ގިނަ އަހަރުތަކަކަށް ފަހު ރާއްޖެ އިސްލާމް ކުރެއްވީ މޮރޮކޯގެ އަބުލް ބަރަކާތުލް ޔޫސުފުލް ބަރުބަރީ ފަސްދާނުލެވިފައިވާ މެދުޒިޔާރަތުގައި ދިދަ ނަގަން އިއްޔެ ފަށައިފި އެވެ.
ތާރީހުން އެނގެން އޮތް ގޮތުގައި މެދުޒިޔާރަތުގައި އެންމެ ފަހުން ދިދަ ނަގާފައިވަނީ މީގެ 30 ވަރަކަށް އަހަރަކަށް ކުރިން، 1970 ގެ އަހަރުތަކުގަ އެވެ.
އިއްޔެ އަލުން ދިދަ ނަގާފައިވަނީ އެއިރުގެ ފޮޓޯތަކުން ފެންނަން ހުރި ގޮތަށް ތިން ކަން ލާފައި ހުރި ބޮޑު ދިދައަކާއި ކުދި ދިދަ އެކެވެ. ދިދައިގެ ވަށައިގެން ހުންނަނީ ގައުމީ ކުލަތަކުގެ ބޯޑަރެއް ލައިފަ އެވެ. ބޮޑު އެއް ދިދައިގެ އިތުރުން ދެން ޖަހާފައިވަނީ މެދު ސައިޒުގެ 10 ދިދައާއި ޒިޔާރަތުގެ ވަށައިގެން ކުޑަ 24 ދިދަ އެވެ.
ހެރިޓޭޖު މިނިސްޓްރީގެ ކޮމިއުނިކޭޝަން ޑިރެކްޓަރު އިސްމާއިލް ނާއިލް ނަޝީދު މިއަދު "އަދަދު" އަށް ވިދާޅުވީ މިއީ ޒިޔާރަތްތަކާއި އާސާރީ ތަންތަން އިހު ހުރި ގޮތަށް އާންމުންނަށް ދައްކާލުމުގެ މަގުސަދުގައި ފެށި ކަމެއް ކަމަށެވެ.
މެދު ޒިޔާރަތް އިހު ހުރި ގޮތުގެ ފޮޓޯއެއް-- ފޮޓޯ: ސަރުނަ/ އެމްއެންޔޫ
"މި ޖީލުގެ މީހުންނަށް މި ތަންތަން އިހު ހުރި ގޮތަށް ފެންނަ ގޮތް ހެދުމަކީ ވެސް މުހިންމު ކަމެއް، އަދި ތާރީހީ މުހިންމު ބިނާތަކަކަށްވީއިރު މިފަދަ ތަންތަނަށް ގައުމީ ލޯބި ޖެއްސުން ވެސް އެއީ މިކަމުގެ އެއް ބޭނުން،" ނާއިލް ވިދާޅުވި އެވެ.
އޭނާ ވިދާޅުވި ގޮތުގައި ދިދަ ޖެހުމުގެ އިތުރުން، އިހުގައި ޒިޔާރަތުގެ އެތެރެ ހުރި ގޮތާ އެއްގޮތަށް ވެސް ބައެއް ބަދަލުތައް ވަނީ ގެނައުމަށް ނިންމާފަ އެވެ.
މެދުޒިޔާރަތަށް މެދުޒިޔާރަތް ކިޔަން ފެށުނީ އެދުވަސްވަރު މާލޭގެ ބިން އޮތް ގޮތުން އެ ޒިޔާރަތް މާލޭގެ މެދުގައި ހުރުމުން ކަމަށް ތާރީހީ ލިޔުންތައް ބުނެ އެވެ. މެދުޒިޔާރަތް މިހާރު އެހުރި ގޮތަށް ހެއްދެވީ ޝަމްސުއްދީން ރަދުންގެ ރަސްކަމުގައި އަބްދުލްމަޖީދު ރަންނަބަނޑޭރިކިލެގެފާނެވެ.
އިހުގައި ދިވެހިންގެ މެދުގައި އޮތް ޒިޔާރަތްތަކަށް ނަދުރު ބުނުމުގެ ސަގާފަތުގެ ތެރެއިންް މެދުޒިޔާރަތުގައި ވެސް އެކަން ހިނގަމުން އައެވެ. ސަރުކާރުން އެކަން މަނާކުރީ 1957 ވަނަ އަަހަރު އެވެ.
