ރާއްޖޭގެ ދެކުނުން އޮންނަ ފޯޅަވަހި (ޑިއަގޯ ގާސިއާ) ހިމެނޭ ގޮތުން ޗާގޯސް އައިލެންޑްސްގެ މިލްކުވެރިކަމާ ބެގޭ ގޮތުން ދިވެހި ސަރުކާރުން މިހާރު ގެންގުޅޭ ސްޓޭންޑުގެ ސަބަބުން ރާއްޖޭގެ ސިޔާދަތީ ބާރު ގެއްލޭނެ އެއްވެސް ކަމެއް ދިމާނުވާނެކަމުގެ ޔަގީންކަން ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހް މިރޭ ރައްޔިތުންނަށް ދެއްވައިފި އެވެ.
ރާއްޖެ އިސްލާމްވި ދުވަހުގެ މުނާސަބަތުގައި މިރޭ ބޭއްވި ޖަލްސާގައި ރައީސް ސޯލިހު ވަނީ ރާއްޖޭގެ މަސްލަހަތު ހިމާޔަތް ކުރައްވާނެކަމުގެ ޔަގީންކަން ދެއްވުމުގެ އިތުރުން އެ މައްސަލައިގައި އަމިއްލަ މަންފާއަކަށް ބައެއް ފަރާތްތަކުން ދޮގު ހަދަމުންދާ ކަމަށް ތުހުމަތު ކުރައްވައިފަ އެވެ.
"މި މައްސަލައިގައި އަޅުގަނޑުމެން މިހާރު ވެސް ދަމަހައްޓަމުން މިއަންނަނީ، މި ކަމުގައި އެންމެ ކުރިން ފެށިގެން ވެސް ދިވެހި ދައުލަތުން ދަމަހައްޓަމުން އައި، ދިވެހިރާއްޖޭގެ އެންމެ މަތީ މަސްލަހަތު ދިފާއުކުރުމުގެ ސިޔާސަތު،" ރައީސް ސޯލިހު ވިދާޅުވި އެވެ.
ޗާގޯސް މައްސަލައިގައި ވާހަކަ ދައްކަވަމުން ވެރިކަން ހިންގާ އެމްޑީޕީގެ އަދި ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވެފައި ވަނީ އެ ބިމަކީ ރާއްޖޭގެ ބިމެއް ނޫން ކަމަށް އެއްވެސް ބަޔަކަށް ނުބުނެވޭނެ ކަމަށެވެ. އަދި އެ މައްސަލައިގައި ނަޝީދަށް ތާއީދު ކުރައްވާ އެމްޑީޕީގެ މެމްބަރުން ވަނީ ވަރަށް ބޮޑަށް މަޖިލީހުގައި ސަރުކާރަށް ފާޑުވިދާޅުވެފަ އެވެ. ބެލެވޭ ގޮތުގައި ރައީސް ސޯލިހު މިރޭ ރައްދު ދެއްވީ އޭގެ ތެރެއިން ބައެއް ވާހަކަތަކަށެވެ.
"މި މައްސަލާގައި ވެސް ބަޔަކު ދަނީ ސިޔާސީ މަގުސަދެއް ހާސިލް ކުރުމަށް، ހަގީގަތް އެނގި ތިބެ، ކަނޑައެޅިގެން ދޮގު ވާހަކައެއް ފަތުރަމުން، އެފަދަ ވާހަކަތައް ފަތުރައިގެން ރައްޔިތުންގެ މެދުގައި ނަފުރަތާއި ބިރުވެރިކަން ފެތުރުމަކީ އެއަށް ވުރެ އަދި މާ ބޮޑަށް ހިތާމަ ހުރި ކަމެއް،" ރައީސް ވިދާޅުވި އެވެ.
ދާޅުވީ ދިވެހި ސަރުކާރުގެ އެންމެ ބޮޑު މަސްއޫލިއްޔަތަކީ ދިވެހިންގެ ސިޔާދަތީ ބާރު ދެމެހެއްޓުމާއި ދިވެހިން ގަބޫލު ކުރާ މާތްވެގެންވާ އިސްލާމް ދީނުގެ އަގީދާ ރައްކާތެރި ކުރުން ކަމަށެވެ.
ސަރުކާރާ ވާދަވެރި ފަރާތްތަކުން ދައްކާ ވާހަކަތައް ރައްދު ދެއްވަމުން އެމަނިކުފާނު ވިދާޅުވީ "އިސްލާމް ދީން އެންމެ ބޮޑަށް ބާރު އަޅަނީ ދެ މޫނުގެ ވެރި ބަޔަކަށް ނުވުމަށް" ކަމަށެވެ. އަދި "ދޮގު ވާހަކަތަކާއި ޔޯލަ ވާހަކަތައް" ފަތުރައިގެން ނުވާނެ ކަމަށް ރައީސް ވިދާޅުވި އެވެ.
ޗާކޯސް އައިލެންޑްސްގެ މައްސަލައަށް އިޝާރާތް ކުރައްވައި ރައީސް ވިދާޅުވީ މޮރިޝަސްއާއި ރާއްޖޭގެ ކަނޑުގެ ސަރަހައްދުން ފުށު އަރާ ސަރަހައްދު ދެބައި ކުރުމާ ގުޅޭ ގޮތުން ކުރީގެ ރައީސް މައުމޫން އަބްދުލް ގައްޔޫމްގެ ސަރުކާރުން އެއްބަސްވެފައިވާ ކަމަށެވެ.
"މި މައްސަލާގައި އެކި ސަރުކާރުތަކުން އެކި ފަރާތްތަކާ ވާހަކަ ދައްކާފައިވޭ. އެއް ބަޔަކު މޮރިޝަސްއާ އެކު، އަނެއް ސަރުކާރަކުން އިނގިރޭސިވިލާތާ އެކު ވެސް، މި ފުށުއަރާ މައްސަލަ ހައްލު ކުރުމަށް،" ރައީސް ސޯލިހް ވިދާޅުވި އެވެ.
ޗާގޮސްގެ މައްޗައް މޮރިޝަސްގެ ސިޔާދަތީ ބާރު ފޯރުވުމަށް އެ ގައުމުން ކުރަމުންދާ މަސައްކަތުގައި، ރާއްޖޭގެ ކަނޑުގެ ސަރަހައްދާއި މޮރިޝަސްއިން ވަކާލާތު ކުރާ ކަނޑުގެ ސަރަހައްދާ ފުށުއަރާ މައްސަލާގައި، ދިވެހި ސަރުކާރުން ދާދި ފަހުން ވަނީ ޗާގޮސްގެ މައްޗަށް މޮރިޝަސްގެ ބާރު އޮންނަ ކަމަށް ބުނެފަ އެވެ.
އެކަމާ ގުޅިގެން ކުރީގެ ރައީސް މުހައްމަދު ނަޝީދާއި ކުރީގެ ރައީސް އަބްދުﷲ ޔާމީން ވެސް ވަނީ ސަރުކާރުގެ އާ ސްޓޭންޑަށް ފާޑުވިދާޅުވެފަ އެވެ. އަދި ކުރީގެ ތިން ބަންޑާރަ ނައިބުން، ދިޔާނާ ސައީދާއި، އައިޝަތު އާޒިމާ ޝުކޫރާއި، މުނައްވަރު ވެސް ވަނީ ކަންބޮޑުވުން ފާޅުކުރައްވައިފަ އެވެ.
މައްސަލައިގެ ފަސްފަހަތް
މޮރިޝަސް އިން ޗާގޮސް ގެ މައްޗަށް ސިޔާދަތީ ބާރު ހޯދުމަށް އިންޓަނޭޝަނަލް ކޯޓް އޮފް ޖަސްޓިސްގައި ކުރި ދައުވާ އެގައުމާއި އެއްކޮޅަށް ނިމި 2019 ވަނަ އަހަރު އެ ކޯޓުން ވަނީ ޗާގޮސް ވީ އެންމެ އަވަހަކަށް މޮރިޝަސް އާއި ހަވާލުކުރުމަށް އިނގިރޭސިވިލާތަށް އަންގާފަ އެވެ. ނަމަވެސް މިހާތަނަށް އެ ނިންމުމަށް އިނގިރޭސިވިލާތުން އިޖާބަދީފައެއް ނުވެ އެވެ.
މީގެ ކުރިން 2019 ވަނަ އަހަރުގެ މެއި 22 ގައި ގައި އދ އިން އެ ނިންމުމަށް ތާއީދުކޮށް ހަ މަސް ދުވަހުގެ ތެރޭގައި ޗާގޮސް މޮރިޝަސް އާއި ހަވާލުކުރުމަށް 116 ގައުމުގެ ވޯޓާއި އެކު ފާސްކުރި ގަރާރުގައި ރާއްޖެއިން ވޯޓުލީ ދެކޮޅަށެވެ.
މި މައްސަލައިގައި ރާއްޖޭގެ ސްޓޭންޑް ބަދަލުވިކަން އިނގުނީ މިހާރު ކަނޑުގެ ސަރަހައްދުގެ މައްސަލައިގައި ރާއްޖެއިން މޮރިޝަސްއާ ދެކޮޅަށް ވަކާލާތުކުރައްވަމުން އެޓާނީ ޖެނެރަލް ވަނީ ރާއްޖެއިން މިހާރު ކުރިން ބުނި ގަރާރާ އެއްކޮޅަށް ވޯޓުދޭން ނިންމާފައިވާ ކަމަށް ވިދާޅުވުމުންނެވެ.
ނަމަވެސް އެ މައްސަލައިގެ ސްޓޭންޑަށް އައި ބަދަލުގެ ސަބަބުން ކަނޑުގެ ސަރަހައްދުގެ މައްސަލައިގައި ޖަވާބުދާރީވަމުން އައިސްފައިވާ އެއްވެސް ކަމަކަށް ނުވަތަ ސްޓޭންޑަށް އެއްވެސް ބަދަލެއް ނުގެންނާނެ ކަމަށް ސަރުކާރުން ވަނީ ތަކުރާރުކޮށް ވިދާޅުވެފަ އެވެ.
އޭގެ އިތުރުން، ޗާގޯސްގެ ސިޔާދަތީ ބާރު މޮރިޝަސް އަށް ލިބުމަށް ރާއްޖެއިން ތާއިދުކޮށް އެ ގައުމާއި އެއްކޮޅަށް ވޯޓުލާން ނިންމީ، ރާއްޖެއަކީ އިސްތިއުމާރުކުރުމާ ދެކޮޅު ގައުމަކަށްވެފައި ގައުމުތަކުގެ ސިޔާދަތީ ބާރު އޮތުމަށް ތާއިދުކުރާ ގައުމަކަށް ވާތީ ކަމަށްވެސް ސަރުކާރުން ވަނީ ބުނެފަ އެވެ.
