ޑޯޓްމަންޑް (އޮކްޓޫބަރު 26) - އިނގިރޭސި ޕްރިމިއާ ލީގުގައި ހޮނިހިރު ދުވަހު ލެސްޓާ ސިޓީއާ ދެކޮޅަށް ކުޅޭ މެޗަށް މެންްޗެސްޓާ ސިޓީގެ ފޯވަޑް އާލިން ބްރައުޓް ހާލަންޑް ފިޓުވާނެކަމުގެ ޔަގީންކަމެއް ނެތް ކަމަށް ސިޓީގެ ކޯޗު ޕެޕް ގާޑިއޯލާ ބުނެފި އެވެ.
ޗެމްޕިއަންސް ލީގުގައި ރޭ ސިޓީއާ ޑޯޓްމަންޑް ކުޅުނު މެޗު ލަނޑެއް ނުޖެހި އެއްވަރުވިއިރު، ހާލަންޑަށް ވަނީ އަނިޔާގެ މައްސަލައެއް ކުރިމަތިވެފަ އެވެ. މެޗުގެ ހާފް ޓައިމްގައި އޭނާ ވަނީ ބަދަލުކޮށްފަ އެވެ.
މެޗަށް ފަހު މީޑިއާއާ ވާހަކަ ދައްކަމުން ގާޑިއޯލާ ބުނީ ހާލަންޑަށް ކުރިމަތިވި އަނިޔާގެ މާބޮޑު ތަފްސީލެއް މި ވަގުތު ނެތް ކަމަށާއި ލެސްޓާ މެޗަށް ފިޓުވާނެ ކަމުގެ ޔަގީންކަން މި ވަގުތު ދެވެން ނެތް ކަމަށެެވެ.
"މެޗަށް ފަހު އޭނާ ދުވެލިއިރު ތަދުނުވާ ކަމަށް ބުނަނީ. އެކަމަކު ހިނގާބަލާ ވާ ގޮތެއް،" ގާޑިއޯލާ ބުންޏެވެ.
ގާޑިއޯލާ ބުނީ މެޗަށް ނުކުތްއިރު ވެސް ހާލަންޑް ހުރީ ހުން އައިސްފައި ކަމަށެވެ. އެހެންކަމުން، އޭނާ ދެ ވަނަ ހާފުގައި ބަދަލުކުރަން ނިންމީ މެޑިކަލް ސްޓާފުންގެ ލަފަޔާއެއްކޮށް ކަމަށެވެ. އަދި ހާފްޓައިމްގައި ބަދަލުކުރި ޔާއޯ ކަންސެލޯ ވެސް ހުރީ ހުން އައިސްފައި ކަމަށެވެ.
"މެޑިކަލް ޓީމާ ވާހަކަދެއްކުމުން އެމީހުންގެ ވެސް ކަންބޮޑުވުންތަކެއް ހުރީމަ އަހަރެން ނިންމީ އޭނާ ބަދަލުކުރަން،" ގާޑިއޯލާ ބުންޏެވެ.
މި ސީޒަނުގައި ޑޯޓްމަންޑް ދޫކޮށް ސިޓީ އަށް ބަދަލުވެފައި، މިހާތަނަށް ކުޅުނު 16 މެޗުން ހާލަންޑް ވަނީ 22 ގޯލު ޖަހައި ތިން ގޯލު ޖަހަން ފުރުސަތު ތަނަވަސްކޮށްދީފަ އެވެ.
ރޭގެ މެޗުން ލިބުނު ޕޮއިންޓާ އެކު، ސިޓީ ވަނީ ގުރޫޕްގެ އެއް ވަނަ މަގާމު ކަށަވަރުކޮށްފަ އެވެ.
