އަންނަ އަހަރަށް ސަރުކާރުން ރައްޔިތުންގެ މަޖިލީހަށް ހުށަހެޅި ބަޖެޓު ބޮޑު ނަމަވެސް އެ ފައިސާ ހަރަދު ކުރާނެ ވަގުތު ސަރުކާރަށް ނުލިބޭނެ ކަމަށް ވިދާޅުވެ، ކުރީގެ ރައީސް އަބްދުﷲ ޔާމީން ސަރުކާރަށް ވަރަށް ބޮޑަށް މިރޭ ފާޑުވިދާޅުވެއްޖެ އެވެ.
އިދިކޮޅު ޕީޕީއެމްގެ ޖަގަހައިގައި ބޭއްވި ޖަލްސާއެއްގައި ވާހަކަދައްކަވަމުން ޔާމީން ވިދާޅުވީ ސަރުކާރުން ބަޖެޓުގައި ބޮޑު އަދަދުތައް ޖެހިޔަސް އެއީ ހުރި ފައިސާއެއް ނޫން ކަމަށެވެ.
"[އަންނަ އަހަރު] އެންމެ އަވަހަށް ލާރި ލިބުނަސް ލިބެން ފަށާނީ އެޕްރީލް މަހުގެ ތެރޭގައި. ދެން މީ ރިޔާސީ އިންތިހާބު އޮންނަ އަހަރު، ގާނޫނު އަސާސީ ބުނާގޮތުން ސެޕްޓެމްބަރު މަހުގެ ތެރޭގައި ހޮވިފަ ހުރި ރިޔާސީ ކެންޑިޑޭޓެއް ދައްކަން ޖެހޭނެ. ދެން އެދެމެދު އޮތް ހަތަރު މަސް ދުވަހުގެ ތެރޭގައި 42 ބިލިއަން ރުފިޔާ ހޭދަ ކުރެވޭނެ ގޮތަކީ ނެތް ގޮތެއް،" ޔާމީން ވިދާޅުވި އެވެ.
ހަތަރު މަސް ދުވަހުގެ ތެރޭގައި ޕްރޮޖެކްޓުތައް ހިންގުން ޔާމީން ސިފަ ކުރެއްވީ ނުވާނެ ކަމެއްގެ ގޮތުގަ އެވެ. އަދި އަންނަ އަހަރަށް ހުށަހެޅި ބަޖެޓަކީ ރައްޔިތުން "ގުނބޯ ހައްދަން" ހުށަހެޅި ބަޖެޓެއް ކަމަށް ވެސް އެމަނިކުފާނު ތުހުމަތު ކުރެއްވި އެވެ.
"ބަޖެޓުގެ ވާހަފުޅުދައްކަވާ ބޭފުޅުންނަށް އަޅުގަނޑު ދަންނަވާލާނެ ވާހަކައަކީ ރައްޔިތުން ގުނބޯ ހައްދަން އުޅުއްވާ އެއްޗެއް ނޫނޭ. ތި ފައިސާއަކީ ލިބޭނެ ފައިސާއެއް ނޫނޭ. ތި ފައިސާ ހޭދަ ކުރަން މި ލިބެނީ ގިނަވެގެން ހަތަރު މަސްދުވަސް. ހަތަރު މަސް ތެރޭ ތަނަކުން މުދާ އުފުއްލާވެސް ނުނިންމޭނެ،" ޔާމީން ވިދާޅުވި އެވެ.
