ރާއްޖޭގެ ފުރަތަމަ ޕުރިއަމް ފެން، ބިއްލޫރި ފުޅީގައި ބަންދުކޮށް އެމްޑަބްލިއުއެސްސީން ބާޒާރަށް ނެރެން ފަށައިފި އެވެ.
"އާރޯ" ގެ ނަމުން ނަން ދީފައިވާ މި ފެން ބިއްލޫރި ފުޅީގައި ބަންދުކުރުމުގެ ބޭނުމަކީ އެއްފަހަރު ބޭނުންކޮށްފައި އުކާލާ ޕުލާސްޓިކު މަދު ކުރުމަށް ކުރަމުންދާ މަސައްކަތަށް އެއްބާރުލުން ދިނުން ކަމަށް އެމްޑަބްލިއުއެސްސީން ބުނެ އެވެ. އެ ފެން ބާޒާރަށް ނެރޭނީ ފަސް ލީޓަރާއި 500 އެމްއެލް ބިއްލޫރި ފުޅީގަ އެވެ.
ކުރޮސްރޯޑްސްގައި ރޭ އެކަމަށް ހާއްސަކޮށް ބޭއްވި ހަފްލާގައި އާރޯ ބުރޭންޑު ތައާރަފުކޮށްދެއްވީ ޓުރާންސްޕޯޓު މިނިސްޓަރު އައިޝަތު ނަހުލާ އެވެ.
ސީރީޒްތަކެއްގެ ގޮތުގައި ބާޒާރަށް ނެރެން ހަމަޖެހިފައިވާ މި ފެނުގެ ފުރަތަމަ ތައާރަފު ކުރި ސީރީޒްގެ ލޭބަލުން ރަމްޒުކޮށްދެނީ ރާއްޖޭގެ ގުތުރަތީ ރީތިކަމެވެ. އެ ލޭބަލުގައި ރާއްޖޭގެ ހިތްގައިމު މަންޒަރުތައް ހިމަނައިގެން ފަރުމާކޮށްފައިވަނީ މަޝްހޫރު ކުރެހުންތެރިޔާ އަލީ ޝިހާމް އެވެ. މޯލްޑިވްސް އިން އަ ބޮޓުލްގެ ނަމުން ނަން ދީފައިވާ މި ބުރޭންޑުގެ ހުރިހާ ސީރީޒްއަކުން ވެސް ރަމްޒުކޮށްދޭނީ ދިވެހިރާއްޖެ އެވެ.
titledesc
ރޭގެ ހަފްލާގައި ވާހަކަ ދައްކަވަމުން އެމްޑަބްލިއުއެސްސީގެ މެނޭޖިން ޑިރެކްޓަރު، ހަސަން ޝާހު ވިދާޅުވީ މިއީ ރާއްޖޭގެ ރީތިކަން ފަތުރުވެރިންނަށް އިޝްތިހާރުކުރުމަށާއި، ދިވެހިންނަށް ލިބިފައިވާ ގުދުރަތީ ވެށި ދެމެހެއްޓެނިވި ގޮތެއްގައި ހިމާޔަތްކޮށް ބެލެހެއްޓުމަށް ހޭލުންތެރިކަން އުފެއްދުމަށް އެޅިގެންދިޔަ ވަރަށް މުހިއްމު ފިޔަވަޅެއް ކަމަށެވެ. އަދި އާރޯ ފެނަކީ ބޭރުގެ ފެން އުފައްދާ ކުންފުނިތަކާ ވެސް އެއްހަމައެއްގައި ފައިތިލަ ސާބިތުކޮށްލެވޭ ވަރުގެ ފެނަކަށް ވާނެ ކަމަށެވެ.
ފުޅީގައި ރާއްޖޭގެ ހާއްސަ ތިންކަމެއް ސިފަކޮށްދީފައިވޭ. ރާއްޖޭގެ ސްލޯގަން ދަ ސަނީ ސައިޑް އޮފް ލައިފް؛ ސަން، ސޭންޑް، އެންޑް ސީ." ޝާހު ވިދާޅުވިއެވެ.
އިތުރަށް އޭނާ ވިދާޅުވީ ހަލުވި ދުވެއްޔެއްގައި ރާއްޖޭގެ ފަތުރުވެރިކަން ކުރިއަރަމުންދާއިރު، އެ ސިނާއަތް ދެމެހެއްޓެނިވި ގޮތެއްގައި ކުރިއަށް ގެންދެވޭނީ މިފަދަ އުފެއްދުންތައް ބާޒާރަށް ނެރެގެން ކަމަށެވެ.
އާރޯ ފެން ގަންނަން ބޭނުންވާ ފަރާތްތަކުން 7960022 އަށް ގުޅައިގެން ނުވަތަ aro.mv އަށް ޒިޔާރަތްކޮށްލައިގެން ވެސް އޯޑަރު ކުރެވޭނެ އެވެ.
