"މާލޭ ޓީޓީ ހޯލް" ގެ ނަމުގައި ޓޭބަލް ޓެނިސްގެ ތަމްރީނުތައް ކުރިއަށްގެންދިޔުމަށް ތަރައްގީ ކުރި ތަނެއް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު އިއްޔެ ހުޅުވައިދެއްވައިފި އެވެ.
ހެންވެއިރު ބޯޅަ ދަނޑު ކުރިމަތިން އޮންނަ މުނިއުފާ މަރުކަޒުގައި ހުޅުވި އެ ޓީޓީ ހޯލުގައި ޖުމްލަ 12 މޭޒު ހުންނާނެ އެވެ. އެއީ މިހާތަނަށް ރާއްޖޭގައި ހެދި އެންމެ ޖާގަ ތަނަވަސް ޓީޓީ ހޯލް ކަމަށް ސަރުކާރުން ބުނެ އެވެ.
"މިއީ ދިވެހިރާއްޖޭގައި ޓީޓީ ކުރިއެރުމަށް ލިބޭނެ ވަރަށް ބޮޑު ފުރުސަތެއް. މި ހޯލުގެ ސަބަބުން ގިނަ ކުޅުންތެރިންނަށް ކުޅުމުގެ ފުރުސަތު ލިބިގެންދާނެ،" ޓޭބަލް ޓެނިސް އެސޯސިއޭޝަން އޮފް މޯލްޑިވްސް އިން ބުނެފައިވެ އެވެ.
ޓީޓީ ހޯލް ހުޅުވުމަށް ބޭއްވި ރަސްމިއްޔާތުގައި އިއްޔެ ރައީސް ސޯލިހުގެ ނައިބު ފައިސަލް ނަސީމާއި އެމަނިކުފާނުގެ ޔޫތު މިނިސްޓަރު އަހުމަދު މަހްލޫފް ވެސް ބައިވެރިވެވަޑައިގެންނެވި އެވެ.
އެކަމާ ގުޅިގެން ރައީސް އޮފީހުން ނެރުނު ބަޔާނެއްގައި ބުނެފައި ވަނީ ޓީޓީ ފަދަ ކުޅިވަރުތައް ކުރިއެރުވުމަކީ ސަރުކާރުގެ އަމާޒެއް ކަމަށެވެ. މިދިޔަ އަހަރު ހުޅުމާލޭގައި އަދި މި އަހަރު ފުވައްމުލަކުގައި ޓީޓީ ކުޅޭ ތަނެއް ހުޅުވީ އެ އެޖެންޑާގެ ދަށުން ކަމަށް ވެސް ރައީސް އޮފީހުން ބުނެ އެވެ.
