ޕީޕީއެމްގެ ބައެއް ދާއިރާތަކުގެ ރައީސް، ދާއިރާތަކުގެ ނައިބު ރައީސް، ދާއިރާތަކުގެ ޒުވާނުންގެ ގޮފީގެ ރައީސްގެ މަގާމު އަދި އަންހެނުންގެ ގޮފީގެ ރައީސް ހޮވުމަށް އިންތިހާބު ބޭއްވީ އިއްޔެ އެވެ.

އެ އިންތިހާބުގެ މައިގަނޑު އެއް އަމާޒަކީ 2023 ގައި ބާއްވާ ރިޔާސީ އިންތިހާބާ ހަމައަށް ޕީޕީއެމް އާއި އިދިކޮޅު ކޯލިޝަން ވަރުގަދަކޮށް، ހަރުދަނާ ކުރުމެވެ.

އިއްޔެގެ އިންތިހާބު ކުރިއަށް ދިޔަ ވަގުތު އިދިކޮޅު ކޯލިޝަންގެ ލީޑަރު، ކުރީގެ ރައީސް އަބްދުﷲ ޔާމީން ވަނީ މީޑިއާއާ ބައްދަލުކުރައްވައި އެމްޑީޕީ އަށް ބަހުގެ ހަމަލާތަކެއް ވެސް ދެއްވައިފަ އެވެ.

އެ މަނިކުފާނު ވިދާޅުވީ ޕީޕީއެމްއިން ބޭއްވި އިންތިހާބަކީ ނަމޫނާއެއް ކަމަށެވެ. އަދި ކުރިއަށް އޮތް ރިޔާސީ އިންތިހާބު ޕީޕީއެމް، ޕީއެންސީން ކާމިޔާބު ކުރާނެ ކަމަށާއި އެއީ އިންތިހާބުގައި އިންޑިއާ ބަލިކުރުން ކަމަށް ވިދާޅުވި އެވެ.

ޕީޕީއެމްގެ އެތެރޭގެ އިންތިހާބުން ދައްކުވައިދެނީ މިހާރު އޮތް ސިޔާސީ މިނިވަންކަން ކަމަށް އިކޮނޮމިކް މިނިސްޓަރު އަދި ވެރިކަންކުރާ އެމްޑީޕީގެ ޗެއާޕާސަން ފައްޔާޒު އިސްމާއީލް ވިދާޅުވީ ވެސް އިއްޔެ އެވެ.

"ސިޔާސީ މިފަދަ ހަރަކާތްތަކަށް މިއަދުގެ ރައީސް ފުލުހުން ފޮނުވައިގެން ނުހުއްޓުވާކަމީ މިހާރުއޮތް ސިޔާސީ މިނިވަންކަމުގެ ހެއްކެއް. މީގެ 5 އަހަރު ކުރިން މަންޒަރު ކިތަންމެހާވެސް ތަފާތު. ވޯޓުފޮށި ބަލާ އޭރު އައީ ފުލުހުން،" އިންތިހާބަށް މަރުހަބާ ކިޔަމުން ފައްޔާޒު ކުރެއްވި ޓްވީޓެއްގައި ވިދާޅުވި އެވެ.

ޕީޕީއެމްގެ ވެރިކަމުގައި އެމްޑީޕީން ބޭއްވި އެތެރޭގެ ބައެއް އިންތިހާބުތަކަށް ފުލުހުން ފޮނުވައިގެން ހުއްޓުވި އެވެ. އެގޮތުން، 2018 ވަނަ އަހަރު އެ ޕާޓީން ބޭއްވި ރިޔާސީ ޕްރައިމަރީގެ ވޯޓު ފޮށިތައް ގަދަކަމުން ޖަހައިގެނެ އެ އިންތިހާބަށް އޭރު ހުރަސް އެޅި އެވެ.

މުހިންމު ބައެއް ހަބަރު

• މިސްރުގައި ފަށާ އދ.ގެ ތިމާވެއްޓާއި މޫސުމީ ބަދަލުތަކާބެހޭ ކޮންފަރެންސް، ކޮންފެރެންސް އޮފް ދަ ޕާޓީޒް ނުވަތަ "ކޮޕް 27" ގައި ރައްޔިތުންގެ މަޖިލީހުގެ ރައީސް މުހައްމަދު ނަޝީދު، ސްރީ ލަންކާގެ ވަފުދުގެ މެމްބަރެއްގެ ގޮތުގައި އެ ގައުމު ތަމްސީލު ކުރެއްވުމަކީ ގާނޫނު އަސާސީއާ ހިލާފު އަމަލެއް ކަމަށް ކުރީގެ ބަންޑާރަ ނައިބު ޑރ. މުހައްމަދު މުނައްވަރު ވިދާޅުވީ އިއްޔެ އެވެ.

• އިނގިރޭސިވިލާތަށް ރާއްޖޭން އެކްސްޕޯޓުކުރާ ކަނޑުމަހުން ނަގާ ޑިއުޓީ ކުޑަކުރުމަށް އެއްބަސްވުމަކަށް އާދެވޭނެ ކަމުގެ އުންމީދު ބޮޑު ކަމަށް ފޮރިން މިނިސްޓަރު އަބްދުﷲ ޝާހިދު ވިދާޅުވި ކަމަށް ރިޕޯޓްކުރީ އިއްޔެ އެވެ.

• ރާއްޖެއަށް ޒިޔާރަތްކުރާ ފަތުރުވެރިންގެ އަތުން ނަގާ ޓޫރިޒަމް ޖީއެސްޓީ ނުވަތަ ޓީޖީއެސްޓީ ބޮޑުކުރުމުގެ ސަބަބުން ރާއްޖޭގައި ހިންގާ ގެސްޓުހައުސްތަކަށް އޮންނަ ޑިމާންޑަށް ނޭދެވޭ އަސަރު ކުރާނެ ކަމަށް ލަފާކުރެވޭ ކަމަށް ފިނޭންސް މިނިސްޓްރީން ބުނި ކަމަށް އިއްޔެ ރިޕޯޓުކުރި އެވެ.

• ފަހު ސިކުންތު ކޮޅުގެ ތެރޭގައި ޖެހި ގޯލުން 2-1 އިން މޯލްޑިވްސް ޕޯޓްސް ލިިމިޓެޑް (އެމްޕީއެލް) ބަލިކޮށް، ޓީމު ފެނަކަ އިން ކްލަބް މޯލްޑިވްސް ކަޕްގެ ޗެމްޕިއަންކަން ރޭ ހޯދި އެވެ.

ދުވަހުގެ ކޯޓޭޝަން

ލަންކާގެ ވަފުދުގައި ރައްޔިތުންގެ މަޖިލީހުގެ ރައީސް މުހައްމަދު ނަޝީދު ބައިވެރިވެވަޑައިގެންފައިވާތީ އެކަން ކުށްވެރި ކުރައްވައި ކުރީގެ ބަންޑާރަ ނައިބު ޑރ. މުހައްމަދު މުނައްވަރު ވިދާޅުވީ؛

އެއީ ދައުލަތުގެ އެއް ބާރުގެ ވެރިޔާ. ދައުލަތުން ބާރު ދީފައި، މުޅި ރައްޔިތުން ތަމްސީލު ކުރައްވާން ހުންނެވި ބޭފުޅެއް. އެހެން ގައުމެއްގެ ފަހަތު ސީޓުގައި އިންނެވުމަށް ވަޑައިނުގެންނެވޭނެ. އެއީ ގާނޫނު އަސާސީއާ ހިލާފު ކަމެއް. ލަދުވެތި ކަމެއް،"

ދުވަހުގެ ފޮޓޯ

ކްލަބް މޯލްޑިވްސް ކަޕްގެ ރޭ ބޭއްވި ފައިނަލް މެޗްގައި މޯލްޑިވްސް ޕޯޓްސް ލިިމިޓެޑް (އެމްޕީއެލް) ބަލިކޮށް، ޗެމްޕިއަންކަން ހޯދި ޓީމު ފެނަކައިގެ ކުޅުންތެރިން ޓްރޮފީއާއެކު. -- ފޮޓޯ: އަބްދުﷲ އިޔާން/އަދަދު