުގެ ނޮވެމްބަރު 3، ވަނަ ދުވަހާ ގުޅިގެން ނަޝީދު ވަނީ ބޮޑުބޭބޭފުޅު ދިފާއު ކުރައްވައި ވާހަކަ ދައްކަވައިފަ އެވެ.
"ނޮވެމްބަރު ތިނެއްގެ ހަމަލާގައި ސިއްކަ އަހުމަދު އިސްމާއިލް މަނިކުގެ އަބުރަށް އަރައިގަތުން އެއްގޮތަކަށް ވެސް ބަލައެއް ނުގަނެވޭ. އޭނާއަށް އިންތިހާއަށް އަނިޔާކޮށް މަރުގެ ތުންފަތްމައްޗަށް ގެނެސް އޭނާ އަތުން ނެގި އިއުތިރާފް ބަޔާނަކީ ބޮޑު އޮޅުވާލުމެއް،" ނަޝީދު ވިދާޅުވެފައިވެ އެވެ.
