އިދިކޮޅު ޕްރޮގްރެސިވް ޕާޓީ އޮފް މޯލްޑިވްސްއިން ބޭއްވި "އިންޑިއާ އައުޓް" ހަރަކާތެއް ކޮންޓްރޯލް ކުރުމަށް ހަރަކާތްތެރިވި ފުލުހުންގެ މައުލޫމާތު ހާމަ ކުރުމަށް އިންފޮމޭޝަން ކޮމިޝަނަރުގެ އޮފީހުން ކުރި އަމުރަށް އަމަލު ކުރުން މަޑުޖައްސާލުމަށް މިއަދު ހައި ކޯޓުން އަންގައިފި އެވެ.
ދިޔަރެސް ނޫހުގެ އިސް ފަރާތެއް ކަމަށްވާ އަހުމަަދު އަޒާން އިންފޮމޭޝަން ކޮމިޝަނަށް ހުށަހެޅި މައްސަލައިގައި އަޒާން އެދުނު މައުލޫމާތު ދިނުމަށް އެންގުމުން އެ މައްސަލަ އިސްތިއުނާފު ކުރީ ފުލުހުންގެ ފަރާތުންނެވެ.
އެ މައްސަލައިގައި ހައި ކޯޓުން މިއަދު ނެރުނު ނިންމުން ތަންފީޒު ކުރުން ފަސް ކުރުމުގެ އަމުރުގައި ބުނެފައި ވަނީ، އެ މައްސަލަ އެ ކޯޓުން ބަލައި ނިންމުމުގެ ކުރިން ހާމަ ކުރަން ބުނި ފުލުހުންގެ މައުލޫމާތު ހާމަކޮށްފި ނަމަ އެ އިދާރާއަށް އިއާދަނުކުރެވިދާނެ ގެއްލުމެއް ލިބިދާނެ ކަމަށް ކޯޓަށް ފެންނަ ކަމަށެވެ.
އިންޑިއާ ސިފައިން ރާއްޖޭގައި އެއްވެސް ސިފައެއްގައި ތިބުމާ ދެކޮޅަށް އަދި އިންޑިއާއާއެކު ދިވެހި ސަރުކާރުން ބާއްވާ ގުޅުމާ ދެކޮޅަށް އިދިކޮޅުން ހިންގާ "އިންޑިއާ އައުޓް" ކެމްޕެއިން ހުއްޓުވުމަށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ވަނީ ރިޔާސީ ގަރާރެއް ވެސް ނެރުއްވައިފަ އެވެ.
އެ ގަރާރުގެ ފަހުން، އިންޑިއާ އައުޓްގެ އެއްވެސް ހަރަކާތެއް ހިންގުމުގެ ޖާގަ ފުލުހުން ނުދެ އެވެ. އަދި ސަރުކާރުން ދަނީ، އިންޑިއާ އައުޓް ފަދަ ކެމްޕެއިނުތައް ހިންގުން މަނާ ކުރުމުގެ މަގްސަދުގައި ގާނޫނެއް ފާސްކުރުމަށް ވެސް މަސައްކަތް ކުރަމުންނެވެ.
ސަރުކާރުން ބުނަނީ އިންޑިއާ އައުޓް ހަރަކާތަކީ ދެގައުމުގެ ގުޅުން ކިލަނބުކުރުމުގެ މަގްސަދުގައި ކުރިއަށްގެންދާ ކެމްޕެއިނެއް ކަމަށެވެ.
