ރާއްޖޭގެ ބައެއް ސަރަހައްދުތަކަށް ޖައްވު ނުސާފުކޮށް ފެންނަނީ އިންޑިއާއިން އަންނަ ދުމާއި ހިރަފުހުން ކަމަށް މޫސުމާ ބެހޭ ގައުުމީ އިދާރާ (މެޓް އޮފީސް) އިން ބުނެފި އެވެ.
މެޓް އޮފީހުން އިއްޔެ ބުނީ އުތުރާއި މެދު ރާއްޖެތެރޭގެ ބައެއް ސަރަހައްދުތަކަށް ޖައްވު ނުސާފުކޮށް ފެންނަ ކަމަށެވެ. އެއީ ވަޔާއެކު، ހިމާލަޔަން ސަރަހައްދުން ބޭ އޮފް ބެންގަލް ހުރަސްކޮށް އަންނަ ދުމާއި ހިރަފުހުގެ ސަބަބުން ކަމަށް އެ އޮފީހުން ބުނެ އެވެ.
މެޓް އޮފީހުން ބުނީ ޖައްވު ނުސާފުވުމުގެ ސަބަބުން ދުރު ފެންނަ މިންވަރު ދަށްވެފައިވާ ކަމަށާއި މިކަން އަންނަ އަހަރުގެ މާޗް މަހުގެ ނިޔަލަށް ދެމިގެން ދާނެ ކަމަށް ލަފާ ކުރެވޭ ކަމަށެވެ.
ކޮންމެ އަހަރަކުވެސް މި ދުވަސްވަރާ ދިމާކޮށް ރާއްޖޭގެ އުތުރާ މެދުރާއްޖެތެރޭގެ ސަރަހައްދުތަކުގެ ޖައްވު ނުސާފުވެ އެވެ. އާންމުކޮށް މޫސުން ރަނގަޅު ނަމަ ރާއްޖޭގައި ދުރު ފެންނަ މިންވަރަކީ ގާތްގަނޑަކަށް 10 ކިލޯ މީޓަރެވެ. ނަމަވެސް ޑިސެމްބަރު މަހުން ފެށިގެން މާޗްމަހުގެ ނިޔަލަށް 4-5 ކިލޯމީޓަރާއި ހަމައަށް ދުރުފެންނަ މިންވަރު ދަށްވެއެވެ.
ޖައްވު ނުސާފުކޮށްލާފައިވާ ހިރަފުހުގެ ސަބަބުން، ނޭވާލާ ނިޒާމުގެ މައްސަލަތައް ހުންނަ ފަރާތްތަކަށް އުނދަގޫވުން އެކަށީގެންވާ ކަމަށާއި މި ދުވަސްވަރު ވާރޭފެން ނެގުމާއި ބޭނުންކުރުމުގައި ސާފުތާހިރު ކަމަށް އިތުރަށް ސަމާލުކަން ދިނުމަށް މެޓް އޮފީހުން އިލްތިމާސްކުރެ އެވެ.
