ޖީއެސްޓީ އާއި ޓީޖީއެސްޓީ ބޮޑުކުރުމަށް ސަރުކާރުން ހުށަހެޅި ބިލު ފާސްކުރަން ފެންނަ ކަމަށް ޕީޕީއެމަށް ނިސްބަތްވާ، ރައްޔިތުންގެ މަޖިލީހުގެ ފަރެސްމާތޮޑާ ދާއިރާގެ މެންބަރު ހުސައިން މުހައްމަދު ލަތީފް ވޯޓް ދެއްވައިގެން ޕާޓީގެ ވިޕްލައިނަކާ ހިލާފުވެފައިވާ ކަމަށް އެ ޕާޓީ ހިމެނޭ ކޯލިޝަންގެ ލީޑާޝިޕުން ބުނެފި އެވެ.
ޖީއެސްޓީ ހަ ޕަަސެންޓުން އަށް ޕަސެންޓަށް އަދި ޓީޖީއެސްޓީ 12 ޕަސެންޓުން 16 ޕަސެންޓަށް ބޮޑުކުރަން ސަރުކާރުގެ ފަރާތުން އިހަވަންދޫ ދާއިރާގެ މެމްބަރު މުހައްމަދު ޝިފާއު ހުށަހަޅުއްވި ބިލު ރައްޔިތުންގެ މަޖިލީހުގެ މިއަދުގެ ޖަލްސާގައި ފާސްކުރީ އެ ކަމަށް ނެގި ވޯޓުގައި ބައިވެރިވެވަޑައިގެންނެވި 82 މެމްބަރުންގެ ތެރެއިން 55 މެމްބަރުން ވޯޓު ދެއްވައިގެންނެވެ.
ބިލު ފާސްކުރަން ވޯޓު ދެއްވި މެންބަރުންގެ ތެރޭގައި ފަރެސްމާތޮޑާ ދާއިރާގެ މެންބަރު ހުސައިން މުހައްމަދު ލަތީފް ހިމެނިވަޑައިގަންނަވާއިރު، ދެން އެ ވޯޓުގައި ބައިވެރިވެވަޑައިގެންނެވި ޕީޕީއެމާއި ޕީއެންސީގެ ހަތް މެންބަރުން ވޯޓު ދެއްވީ ފާސްކުރަން ނުފެންނަ ކަމަށެވެ.
އެ ބިލުގެ ބަހުސްގައި ވެސް ޕީޕީއެމާއި ޕީއެންސީގެ މެންބަރުން ވަކާލާތު ކުރައްވަމުން ގެންދެވީ ދުނިޔެއާއި ރާއްޖޭގެ އިގްތިސޯދު ދަށްވެ އާންމުންނާއި ވިޔަފާރިތަކުގެ އާމްދަނީއަށް އަސަރުކޮށްފައިވާ މިފަދަ ދަނޑިވަޅެއްގައި، ޓެކްސް ބޮޑުކުރުމާ ދެކޮޅަށެވެ.
އެ ބިލު މަޖިލީހުން ފާސްކޮށްފައިވަނިކޮށް، އިދިކޮޅު ކޯލިޝަނުން މަޖިލީހުގެ އިދާރާގައި ބޭއްވި ޕްރެސް ކޮންފެރެންސް ފައްޓަވައިގެން ޕީއެންސީގެ ޕާލިމެންޓްރީ ގްރޫޕްގެ ލީޑަރު އާދަމް ޝަރީފް ވެސް ގޮވާލެއްވީ ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހް ބިލު ތަސްދީގު ނުކުރެއްވުމަށެވެ.
ޕީޕީއެމާއި ޕީއެންސީގެ ސްޓޭންޑް އެ ގޮތަށް އޮއްވައި ހުސައިން ވޯޓު ދެއްވި ގޮތާ ގުޅޭ ގޮތުން "އަދަދު" އިން ސުވާލުކުރުމުން އާދަމް ޝަރީފް ވިދާޅުވީ ޓެކްސްގެ ބިލަށް ވޯޓު ނުދޭ ގޮތަށް އެ ދެ ޕާޓީގެ ޖޮއިންޓް ޕާލިމެންޓްރީ ގްރޫޕުން ތްރީލައިނެއް ވިޕެއް ވެސް ނެރެފައިވާ ކަމަށެވެ.
"އެކަމާ [ހުސައިން ތްރީލައިން ވިޕާ ހިލާފުވުމާ] ގުޅިގެން އަޅުގަނޑުމެންގެ ޕާޓީން ވެސް އޮންނަ އުސޫލުގެ ތެރެއިން ކުރަން ޖެހޭ ކަންތައްތައް ކުރާނަން،" ރައްޔިތުންގެ މަޖިލީހުގައި މަޑުއްވަރީ ދާއިރާ ތަމްސީލް ކުރައްވާ މެންބަރު އާދަމް ޝަރީފް ވިދާޅުވި އެވެ.
އެ މައްސަލަ ބަލާއިރު ވެސް ޕާލިމެންޓްރީ ގްރޫޕުން އިސްކަން ދޭނީ ޕާޓީގެ ރޫހު ދެމެހެއްޓުމަށާއި، ޕާޓީ ބަދަހިކޮށް ބޭއްވުމަށް ކަމަށް ވެސް އާދަމް ޝަރީފް ވިދާޅުވި އެވެ.
އިދިކޮޅު ފަރާތްތަކުން ބޭއްވި ޕްރެސް ކޮންފެރެންސްގައި ވެސް ހުސައިން ބައިވެރިވެވަޑައެއް ނުގަންނަވަ އެވެ. އެ ކޮންފެރެންސްގައި ޕީޕީއެމާއި ޕީއެންސީގެ އެހެން ބައެއް މެންބަރުން ބައިވެރިވެވަޑައިގެންފައިވެ އެވެ.
މިކަމުގައި އޭނާގެ ބަހެއް ހޯދުމަށް ގުޅުމުން ފޯނަށް ޖަވާބު ދެއްވާފައެއް ވެސް ނުވެ އެވެ.
