ރައީސް އިބްރާހިމް މުހައްމަދު ސޯލިހުގެ ސަރުކާރުން ކުރަމުން އަންނަނީ ވެރިކަމެއް ނޫން ކަމަށާއި ހިންގަމުން އަންނަނީ ވައްކަމާއި ހިޔާނާތް ކަމަށް ވިދާޅުވެ މާފަންނު އުތުރު ދާއިރާގެ މެންބަރު އިމްތިޔާޒް ފަހުމީ ސަރުކާރަށް ގިނަ ތުހުމަތުތަކެއް ކުރައްވައިފި އެވެ.
މިހާރު މަޖިލީހުގައި ކުރިއަށްދާ ބަޖެޓު ބަހުސްގައި ވާހަކަ ދައްކަވަމުން އިމްތިޔާޒް ވިދާޅުވީ ފޮނި އުންމީދުތަކަކާއެކު ފާސްކުރި ނަމަވެސް އަހަރު ނިމޭއިރު ބަޖެޓު ވެގެން ދަނީ ހަގީގަތާ ދުރު އެއްޗަކަށް ކަމަށެވެ.
އިމްތިޔާޒް ވިދާޅުވީ އަހަރުން އަހަރަށް ބަޖެޓު ބޮޑުވިނަމަވެސް ރައްޔިތުން ވަނީ އިތުރަށް ނިކަމެތި ކަމަށާއި ބަޖެޓު ހޭދަކުރަނީ ގާތް މީހުންނަށް ކަންކަން ކޮށްދިނުމަށް ކަމަށެވެ.
"ބަޖެޓުން ހޯދައިދޭ ހައްލަކީ ކޮބައިތޯ، ޑަސްޓްބިން އެބަ ކައި ޒުވާނުން، އަޅުގަނޑަކަށް ނުފެނޭ މިކަމެއް، ބަޖެޓުގެ އަދަދު ހެސްކިޔާފައި ބޮޑުކޮށް ޖަހަމުން އެބަދޭ،" އިމްތިޔާޒް ވިދާޅުވި އެވެ.
އިމްތިޔާޒް ވިދާޅުވީ ބަޖެޓުގެ ޒަރީއާއިން ވިޔަސް އަދި އެހެނިހެން ގޮތަކުން ވެސް ގައުމެއްގެ މީހުންގެ ދިރިއުޅުމުގެ ހާލަތު ރަނގަޅު ކުރެވޭނީ އެ ތަނެއްގައި ކޮރަޕްޝަން ހުއްޓުވައިގެން ނަމަވެސް އެކަމަށް މަސައްކަތް ކުރަމުން ނުދާ ކަމަށެވެ.
މިއީ ކޮރަޕްޝަންގެ ވާހަކަ ލަފުޒަކުން ބުނެލައިގެން ވާނޭ ކަމެއް ނޫން ކަމަށް ވެސް އޭނާ ވިދާޅުވި އެވެ.
އިމްތިޔާޒް އިތުރަށް ވިދާޅުވީ ކޮރަޕްޝަން އިންޑެކްސްގައި ރާއްޖެ ދަނީ އަހަރަކަށް ވުރެ އަހަރެއް ދަށަށް ކަމަށާއި އެންމެ ފަހުގެ ރޭންކިންގައި ވެސް 10 ދަރަޖަ ދަށް ވެފައިވާ ކަމަށެވެ.
ސަރުކާރަށް ވަރަށް ބޮޑަށް ފާޑުވިދާޅުވަމުން އޭނާ އިތުރަށް ވިދާޅުވީ ކޮރަޕްޝަނަށް ދެނީ ޒީރޯ ޓޮލަރެންސް ކަމަށް ބުނެ މޮޅެތި ވާހަކަ ދެއްކިނަމަވެސް މަންޒަރު ފެންނަނީ އެހެން ނޫން ކަމަށެވެ.
"ޒީރޯ ޓޮލަރެންސްގެ ބުރަދަނަކީ މިހާރު ޒީރޯ، ދެރަ މައްސަލައެއް، އެމްއެމްޕީއާރްސީގެ 3.2 ބިލިއަނުގެ ހިޔާނާތުގެ މައްސަލަ ބެލުމުގައި ޒީރޯ، ޒީރޯ އިނގޭތޯ އިއްޒަތްތެރި ރައީސް، މިއީ މި ސަރުކާރު އައި ފަހުން ފާޅުގައި ފެންނަން އޮތް ބޮޑު ހަގީގަތެއް، ވެންޓިލޭޓަރުގެ ބޮޑު ހިޔާނާތް، އެ މައްސަލަ ބެލުމުގައި ވެސް ޒީރޯ،" އިންތި ވިދާޅުވި އެވެ.
މިކަން މިގޮތަށް ހިންގުމަށް ޓަކައި, އެ ވާހަކަ އެންމެ ގަދައަށް ދައްކަވާ މަޖިލީހުގެ ރައީސް މުހައްމަދު ނަޝީދު ވެސް ސަރުކާރުގެ ރޭވުމުގެ މަތީން ބާކީކޮށް، ފުރައްސާރަ ކުރަމުން އަންނަ ކަމަށް ވެސް އޭނާ ވިދާޅުވި އެވެ.
"އަޅުގަނޑުމެން މި ޕާޓީގައި ތިބިހާ ރަނގަޅު ބަޔަކު އެކަހެރިކޮށްފައި މި ކުރަނީ ވެރިކަމެއް ނޫން، މި ކުރަނީ އެހެން ކަމެއް، ވެރިކަމެއް ނޫން މި ކުރަނީ، ލިބޭ ފުރުސަތެއްގެ ބޭނުން ހިފާލަނީ، ހިޔާނާތް ވަނީ، ވައްކަން ކުރުމަށް މި ފުރުސަތުގެ ބޭނުން ހިފަމުން މިދަނީ،" ވަރަށް ހިތްހަމަނުޖެހިވަޑައިގެން އިމްތިޔާޒް ވިދާޅުވި އެވެ.
މި ބަޖެޓުން ދިވެހި ރައްޔިތުންނަށް އެއްވެސް އުފަލެއް އަދި އުންމީދެއް ވެސް ނެތް ކަމަށް ވެސް އޭނާ ވިދާޅުވި އެވެ.
