އިންސާފުގެ މަގަށް ރާއްޖެ ރުޖޫއަކުރެވިދާނެ ކަމުގެ އުންމީދު ފާއިތުވީ ހަތަރު އަހަރުގެ ތެރޭގައި ވަރަށް ބޮޑުވެފައިވާ ކަމަށް ރައީސް އިބްރާހިމް މުހައްމަދު ސޯލިހު މިރޭ ވިދާޅުވެއްޖެ އެވެ.
ޖުމްހޫރީ ދުވަހުގެ މުނާސަބަތުގައި މިރޭ ބޭއްވި ރަސްމިއްޔާތުގައި ވާހަކަފުޅު ދައްކަވަމުން ރައީސް ވަނީ މީގެ ހަތަރު އަހަރު ކުރިން އެމަނިކުފާނު އެމަގާމާ ހަވާލުވެވަޑައިގެންނެވުމުގެ ކުރިން ރާއްޖެ އޮތް ހާލަތު ހަނދާން އާ ކުރައްވާފަ އެވެ.
"އެ ދުވަހު ގައުމުގާ އޮތީ ހާސްކަމާ ކަންބޮޑުވުމާއި ނުތަނަވަސްކަމާއި ބިރުވެރިކަން، ސަބަބަކީ ގާނޫނު އަސާސީން ކަށަވަރު ކޮށްދީފައިވާ ހައްގުތަކާ މިނިވަންކަން ލިބިދިނުމުގައި ކަށަވަރުކަމެއް ނެތުން، އެއްބަސްނުވާ ކޮންމެ މީހަކު ވެފައިވަނީ ވެރިކަމުގެ ހަތުރަކަށް،" އެ ދުވަހުގެ ހަނދާންތައް އާ ކުރައްވަމުން ރައީސް ވިދާޅުވި އެވެ.
ގާނޫނު އަސާސީން ކަށަވަރުކޮށްދީފައިވަ ޑިމޮކްރެސީގެ ހަމަތައް ނަގާލައި، އެ ދުވަހުގެ ހާލަތު އޮތީ "އިންސާފު ލިބިދާނެ ކަމަށް އުންމީދު ނުކުރެވޭ" ހިސާބުގައި ކަމަށް ރައީސް ވިދާޅުވި އެވެ.
"މިއީ ރައްޔިތުންގެ ދަލާއި ލޭ އޮހޮރުވައިގެން ލިބިގަތް އާ ގާނޫނު އަސާސީ އޭގެ އާރޯތާނާ ކަމުގާ ވަނިކޮށް، މި ރާއްޖެ ވައްޓާލެވިދާނެ ހާލަތެއް ކަމަށް ހިތަށް ގެންނަން ވެސް ދަތިވި، ހިތަށް ނާރާ، ހިތްދަތި މި ދެންނެވި ހިތި ތަޖުރިބާ އެދުވަހު ކުރަން ޖެހުނު،" ރައީސް ވިދާޅުވި އެވެ.
ރައްޔިތުން އެއިރު ބޭނުންވީ އެ ހާލަތު ބަދަލުކޮށް، އިންސާފުގެ މަގަށް ވެރިކަން ހިންގުން ރުޖޫއަ ކުރުމަށް ކަމަށާއި މި ފާއިތުވީ ހަތަރު އަހަރު ދުވަހު މަސައްކަތް ކުރެއްވީ އެ އިސްލާހު ގެނައުމަށް ކަމަށް ރައީސް ވިދާޅުވި އެވެ.
އެގޮތުން، ތަފާތު ކުރުމެއް ނެތި ހަމަހަމަކަމާއެކު ކުރިއަށް ގޮސް، ސިޔާސީ ޒުވާބާއި ހަސަދަ އާއި ޖަދަލާއި ނަފްރަތުން މުޖުތަމައު ސަލާމަތް ކުރުމަށް ގިނަ މަސައްކަތްތަކެއް ކުރެވިފައިވާ ކަމަށް ވިދާޅުވި އެވެ.
ރައީސް ވަނީ ކުރިއަށް އޮތް ތަނުގައި ވެސް ދެމިހުންނާނީ އެ ގޮތުގައި ކަމުގެ ޔަގީން ކަމުގެ ޔަގީންކަން ރައީސް ދެއްވެވި އެވެ.
އެހެންނަމަވެސް، އޯގާތެރި ސަރުކާރެއްގެ ސިފަތައް އެންމެ ހަތަރު އަހަރުން ފުރިހަމަވެ ނުނިމޭނޭ ކަން ވެސް ރައީސް ފާހަގަކުރެއްވި އެވެ.
"އެނގި ހާމަވެ ސާފުވި އެންމެ ބޮޑު ހަގީގަތަކީ އިންސާފުގެ މަގަށް ރާއްޖެ ރުޖޫއަ ކުރެވޭނެ ކަމުގެ އުންމީދު މި ހަތަރު އަހަރުން އިންތިހާއަށް ބޮޑުވެފައިވާ ކަން،" ރައީސް ވިދާޅުވި އެވެ.
ޖުމްހޫރީ ދުވަހުގެ މިރޭގެ ޖަލްސާގައި ވަނީ މަތީ ދަރަޖަ ހޯދާފައިވާ ފަރާތްތަކަށް ރައީސުލްޖުމްހޫރިއްޔާ ދެއްވާ ހާއްސަ އިނާމު ދީފަ އެވެ.
