އިންތިހާބުތަކުގައި ހޯދާ ނަތީޖާތަކާ ގުޅުވައިގެން ސިޔާސީ ޕާޓީތަކަށް ދައުލަތުން ފައިސާ ދޭ ގޮތަށް ގާނޫނު އިސްލާހުކުރަން އިލެކްޝަންސް ކޮމިޝަނުން ހުށަހެޅި ހުށަހެޅުމަށް ރައްޔިތުންގެ މަޖިލީހުން އިއްޔެ ރުހުން ދީފި އެވެ.
ސިޔާސީ ޕާޓީތަކަށް މީހުން ވެއްދުމާއި ޕާޓީތަކުން މީހުން ވަކިކުރުމުގައި އަމަލު ކުރަމުން އަންނަ އުސޫލާމެދު ކަންބޮޑުވުން ފާޅުކުރައްވައި، މައްސަލައެއް ހުށަހެޅުއްވީ ރައްޔިތުންގެ މަޖިލީހުގެ ވެލިދޫ ދާއިރާގެ މެމްބަރު މުހައްމަދު އަބްދުﷲ ޝަފީގު އެވެ.
މައްސަލަ ދިރާސާކުރި އިރު މަޖިލީހުގެ މިނިވަން މުއައްސަސާތަކުގެ ކޮމިޓީން އީސީގެ މެންބަރުންނާ ބައްދަލުކޮށް މައުލޫމާތުތަކެއް ހޯދި އެވެ. ކޮމިޓީގެ ހޯދުންތަކުގެ ގޮތުގައި ރިޕޯޓުގައި ހިމަނާފައި ހުރީ އެ މައުލޫމާތެވެ.
ކޮމިޓީގެ ބައެއް ހޯދުންތައް
- ފިންގަޕްރިންޓު ވެރިފައި ކުރެވޭނެ އިންތިޒާމް އީސީގައި ނެތްކަން
- އެއް ފަހަރާ ގިނަ ފޯމުތަކެއް ހުށަހަޅައިފި ނަމަ ސައްހަކަން ކަށަވަރުކުރަން ކޮމިޓީން ޗެކްކުރަނީ 25 ޕަސެންޓް ފޯމުކަން
- ފޯމުތަކާ މެދު ސުވާލު އުފެދޭ ހާލަަތްތަކުގައި ޗެކްކުރަނީ ފޯމުތަކުގެ ދެބައިކުޅަ އެއްބައިކަން
- ސައްހަ ނޫން ފޯމަކާ ގުޅޭ ޝަކުވާއެއް ލިބިއްޖެ ނަމަ ފޯމު ހުށަހެޅި ޕާޓީއަށް އެންގުމަކާ ނުލައި، އެ ފޯމެއްގައި ހިމެނޭ މީހާ ޕާޓީން ވަކިކުރާކަން، އެހެން ނަމަވެސް އެމީހާ ކުރިން ރަޖިސްޓްރީ ވެފައި އޮތް ޕާޓީއަށް އިއާދަނުކުރާކަން.
އީސީން ހުށަހަޅާފައިވާ ހައްލުތައް
މީހުންގެ ރުހުމާ ނުލައި ސިޔާސީ ޕާޓީތަކަށް މީހުން ވައްދާ މައްސަލައިގައި އީސީން ކޮމިޓީއަށް ހުށަހަޅާފައި އޮތީ މައިގަނޑު ދެ ކަމެކެވެ. އޭގެ އެއް ކަމަކީ ޕާޓީތަކުގެ މެމްބަރުންގެ އަދަދާ ގުޅުވައިގެން ދައުލަތުން ޕާޓީތަކަށް ފައިސާ ދޫކުރުން ނިމުމަކަށް ގެނައުމެވެ. އޮޅުވާލައިގެން މީހުން ޕާޓީތަކަށް ވެއްދުން އޭރުން ނިމުމަކަށް އަންނާނެ ކަމަށް އީސީއަށް ގަބޫލުކުރެވޭ ކަމަށް އެކޮމިޝަނާ ހަވާލާދީ ރިޕޯޓުގައި ބުންޏެވެ.
ސިޔާސީ ޕާޓީތަކުގެ ގާނޫނު އޮންނަ ގޮތުން، ރައްޔިތުންގެ މަޖިލީހުން ކޮންމެ އަހަރަކަށް ލަފާކޮށް ފާސްކުރާ ބަޖެޓްގެ 0.1 ޕަސަންޓު ހާއްސަކުރަން ޖެހެނީ ސިޔާސީ ޕާޓީތަކަށެވެ. އެ ފައިސާ ދޫކުރަނީ ވެސް 10،000 މެމްބަރުންނަށް ވުރެ ގިނަ މެންބަރުން ތިބި ޕާޓީތަކަށެވެ.
ޕާޓީތަކަށް ދައުލަތުން ފައިސާ ދޫކުރާ ނަމަ، ކޮމިޝަނަށް ފެންނަ ގޮތަކީ އިންތިހާބުތަކުގައި ހޯދާ ނަތީޖާތަކާ ގުޅުވައިގެން ފައިސާ ދޫކުރާ ގޮތަށް އުސޫލު ބަދަލުކުރުމެވެ.
އެކަންތައްތައް ހިމެނޭ ގޮތުން ގާނޫނަށް ބަދަލުތައް ގެންނަން އީސީން ހުށަހެޅި އެވެ. ކޮމިޓީން ފާސްކުރީ ކޮމިޝަނުގެ އެ ހުށަހެޅުންތައް އެޓާނީ ޖެނެރަލްގެ ލަފަޔާ އެކު ބިލެއްގެ ގޮތުގައި މަޖިލީހަށް ހުށަހެޅުމަށެވެ.
އިލެކްޝަންސް ކޮމިޝަނުން ހުށަހެޅި ހުށަހެޅުންތައް ހިމަނައިގެން، ކޮމިޓީން އެ މައްސަލަ ދިރާސާކޮށް ނިންމި ގޮތުގެ ރިޕޯޓު މަޖިލީހުގެ އިއްޔެގެ ޖަލްސާގައި ފާސްކޮށްފައިވަނީ އެކަމަށް ނެގުނު ވޯޓުގައި ބައިވެރިވެވަޑައިގެންނެވި 44 މެމްބަރުންގެ އިއްތިފާގުންނެވެ.
މި އަހަރު ވެސް ހަތަރު ސިޔާސީ ޕާޓީއަކަށް ފައިސާ ދޫކޮށްފައިވެ އެވެ. އެއީ ވެރިކަން ކުރާ ކޯލިޝަންގައި ހިމެނޭ އެމްޑީޕީއާއި، އަދާލަތު ޕާޓީއާއި ޖުމްހޫރީ ޕާޓީގެ އިތުރަށް އިދިކޮޅު ޕީޕީއެމް އެވެ. ރާއްޖޭގައި 11 ސިޔާސީ ޕާޓީ ހަރަކާތްތެރިވެ އެވެ.
މި އަހަރުގެ ބަޖެޓުން ޕާޓީތަކަށް ދޫކުރި ފައިސާ
- އެމްޑީޕީ: 15.02 މިލިއަން ރުފިޔާ (54،660 މެމްބަރުން)
- ޕީޕީއެމް: 8.9 މިލިއަން ރުފިޔާ (34،237 މެންބަރުން)
- ޖޭޕީ: 5.53 މިލިއަން ރުފިޔާ (20،107 މެންބަރުން)
- އަދާލަތު ޕާޓީ: 2.9 މިލިއަން ރުފިޔާ (10،554 މެންބަރުން)
