ކޯޓުގައި ކުރިއަށް ދިޔަ މައްސަލައެއްގައި ހުކުމް ކުރުމުގައި ދައުވާ ކުރި ފަރާތަށް ނަހަމަ ފައިދާ ލިބުނު ކަން ސާބިތުވެ، ނ. ޅޮހީ މެޖިސްޓްރޭޓު ކޯޓުގެ އިސްމެޖިސްޓްރޭޓުގެ މައްޗަށް ސުލޫކީ ފިޔަވަޅު އަޅަން ޖުޑީޝަލް ސާވިސް ކޮމިޝަނުން ނިންމައިފި އެވެ.
އެ ކޯޓުގެ އިސްމެޖިސްޓްރޭޓު އަހުމަދު ހަސަންމަނިކާ ގުޅޭ ގޮތުން ޖޭއެސްސީއަށް ހުށަހެޅުނީ މަނަދޫ މެޖިސްޓްރޭޓް ކޯޓުން ކުރިއަށް ގެންދިޔަ ހަޟާނަތާ ގުޅޭ މައްސަލައެއްގައި ހުކުމް ކުރި ގޮތާ މެދުގަ އެވެ.
އެ މައްސަލައިގައި ދައުވާ ކުރާ ފަރާތުގެ އެދުމަށް ނެރުނު ވަގުތީ އަމުރެއްގެ ދަށުން، ދައުވާ ލިބޭ ފަރާތުގެ ބެލުމުގެ ދަށުގައި ހުރި ކުއްޖަކު ދައުވާ ކުރާ ފަރާތުގެ ބެލުމުގެ ދަށަށް ގެންދެވި، ދައުވާ ކުރާ ފަރާތުން ދައުވާ ކުރި ބޭނުން ހާސިލްވެފައި ވަނިކޮށް، ކޯޓުގެ ހުއްދަ ހޯދުމަކާ ނުލައި ދައުވާ ކުރާ ފަރާތް ރަށުން ފުރައިގެން ގޮސްފައިވާ ކަމަށް ޖޭއެސްސީން ބުނެފައިވެ އެވެ.
އަދި، އެކަމުގެ ސަބަބުން ދީފައިވާ އެޑްރެހަށް ޗިޓް ރައްދުކުރެވިފައި ނުވާތީކަމަށް ބުނެ، ހުކުމް ކޮށްފައިވަނީ ދައުވާ ލިބޭ ފަރާތުގެ ބަހެއް ހޯދުމެއް ނެތި އަދި ކޯޓުން އަޅާފައިވާ ފިޔަވަޅުތަކުގެ ސަބަބުން ނުކުމެފައިވާ ނަތީޖާތަކަށް ބެލުމެއްނެތި އަދި ހަވާލާދެވުނު ވަގުތީ އަމުރު ދިވެހިރާއްޖޭގެ ހައިކޯޓުން ބާތިލްކޮށްފައި ވިޔަސް އެކަމަށް ވެސް ރިއާޔަތްކުރުމެއް ނެތި ކަމަށް ވެސް ބުނެފައިވެ އެވެ.
މި މައްސަލައިގައި ދައުވާ ކުރާ ފަރާތަށް ނަހަމަ ފައިދާ ލިބުނު ކަން ސާބިތުވެފައިވުމާ އެކު، ޖޭއެސްސީން ނިންމީ އިސް މެޖިސްޓްރޭޓު އަހުމަދު ހަސަންމަނިކަށް ނަސޭހަތް ދިނުމާއެކު، ތަމްރީނު ޕްރޮގްރާމެއް ފުރިހަމަ ކުރުމަށެވެ.
