ކޮލެޖެއްގެ ގޮތުގައި ހިންގަމުން އަންނަތާ 15 އަހަރުވެފައިވާ ތައުލީމު ދޭ މަރުކަޒުތަކަށް ޔުނިވާސިޓީގެ ދަރަޖަ ލިބޭ ގޮތަށް ގާނޫނަށް އިސްލާހު ގެނައުމަށް ރައްޔިތުންގެ މަޖިލީހަށް ހުށަހަޅާފައިވާ ބިލު ފާސްނުކޮށް ތަޅުމުން ބޭރުކޮށްލައިފި އެވެ.
ތުލުސްދޫ ދާއިރާގެ މެންބަރު އިބްރާހިމް ނަސީމް ހުށަހެޅުއްވި މި ބިލު ދިރާސާކުރި ގައުމީ ތަރައްގީއާއި ތަރިކައިގެ ކޮމިޓީން ވަނީ ބިލަށް ބައެއް އިސްލާހުތައް ގެނެސްފަ އެވެ.
އެގޮތުން، ޑިގްރީއަށް ނުވަތަ އެއަށް ވުރެ މަތީގެ ސަނަދަކަށް ކިޔަވަމުންދާ 1000 ކުދިން ތިބި ކޮލެޖަކަށް ވުމަށް ކޮމިޓީން ވަނީ ބަދަލުކޮށްފަ އެވެ.
އަދި، ބައިނަލްއަގްވާމީ ކޮލިޓީ އެޝޫރަންސް ޖަމާއަތެއްގައި ބައިވެރިވެ ފަސް އަހަރުވެފައިވާން ޖެހޭނެ ކަމަށް ބުނާ ޝަރުތާއި ބައިނަލްއަގްވާމީ ފެންވަރުގެ ދިރާސާތައް ކުރުމުގެ ތަޖުރިބާ ލިބިފައިވާ ކޮލެޖަކަށް ވާން ޖެހޭނެ ކަމަށް ބުނާ ޝަރުތު ކޮމިޓީން ވަނީ އުނިކޮށްފަ އެވެ.
ކޮމިޓީ ރިޕޯޓު ފާސްކުރުމަށް މަޖިލީހުގައި މިއަދު ނެގި ވޯޓުގައި 43 މެންބަރުން ވަނީ ދެކޮޅަށް ވޯޓު ދެއްވާފަ އެވެ. ފާސްކުރަން ފެންނަ ކަމަށް ވޯޓު ދެއްވީ 10 މެންބަރުންނެވެ.
ކޮމިޓީ ރިޕޯޓު ފާސްނުވުމުން، ބިލުން އަލުން ކޮމިޓީއަށް ފޮނުވުމަށް ނެގި ވޯޓުގައި ވެސް ގިނަ މެންބަރުން ވޯޓު ދެއްވީ އަނބުރާ ކޮމިޓީއަށް ފޮނުވަން ނުފެންނަ ކަމަށެވެ. ނުފެންނަ ކަމަށް 43 މެންބަރުން ވޯޓު ދެއްވިއިރު ފެންނަ ކަމަށް ވޯޓު ދެއްވީ 11 މެންބަރުންނެވެ.
ގަވާއިދުގައި މިހާރު އޮންނަ ގޮތުން ޔުނިވާސިޓީގެ ގޮތުގައި ރެޖިސްޓްރީ ކުރެވެނީ ކޮލެޖެއްގެ ގޮތުގައި ހިންގަމުން އަންނަތާ 20 އަހަރުވެފައިވާ ނުވަތަ ރާއްޖޭއިން ބޭރު ގައުމެއްގައި ހިންގަމުން އަންނަތާ 10 އަހަރުވެފައިވާ ޔުނިވާސިޓީތަކަށެވެ.
