ސުޕްރީމް ކޯޓުގެ ފަނޑިޔާރުންނަށް ފާރަލި ކަމުގެ ތުހުމަތުގައި ސަސްޕެންޑްގައި މިދިޔަ ހަތް މަސް ދުވަހު ހުންނެވި އެ ކޯޓުގެ ސެކްރެޓަރީ ޖެނެރަލް ޑރ. ހުސައިން ފާއިޒް މިއަދު މަގާމުން ވަކިކޮށްފި އެވެ.
ޑިޕާޓްމަންޓް އޮފް ޖުޑީޝަލް އެޑްމިނިސްޓްރޭޝަން (ޑީޖޭއޭ) އިން ބުނި ގޮތުގައި، އެ މަގާމުން އޭނާ ވަކިކުރަން ނިންމީ، އޭނާގެ އެ އަމަލަކީ ޝަރުއީ ދާއިރާގެ މުވައްޒަފުންގެ ކޯޑް އޮފް ކޮންޑަކްޓާއި ދައުލަތުގެ ބަޖެޓުން ހަރަދުކުރުމުގެ އުސޫލުތަކާ ހިލާފް އަމަލަކަށް ވާތީ ކަމަށެވެ.
ސުޕްރީމް ކޯޓުގެ ސެކިއުރިޓީ ހަރުދަނާ ކުރުމަށް ކަމަށް ބުނެ، ފަނޑިޔާރުންނާއި މުވައްޒަފުންގެ ހަރަކާތްތަކަށް ފާރަލެވޭ ގޮތަށް އެ ކޯޓުގެ އެތެރޭގައި ސީސީޓީވީ ކެމެރާ ހަރު ކުރުމަށް ފާއިޒް ނިންމައި އެކަން ތަންފީޒުކޮށްފައިވާ ކަމަށް ޑީޖޭއޭއިން ބުނެފައިވެ އެވެ.
އަދި އޭނާގެ ކޮޓަރީގައި ކެމެރާތަކުގެ ލައިވް ފީޑް ލިބޭނެ ގޮތް ހަދައި، އޭގެ ބޭނުން އެ ގޮތުގެ މަތިން ކޮށްފައިވާކަން ތަހުގީގަށް ސާބިތުވެފައިވާ ކަމަށް ވެސް އެ ޑިޕާޓްމަންޓުން މިއަދު މީޑިއާތަކަށް ހިއްސާ ކުރި ލިޔުމުގައި ބުނެފައިވެ އެވެ.
އޭގެ އިތުރަށް، ކެމެރާ އެޅުމުގެ މަސައްކަތަށް ދެ ލައްކަ ރުފިޔާ އަށް ވުރެ ބޮޑު އަދަދެއް ހަރުދުކޮށްފައިވަނީ ދައުލަތުގެ މާލިއްޔަތު ގަވާއިދުގައި ބުނާ ގޮތަށް ސްޓޭޓްމަންޓް އޮފް ރިކުޔަމަންޓް ތައްޔާރުނުކޮށް، ސެކިއުރިޓީ ބެލެހެއްޓުމުގެ މަގުސަދާ ހިލާފަށް ކަން ވެސް ތަހުގީގަށް ސާބިތުވެފައިވާ ކަމަށް ޑީޖޭއޭން ބުނެފައިވެ އެވެ.
