މިއީ ހުޅަނގު މޫސުމުގެ އެންމެ ފަހު ނަކަތް ކަމުގައިވާ ދޮށަ ނަކަތް ނިމި، އިރުވައި މޫސުން ފެށޭ ދުވަސްވަރެވެ. އިރުވައި މޫސުމުގެ ފުރަތަމަ ނަކަތް ކަމުގައިވާ މުލަ ނަކަތުގެ ތޮބީއަތަކީ ވައިގަދަ ވުމާއި ކަނޑު ގަދަވުމެވެ.
ޑިޕާޓްމެންޓް އޮފް މީޓިއޮރޮލޮޖީން މިއަދު ވަނީ ހއ. އިން ފެށިގެން ވ. އަތޮޅަށް ވައިޓް އެލާޓު ނެރެފަ އެވެ. މޫސުމް ލަފާކުރާ ގޮތުގައި އެ ސަރަހައްދަށް ބޯކޮށް ވާރޭވުމުމާއެކު ގުގުރާނެ އެވެ.
ރާއްޖޭގެ ބޮޑު ބަޔަކަށް މިހާރު ނެރެފައިވާ އެ އެލާޓުގެ ސުންގަޑިއަކީ މިއަދު 11:00 އެވެ.
ސެޓްލައިޓު ފޮޓޯތަކުން ދައްކާ ގޮތުގައި ރާއްޖެ މަތީގައި ބޯވިލާތައް ވަނީ އުފެދިފަ އެވެ.
ރާއްޖޭގައި އާންމުކޮށް އޮންނަ ދެ ނަކަތުގެ ތެރެއިން މިހާރު ހިނގަމުންދާ ހުޅަނގު މޫސުމުގެ އެންމެ ފަހު ނަކަތް ކަމުގައިވާ ދޮށަ ނަކަތް، ޑިސެންބަރު 9 ގައި ނިމި، އިރުވައި މޫސުން ފެށޭނީ ޑިސެންބަރު 10ގަ އެވެ. އެ މޫސުމުގެ ފުރަތަމަ ނަކަތް ކަމުގައިވާ މުލަ ނަކަތް ނިމޭނީ ޑިސެންބަރު 22 ގަ އެވެ.
ހުޅަނގު މޫސުމުގައި 18 ނަކަތް އޮންނައިރު، އިރުވައި މޫސުމުގައި އޮންނަނީ ނުވަ ނަކަތެވެ. ނަކަތެއްގެ ދިގުމިނަކީ 13 ނުވަތަ 14 ދުވަހެވެ.
