އަންނަ އަހަރަށް ލަފާކޮށް ސަރުކާރުން ރައްޔިތުންގެ މަޖިލީހަށް ހުށަހެޅި ބަޖެޓަށް އިދިކޮޅު ޕާޓީތަކުގެ މެމްބަރުންނަށް ވުރެ ވެސް ބޮޑަށް، އެމްޑީޕީ މެމްބަރުން އިއްޔެ ފާޑުވިދާޅުވެއްޖެ އެވެ.
މަޖިލީހުގައި އިއްޔެ ކުރިއަށް ގެންދިޔަ ބަހުސްގައި ބަޖެޓަށް އެންމެ ބޮޑަށް ފާޑުވިދާޅުވީ މަޖިލީހުގެ ސުޕަމެޖޯރިޓީ އޮންނަ އެމްޑީޕީގައި ނުރަސްމީކޮށް އުފެދިފައިވާ ދެ "ފެކްޝަނު"ގެ ތެރެއިން ރައްޔިތުންގެ މަޖިލީހުގެ ރައީސް މުހައްމަދު ނަޝީދަށް ތާއީދުކުރައްވާ މެމްބަރުންނެވެ.
ހުޅުދޫ ދާއިރާގެ މެމްބަރު އިލްޔާސް ލަބީބާއި މެދު ހެންވޭރު ދާއިރާގެ މެމްބަރު އަލީ އާޒިމާއި މާފަންނު އުތުރު ދާއިރާގެ މެމްބަރު އިމްތިޔާޒް ފަހުމީ އާއި އުނގޫފާރު ދާއިރާގެ މެމްބަރު މުހައްމަދު ވަހީދު ވެސް ބަޖެޓަށާއި ބަޖެޓާ ގުޅުވައި ސަރުކާރަށް ވެސް މިއަދު ވަރަށް ބޮޑަށް ފާޑުވިދާޅުވި އެވެ.
ހުޅުދޫ ދާއިރާގެ މެމްބަރު އިލްޔާސް ލަބީބު ވިދާޅުވީ ބަޖެޓަކީ ކޮންމެ ގައުމެއްގައި ވެސް ރައްޔިތުން ވަރަށް ބޮޑަށް އުއްމީދުކުރާ އެއްޗެއް ކަމަށާއި އެެއީ އެމީހުން ދިރިއުޅުމަށް އެ ބަޖެޓްގެ ސަބަބުން އަންނާނީ ކޮން ހެޔޮ ބަދަލެއްތޯ ބަލަން ބޭނުންވާތީ ކަމަށެވެ. އޭނާ ވިދާޅުވީ އެހެން ނަމަވެސް އެފަދަ ބަދަލެއް މި ބަޖެޓުން އަންނާނެ ކަމަށް އޭނާ ވާހަކަ ދެއްކެވި ރައްޔިތުން އުއްމީދުނުކުރާ ކަަމަށެވެ.
ހުޅުދޫ ދާއިރާގެ މެމްބަރު އިލްޔާސް ލަބީބު މަޖިލީހުގެ ޖަލްސާއެއްގައި ވާހަކަދައްކަވަނީ. އަންނަ އަހަރަށް ލަފާކުރާ ބަޖެޓަށް ވަރަށް ބޮޑަށް ފާޑުވިދާޅުވި .
"ހަމަ ގައިމު ވެސް ދިވެހި ރައްޔިތުންނަށް މި އުއްމީދެއް އަދި ބުނެދެވުނު ކަމަކަށް އަޅުގަނޑަކަށް ގަބޫލެއް ނުކުރެެވޭ،" އިލްޔާސް ވިދާޅުވި އެވެ.
ބޭރުން ހިލޭ އެހީގެ ގޮތުގައި ހޯދާނެ ކަމަށް ބަޖެޓްގައި ބޮޑު އަދަދެއް ޖަހާފައި ވިޔަސް، އެ އަދަދަށް ފައިސާ ހޯދޭނެ ކަމަށް ގަބޫލުނުކުރައްވާ ކަމަށް ވެސް އޭނާ ވިދާޅުވި އެވެ. އެއީ މިދިޔަ ފަސް އަހަރު ދުވަހު ވެސް ބޭރުން ހޯދަން ބަޖެޓްގައި ޖެހި ފައިސާގެ ތެރެއިން ހޯދިފައި ވަނީ އެންމެ 50 ޕަސެންޓް ކަމަށް ވާތީ ކަމަށް ވެސް އޭނާ ވިދާޅުވި އެވެ.
"މި ހިނގާ އަހަރުގެ ބަޖެޓް، މިދިޔަ އަހަރު އަޅުގަނޑުމެން ފާސްކުރި އިރު ހިލޭ އެހީގެ ގޮތުގައި 3.2 ބިލިޔަން ރުފިޔާ ލިބޭނެ ކަމަށް އަޅުގަނޑުމެން ބަޖެޓްކޮށްފައި ވޭ، އެހެން ނަމަވެސް މި ބަޖެޓް މިއަހަރު މިހާ ހިސާބަށް އައިސްގެން އަޅުގަނޑު ބަލައިލިއިރު 600 މިލިޔަން ރުފިޔާ ލިބުނީ. ދެން ކިހިނެތްތޯ މިއަހަރު އަނެއްކާ 2.5 ބިލިޔަން ރުފިޔާ ލިބޭނެ ކަމަށް އަޅުގަނޑުމެން އަންދާޒާކޮށްފައި އެ އަދަދު ލިބޭނެކަމަށް އަޅުގަނޑުމެން ގަބޫލުކުރަނީޫ،" އިލްޔާސް ވިދާޅުވި އެވެ.
އުނގޫފާރު ދާއިރާގެ މެމްބަރު މުހައްމަދު ވަހީދު (ވައްޑެ) ވިދާޅުވީ ބަޖެޓް ކިތަންމެ ބޮޑު ވިޔަސް، ރައްޔިތެއްގެ ދިރިއުޅުމަށް ވާނެ ފައިދާއެއް ބަޖެޓުން ފެންނަ ނެތް ކަމަށެވެ.
ހުޅުދޫ ދާއިރާގެ މެމްބަރު އިލްޔާސް ލަބީބު މަޖިލީހުގެ ޖަލްސާއެއްގައި ވާހަކަދައްކަވަނީ. އަންނަ އަހަރަށް ލަފާކުރާ ބަޖެޓަށް ވަރަށް ބޮޑަށް ފާޑުވިދާޅުވި .
"އަޅުގަނޑަކަށް މީގެ އަދަދު ބޮޑުވިޔަސް، 42 ބިލިޔަން ފަސްދީ ދިޔައިރުގައި ވެސް އަޅުގަނޑަކަށް ނުފެނޭ މިއާ އެކީގައި ރައްޔިތެއްގެ ދިރިއުޅުމަށް ލިބުނު ތަސައްލީއެއް، ލިބުނު ފައިދާއެއް, މަންފާއެއް، ދަރައި ވިކުން ފިޔަވައި،" ވަހީދު ވިދާޅުވި އެވެ.
މިހިނގަމުންދާ އަހަރުގެ ބަޖެޓަށް ވުރެ އިތުރަށް ސަރުކާރުން ހަރަދުކޮށްފަައިވާ ފަައިސާ އަންނަ އަހަރުގެ ބަޖެޓްގައި ޖަހާފައި އޮތުމުން އެކަމށް ވެސް އޭނާ ވަރަށް ބޮޑަށް ފާޑުވިދާޅުވި އެވެ. އެއީ އޭނާ ވިދާޅުވި ގޮތުގައި މާލިއްޔަތު ގާނޫނާ ހިލާފަށް ކޮށްފައިވާ ކަމެކެވެ.
"މަދަކަ ބައިވަރެއް ނޫން އިއްޒަތްތެރި ރައީސް, 5.8 ބިލިޔަން ރުފިޔާ" ވަހީދު ވިދާޅުވި އެވެ.
މާފަންނު އުތުރު ދާއިރާގެ މެމްބަރު އިމްތިޔާޒް ފަހުމީ ވިދާޅުވީ ފޮނި އުންމީދުތަކަކާއެކު ފާސްކުރި ނަމަވެސް އަހަރު ނިމޭއިރު ބަޖެޓު ވެގެން ދަނީ ހަގީގަތާ ދުރު އެއްޗަކަށް ކަމަށެވެ.
އިމްތިޔާޒް ވިދާޅުވީ އަހަރުން އަހަރަށް ބަޖެޓު ބޮޑުވިނަމަވެސް ރައްޔިތުން ވަނީ އިތުރަށް ނިކަމެތި ކަމަށާއި ބަޖެޓު ހޭދަކުރަނީ ގާތް މީހުންނަށް ކަންކަން ކޮށްދިނުމަށް ކަމަށެވެ.
"ބަޖެޓުން ހޯދައިދޭ ހައްލަކީ ކޮބައިތޯ، ޑަސްޓްބިން އެބަ ކައި ޒުވާނުން، އަޅުގަނޑަކަށް ނުފެނޭ މިކަމެއް، ބަޖެޓުގެ އަދަދު ހެސްކިޔާފައި ބޮޑުކޮށް ޖަހަމުން އެބަދޭ،" އިމްތިޔާޒް ވިދާޅުވި އެވެ.
އިމްތިޔާޒް ވިދާޅުވީ ބަޖެޓުގެ ޒަރީއާއިން ވިޔަސް އަދި އެހެނިހެން ގޮތަކުން ވެސް ގައުމެއްގެ މީހުންގެ ދިރިއުޅުމުގެ ހާލަތު ރަނގަޅު ކުރެވޭނީ އެ ތަނެއްގައި ކޮރަޕްޝަން ހުއްޓުވައިގެން ނަމަވެސް އެކަމަށް މަސައްކަތް ކުރަމުން ނުދާ ކަމަށެވެ.
މިއީ ކޮރަޕްޝަންގެ ވާހަކަ ލަފުޒަކުން ބުނެލައިގެން ވާނޭ ކަމެއް ނޫން ކަމަށް ވެސް އޭނާ ވިދާޅުވި އެވެ.
