އއ. ފެރިދޫ ކައުންސިލުގެ ހުރިހާ މެމްބަރުން މިއަދު ވެރިކަން ކުރާ މޯލްޑިވިއަން ޑިމޮކްރަޓިކް ޕާޓީ (އެމްޑީޕީ) އަށް ސޮއިކޮށްފި އެވެ.
އެމްޑީޕީގެ އޮފީހުގައި މިއަދު އެ މެމްބަރުންގެ މެމްބާޝިޕް ފޯމުތަކާ ހަވާލުވެވަޑައިގަތީ އެ ޕާޓީގެ ޗެއާޕާސަން އަދި އިކޮނޮމިކް މިނިސްޓަރުކަން ވެސް ކުރައްވާ ފައްޔާޒު އިސްމާއީލް އެވެ. އޭނާއާ އެކު ފެރިދޫ ހިމެނޭ މަތިވެރި ދާއިރާގެ މަޖިލިސް މެމްބަރު ހަސަން ޒަރީރު ވެސް ހުންނެވި އެވެ.
އެ ފޯމުތަކާ އެކު ފެރިދޫން އެމްޑީޕީއާ އަލަށް ގުޅުނު 50 މީހެއްގެ ފޯމު ވެސް ވަނީ ފައްޔާޒުއާ ހަވާލުކޮށްފަ އެވެ.
ރައީސް އިބްރާހިމް މުހައްމަދު ސޯލިހު މިއަދު ވަނީ ފެރިދޫ ކައުންސިލްގެ މެމްބަރުންނާ މުލިއާގޭގައި ބައްދަލު ކުރައްވައިފަ އެވެ.
އާބާދީގައި 800 މީހުން ދިރިއުޅޭ ފެރިދޫގައި އެމްޑީޕީގެ މި ސަރުކާރުން އަންނަނީ ނުވަ ޕްރޮޖެކްޓެއް ހިންގަމުންނެވެ.
އަންނަ އަހަރުގެ ރިޔާސީ އިންތިހާބަށް ޕާޓީތަކުން ތައްޔާރީތައް ފަށާފައިވާއިރު މެމްބާޝިޕް އިތުރު ކުރުމަށް ވެސް ގިނަ ކަންތައްތަކެއް ދަނީ ކުރަމުންނެވެ. ރިޔާސީ ޕްރައިމަރީއަކަށް ތައްޔާރުވަމުން އަންނަ އެމްޑީޕީގެ ސިޔާސީ ހަރަކާތްތައް ވެސް ފާއިތުވެދިޔަ ދުވަސްތަކުގެ ތެރޭ ވަނީ އިތުރުވެފަ އެވެ.
އެގޮތުން، އެ ޕާޓީގެ ކުރީގެ ޗެއާޕާސަން އަދި ރައްޔިތުންގެ މަޖިލީހުގެ ނައިބު ރައީސްކަން ވެސް ކުރިން ކުރެއްވި މޫސާ މަނިކު (ރީކޯ މޫސަ) ވެސް ވަނީ އަލުން އަނބުރާ އެ ޕާޓީއާ ގުޅިވަޑައިގެންފަ އެވެ.
