ލޭންޑިން ކްރާފްޓަކުން ޖެހި މ. މަޑުއްވަރީ ޖެޓީ ވެއްޓިއްޖެ އެވެ.
ހާދިސާގެ މައުލޫމާތު ހިއްސާކުރައްވަމުން މަޑުއްވަރީ ކައުންސިލުގެ ނައިބު ރައީސް އިބްރާހިމް ނިޝާމް ' އަދަދު' އަށް ވިދާޅުވީ މި ހާދިސާ ހިނގީ އެ ރަށަށް ތެޔޮ އަޅަން ދިޔަ ލޭންޑިން ކްރާފްޓަކުން ޖެހި ކަމަށެވެ. ވައި ގަދަވުމުގެ ސަބަބުން މި ހާދިސާ ހިނގާފައި ވަނީ ރޭ ފަތިހު ކަމަށް ވެސް އޭނާ ވިދާޅުވި އެވެ.
ނިޝާރު ވިދާޅުވީ ވެއްޓުނު ޖެޓީއަކީ އެ ރަށު ރައްޔިތުން މަސްބޭނުން ފަދަ ކަންކަމަށް ބޭނުންކުރަމުންދާ ތަނެއް ކަމަށެވެ. އެހެންކަމުން ހާދިސާގެ ސަބަބުން ރަށަށް އަރާ ފުރުމަށް އެއްވެސް ދަތިކަމެއް ނާންނާނެ ކަމަށެވެ.
އެހެން ނަމަވެސް މިކަމުގެ ސަބަބުން ފަސް ލައްކައާ ގާތްކުރާ ވަރުގެ ގެއްލުން ލިބިފައިވާ ކަން އޭނާ ފާހަގަކުރެއްވި އެވެ.
މަޑުއްވަރީގެ ޖެޓީ ވެއްޓިފައިވާއިރު، އެ ސަރަހައްދަށް އަދިވެސް މޫސުން ގޯސްކޮށް އޮތުމާ އެކު، އެތަން ސާފު ކުރުމުގެ މަސައްކަތް އަދި ނުފެށޭ ކަމަށް ނިޝާރު ވިދާޅުވި އެވެ.
