އިދިކޮޅު ޕްރޮގެރެސިވް ޕާޓީ އޮފް މޯލްޑިވްސް (ޕީޕީއެމް) އިން މިއަދު ބޭއްވި އެތެރޭގެ އިންތިހާބުން ދައްކުވައިދެނީ މިހާރު އޮތް ސިޔާސީ މިނިވަންކަން ކަމަށް އިކޮނޮމިކް މިނިސްޓަރު އަދި ވެރިކަންކުރާ އެމްޑީޕީގެ ޗެއާޕާސަން ފައްޔާޒު އިސްމާއީލް ވިދާޅުވެއްޖެ އެވެ.
ޕީޕީއެމްގެ ބައެއް ދާއިރާތަކުގެ ރައީސް، ދާއިރާތަކުގެ ނައިބު ރައީސް، ދާއިރާތަކުގެ ޒުވާނުންގެ ގޮފީގެ ރައީސްގެ މަގާމު އަދި އަންހެނުންގެ ގޮފީގެ ރައީސް ހޮވުމަށް މިއަދު ވަނީ އިންތިހާބު ބާއްވާފަ އެވެ. އެ އިންތިހާބުގެ ވޯޓު ފޮށިތައް މާލެ ސަރަހައްދުގެ ތިން ތަނެއްގައި ބެހެއްޓި އެވެ.
"ސިޔާސީ މިފަދަ ހަރަކާތްތަކަށް މިއަދުގެ ރައީސް ފުލުހުން ފޮނުވައިގެން ނުހުއްޓުވާކަމީ މިހާރުއޮތް ސިޔާސީ މިނިވަންކަމުގެ ހެއްކެއް. މީގެ 5 އަހަރު ކުރިން މަންޒަރު ކިތަންމެހާވެސް ތަފާތު. ވޯޓުފޮށި ބަލާ އޭރު އައީ ފުލުހުން،" މިއަދުގެ އިންތިހާބަށް މަރުހަބާ ކިޔަމުން ފައްޔާޒު ކުރެއްވި ޓްވީޓެއްގައި ވިދާޅުވި އެވެ.
ޕީޕީއެމްގެ ވެރިކަމުގައި އެމްޑީޕީން ބޭއްވި އެތެރޭގެ ބައެއް އިންތިހާބުތަކަށް ފުލުހުން ފޮނުވައިގެން ހުއްޓުވި އެވެ. އެގޮތުން، 2018 ވަނަ އަހަރު އެ ޕާޓީން ބޭއްވި ރިޔާސީ ޕްރައިމަރީގެ ވޯޓު ފޮށިތައް ގަދަކަމުން ޖަހައިގެނެ އެ އިންތިހާބަށް އޭރު ހުރަސް އެޅި އެވެ.
މިއަދު ބޭއްވީ ކިތައް ދާއިރާގެ އިންތިހާބުކަން ސާފުވެފައި ނުވާއިރު، މަގާމުތަކަށް ކުރިމަތިލީ ކިތައް ކެންޑިޑޭޓުންކަން ވެސް ސާފެއް ނުވެ އެވެ. އަދި ބަހައްޓަފައި ވަނީ ކިތައް ވޯޓު ފޮށި ކަމެއް ވެސް ސާފެއް ނޫނެވެ. އޭގެ ތަފްސީލެއް އެ ޕާޓީން މިހާތަނަށް އާންމެއް ނުކުރެ އެވެ.
