ފަނޑިޔާރުންނާއި ޝަރުއީ ދާއިރާގެ މުވައްޒަފުންނަށް އަމާޒުކޮށްގެން މަދަނީ އިޖުރާއަތުގެ ގާނޫނަށް އަހުލުވެރިކުރުމުގެ ތަމްރީނު ޕްރޮގްރާމެއް ޖުޑީޝަލް އެކަޑެމީއިން މިއަދު ފަށައިފި އެވެ.
އިނގިރޭސި ވިލާތުގެ އެހީއާއެކު ޔޫއެންޑީޕީ މޯލްޑިވްސް އާއި ޖުޑިޝަލް އެކަޑެމީ ގުޅިގެން ސިލްސިލާކޮށް ކުރިއަށް ގެންދާ، މިއީ މިފަދަ 12 ވަނަ ޕުރޮގުރާމެވެ.
ރ. އުނގޫފާރުގައި ފެށި މި ޕުރޮގުރާމު ޝަރަފުވެރި ކޮށްދެއްވީ ދިވެހިރާއްޖޭގެ ސުޕްރީމް ކޯޓުގެ ފަނޑިޔާރު، އާއިޝާ އާއިޝާ ޝުޖޫން މުހައްމަދެވެ. މި ޕުރޮގުރާމުގައި ޖުމްލަ 60 ބޭފުޅުން ބައިވެރިވެފައިވާ ކަމަށާއި އޭގެތެރޭގައި ރ، ބ، ކ، އއ، އދ. އަދި ގދ. އަތޮޅުގެ ގެ ޝަރުއީ ދާއިރާގެ މުވައްޒަފުން ހިމެނޭ ކަމަށް ޑީޖޭއޭއިން ބުނެ އެވެ.
ދެ ދުވަހުގެ މުއްދަކަށް ކުރިއަށް ގެންދާ މި ޕުރޮގުރާމުގައި މަދަނީ އިޖުރާއަތުގެ ގާނޫނުގެ ހުލާސާ އާއި އެ ގާނޫނަށް އަލަށް ތައާރަފު ކުރެވުނު ބަދަލުތަކާއި ހަމަތަކާއި މަދަނީ މައްސަލަތައް ހުށަހެޅުމާއި ރެޖިސްޓަރީ ކުރުން އަދި އިދާރީ ކަންކަމުގެ އިތުރުން ޣައިރު ހާޒިރުގައި ހުކުމް ކުރުމާއި ޝަރީއަތްކުރުމަކާ ނުލައި މައްސަލަ ނިންމުމާ ގުޅޭގޮތުން މައުލޫމާތު ދޭނެ ކަމަށް އެ އެޑްމިނިސްޓުރޭޝަނުން ބުނެ އެވެ.
އޭގެ އިތުރުން އިހުތިފާލެއް ނުވާ ބާވަތްތަކުގެ މައްސަލަތައް ހިންގާނެ ގޮތާއި ކޯޓު އަމުރު ނެރުމާއި ވަގުތީ އަމުރު ނެރުމުގެ އިޖުރާއަތްތައް ކިޔަވައިދޭނެ ކަމަށް ވެސް ޑީޖޭއޭއިން ބުނެ އެވެ.
މަދަނީ އިޖުރާއަތުގެ ގާނޫނަކީ، ރާއްޖޭގެ ޝަރުއީ ކޯޓުތަކަށް ހުށަހެޅޭ މަދަނީ މައްސަލަތަކުގެ ޝަރީއަތުގެ ކުރީގެ އިޖުރާއަތުތަކާއި އެފަދަ މައްސަލަތަކުގެ ޝަރީއަތުގެ މަރުހަލާތައް ހިނގާނެ ގޮތާއި އެފަދަ މައްސަލަތަކުގެ މައްޗަށް ހިނގާނެ ހެކީގެ އުސޫލުތަކާއި އެފަދަ މައްސަލަތަކާމެދު ގޮތެއް ނިންމުމުގައާއި ޝަރީއަތް ނިމި ހުކުމް ތަންފީޒުކުރުމުގައި އަމަލުކުރާނެ އިޖުރާއަތުތަކާއި އެނޫންވެސް ޝަރުއީ ކޯޓުތަކަށް ހުށަހެޅޭ މައްސަލަތަކުގެ މަދަނީ އިޖުރާއަތާބެހޭ އާންމު އުސޫލުތައް ބަޔާންކޮށްދޭ، މަދަނީ އަދުލުގެ ނިޒާމު ހަރުދަނާކުރުމަށްޓަކައި އެކުލަވާލި މުހިންމު ގާނޫނެކެވެ.
