ސްޓެލްކޯގެ މުވައްޒަފުންގެ ދަރިންނަށް ހާއްސަކޮށްގެން މިދިޔަ ހަފްތާގައި އެ ކުންފުނިން ހުޅުވި ޗައިލްޑު ކެއާ ސެންޓަރު ބައްލަވާލެއްވުމަށް ރައީސް އިބްރާހިމް މުހައްމަދު ސޯލިހުގެ ދެކަނބަލުން މިއަދު އެތަނަށް ޒިޔާރަތް ކުރައްވައިފި އެވެ.
މިއީ ރައްޔިތުންނަށް އިޖްތިމާއީ ހަމަޖެހުން ގެނެސްދިނުމަށާއި، އަންހެނުން ބާރުވެރިކުރުވުމަށާއި، ދުޅަހެޔޮ އާއިލާއެއް ބިނާކުރުމަށް ބާރުއެޅުމުގެ ސިޔާސަތުގެ ދަށުން ސްޓެލްކޯއިން ގާއިމު ކުރި ސެންޓަރެކެވެ.
ރައީސްގެ ދެކަނބަލުން ވަނީ މިއަދު އެތަނަށް ޒިޔާރަތް ކުރައްވައި އެތަނުގައި ކަންކަން އިންތިޒާމު ކުރެވިފައިވާ ގޮތް ބައްލަވާލައްވައި އެ ތަނުގައި ތިބި ކުދީންނާ އެކު ވަގުތުކޮޅެއް ހޭދަކުރައްވާފަ އެވެ.
ރައީސުލްޖުމްހޫރިއްޔާގެ ދެކަނބަލުން ސްޓެލްކޯ ޗައިލްޑު ކެއާ ސެންޓަރުގައި ތިބި ކުދީންނާއި އެކު ވަގުތު ކޮޅެއް ހޭދަ ކުރައްވަނީ -- ފޮޓޯ: ޓުވިޓާ
ސްޓެލްކޯގެ މުވައްޒަފުންނަށް މަސައްކަތު ގަޑީގައި އެމީހުންގެ ދަރިން ބޭތިއްބޭނެ ރައްކާތެރި، އިތުބާރުކުރެވޭ މާހައުލެއް ހޯދައިދިނުމުގެ މަގުސަދުގައި އެ ކުންފުނިން ގާއިމު ކުރި އެ ސެންޓަރު ހުންނަނީ ސްޓެލްކޯގެ މައި އިމާރާތުގެ އެއްވަނަ ފަންގިފިލާގަ އެވެ. އެތަނުގައި މިހާތަނަށް 33 ކުއްޖަކު ރެޖިސްޓްރީ ވަނީ ކޮށްފަ އެވެ.
އެތަން ހުޅުވުމުގެ ގޮތުން ބޭއްވި ރަސްމިއްޔާތުގައި އެ ކުންފުނީގެ މެނޭޖިން ޑިރެކްޓަރު އަހުމަދު ޝަރީފް ވަނީ އެ ސެންޓަރަކީ ސަރުކާރުން ސްޓެލްކޯގެ މުވައްޒަފުންނަށް ދެއްވި ހަދިޔާއެއް ކަމަށާއި އެ ހަދިޔާ ބަލައިގަންނަކަން މުވައްޒަފުން ދައްކަންވާނީ ކުންފުނިން ރައްޔިތުންނަށް ފޯރުކޮށްދޭ ހިދުމަތުން ކަމަށެވެ.
އުމުރުން ފަސް އަހަރާއި ދިހަ އަހަރާ ދެމެދުގެ ކުދީންނަށް ހާއްސަކޮށްގެން ހިންގާ އެ ސެންޓަރުގައި ތިބެނީ ކަމަށް ގާބިލު އަދި ކުދިން ގެންގުޅުމުގެ ހުނަރު ހުރި މުވައްޒަފުންނެވެ. ކުދިންގެ އުމުރާ ގުޅޭ ތަފާތު ގިނަ މަޖާ ހަރަކާތްތަކާއި ކުޅިވަރުގެ ތެރެއިން އުނގެނުމަށް ވެސް އިސްކަންދީގން ހިންގާ އެ ސެންޓަރުގައި ކުޑަކުދިން ކުޅޭ އެކި ވައްތަރުގެ ސާމާނާއި، ކިޔެވުމާއި، ކުރަހައި ކުލަ ޖެއްސުމަށް ބޭނުން ކުރާ ސާމާނުގެ އިތުރުން ފޮތް ހަރުގަނޑެއް ވެސް ހުރެ އެވެ.
މަސައްކަތު މާހައުލުގައި އަންހެނުން ބާރުވެރިކުރުވުމާއި ދުޅަހެޔޮ އާއިލާއެއް ބިނާކުރުމަށް ބާރު އެޅުމަކީ ސަރުކާރުގެ ސިޔާސަތެކެވެ. އެ ސިޔާސަތުގެ ދަށުން މީގެ ކުރިން ރައީސް ވަނީ ވަޒީފާ އަދާ ކުރާ ކޮންމެ މަންމައަކަށް މެޓާނިޓީ ލީވްގެ ގޮތުގައި، މުސާރައާ އެކު ހަ މަސް ދުވަހުގެ ޗުއްޓީއެއް ލިބޭނެ ގޮތާއި، ކޮންމެ ބައްޕައަކަށް މުސާރައާ އެކު މަސްދުވަހުގެ ޗުއްޓީއެއް ލިބޭނެ ގޮތް ހައްދަވައިދެއްވާފަ އެވެ.
