އެމްޑީއޭގެ ލީޑަރު އަހްމަދު ސިޔާމް މުހައްމަދާއެކު ހެދި ކޯލިޝަނުގެ ތަޖުރިބާ ހިތި ކަމަށާއި މީގެ ފަހުން އެއްވެސް އިންތިހާބެއްގައި ނ. އަތޮޅާއި ދ. އަތޮޅު އެ ޕާޓީއަށް ދޫކޮށްނުލާނެ ކަމަށް އިދިކޮޅުގެ ރިޔާސީ ކެންޑިޑޭޓު ޔާމީން އަބްދުލްގައްޔޫމް މިއަދު ވިދާޅުވެއްޖެ އެވެ.
ރިޔާސީ ކެންޑިޑޭޓުގެ ހައިސިއްޔަތުން މިހާރު ނ. އަތޮޅަށް ކުރައްވަމުން ގެންދަވާ ދަތުރުފުޅުގައި މަނަދޫއަށް ވަޑައިގެން ވާހަކަފުޅު ދައްކަވަމުން ޔާމީން ވިދާޅުވީ މީގެ ކުރިން ނ. އަތޮޅާއި ދ. އަތޮޅު އޮތީ މުޅިން ޕީޕީއެމުން ދޫކޮށްލާފައި ކަމަށެވެ.
"އެއީ އަޅުގަނޑުމެންނާއި އެމްޑީއޭއާ އޮތް ވަރުގަދަ އެގްރީމެންޓެއްގެ ދަށުން، އެހެންނަމަވެސް އެމްޑީއޭއިން ވެސް އަޅުގަނޑުމެންގެ ހައްގުތައް މި ދާއިރާތަކުގައި ހިމާޔަތްކުރުމަށް ވުރެ ބޮޑަށް މަސައްކަތް ކުރައްވާފައި އޮތީ އެމްޑީއޭ ވަރުގަދަކުރުމަށް،" ޔާމީން ވިދާޅުވި އެވެ.
ކުރިއަށް އޮތް ރިޔާސީ އިންތިހާބުގައި "އިތުރު ގޮތެއް ނެތިގެން" ބަޔަކާއެކު އެގްރީމެންޓު ހެދިކަމުގައިވީ ނަމަވެސް، ދެން ރައްޔިތުންގެ މަޖިލިސް އިންތިހާބުގައި ވެސް އަދި ކައުންސިލް ގޮނޑިއެއް ހޯދުމަށް ވެސް ކޯލިޝަން ނުހަދާނެ ކަމުގައި ޔާމީން ވިދާޅުވި އެވެ.
ސިޔާމަށް ފާޑުވިދާޅުވަމުން ޔާމީން އިތުރަށް ވިދާޅުވީ އަތޮޅު ބެލެހެއްޓުމަކީ "ގަވަރުނަރަކު ލައިގެން އެއްގޮތަކަށް ވެސް ކުރަން ހެޔޮވާވަރުގެ ކަމެއް" ނޫން ކަމަށެވެ.
"އޭގެ ހިތި އަޅުގަނޑުމެން ތަޖުރިބާ ކުރަމުން މިދަނީ،" ޔާމީން ވިދާޅުވި އެވެ.
ޔާމީން ވަނީ 19 މަޖިލީހުގައި އެމްޑީޕީއަށް ސުޕަމެޖޯރިޓީ ލިބުނީ ޖުމްހޫރީ ޕާޓީއާއި އެ ޕާޓީގެ ލީޑަރު ގާސިމް އިބްރާހިމްގެ ސަބަބުން ކަމަށް ވިދާޅުވާ ވާހަކަ ތަކުރާރު ކުރައްވާފަ އެވެ.
"އަޅުގަނޑުމެންނާއެކީ ސިޔާސީ މަސައްކަތް ކުރައްވާނެ ކަމަށް ވިދާޅުވެގެން އެތައް ވާހަަކައެއް ދައްކައިގެން އަޅުގަނޑުމެން ދާއިރާތަކެއް ދޫކޮށްލީ، އެ ދާއިރާތައް ދޫކޮށްލީމާ އޭގެ ނަތީޖާއަކަށްވީ ޖުމްހޫރީ ޕާޓީއަށް ވެސް ގޮނޑި ލިބުނީކީ ނޫން،" ޔާމީން ވިދާޅުވި އެވެ.
އެއީ "މަޖުބޫރީ ހާލަތުގައި" ކުރެއްވި ކަމެއް ނަމަވެސް އެކަން ރައްޔިތުން ބަލައިނުގަންނަ ކަމަށް ވެސް ވިދާޅުވި އެވެ.
މީގެ ކުރިން ޔާމީން ވަނީ ކުރިއަށް އޮތް ރިޔާސީ އިންތިހާބުގައި ސިޔާމާއެކު ކޯލިޝަން ހަދާފާނެ ފަދަ އިޝާރާތެއް ދެއްވާފަ އެވެ. އެގޮތުން މިދިޔަ އޮގަސްޓު މަހު ނޫސްވެރިންނާ ބައްދަލުކުރައްވައި ނޫސްވެރިއަކު ކުރި ސުވާލަކަށް ޖަވާބު ދެއްވަމުން ޔާމީން ވިދާޅުވީ އެމްޑީއޭއާ އެކު ކޯލިޝަން ހަދަންޖެހޭ ހިސާބަށް ގޮސްފިނަމަ އެކަން ނިންމާނީ އެ ޕާޓީގެ ސެނެޓުން ކަމަށެވެ.
""ސިޔާމަކީ އަޅުގަނޑުގެ ހަމަ ވަރަށް ގާތް ބޭފުޅެއް. އެހެންވީމަ ކޯލިޝަން ހަދަން ޖެހޭ ހިސާބަށް ގޮސްފި ކަމަށް ވަންޏާ އެމްޑީއޭ އަޅުގަނޑުމެން ރޫލް އައުޓެއް ނުކުރާނަން،" ޔާމީން އެއިރު ވިދާޅުވެފައިވެ އެވެ.
ޔާމީން 2013 ވަނަ އަހަރު ވެރިކަމަށް ވަޑައިގަތީ ސިޔާމާއެކު ކޯލިޝަން ހައްދަވައިގެންނެވެ. ވެރިކަން ނިމެންދެން އެ ކޯލިޝަން ދެމިއޮތް ނަމަވެސް، 2018 ވަނަ އަހަރުގެ ރިޔާސީ އިންތިހާބުގައި ކޯލިޝަން ހަދާފައިނުވެ އެވެ. އަދި އެއީ އެމްޑީއޭގެ ނިންމުމެއް ކަމަށް ޔާމީން ވަނީ ވިދާޅުވެފަ އެވެ.
