ރާއްޖޭގެ ދެކުނުގައި އޮތް ފޯޅަވަހި ހިމެނޭ ގޮތުން، ޗާގޯސް ޖަޒީރާތަކަކީ މޮރިޝަސްގެ ސިޔާދަތީ ބާރު އޮންނަ ތަނަކަށް ހަދަން އެ ގައުމުން ކުރާ މަސައްކަތަށް ސަރުކާރުން ތާއީދުކުރި ކުރުމަކީ ރާއްޖޭގެ "ކަނޑުން ބައެއް ވިއްްކައިލުން" ކަމަށް ކުރީގެ ރައީސް އަބްދުﷲ ޔާމީނު އަބްދުލް ގައްޔޫމު މިއަދު ސިފަކުރައްވައިފި އެވެ.
ނ. އަތޮޅަށް މިއަދު ފެއްޓެވި ދަތުރުފުޅުގައި އެއަތޮޅު ކެނދިކުޅުދޫގައި ސަޕޯޓަރުންނާ ބައްދަލުކުރައްވައި ޔާމީނު ވިދާޅުވީ ފޯޅަވަހި މައްސަލައިގައި ސިޔާސަތު ބަދަލުުކުރުން އެއީ ބަޔަކު ހިލޭ ކުރާ ވަރުގެ ކަމެއް ނޫން ކަމަށެވެ. އެކަމުގައި "ލާރި ނެގި ބަޔަކު ވާނީ ލާރި ނަގާފައި" ކަމަށް ވެސް އެމަނިކުފާނު ވިދާޅުވި އެވެ.
"ދިވެހިރާއްޖޭގެ ކަނޑުގެ ސަރަހައްދުން ބޮޑު ބައެއް އަޅުގަނޑު ދަންނަވާނީ ވިއްކާލާފައޭ އެ އޮތީ. އެ ލާރި ނެގި ބަޔަކު ލާރި ނަގާފައި ހުންނާނީ. އެ ގޮތަށް ގިނަ ބަޔަކު ގަބޫލުކުރަނީ. އެއީ ހިލޭ ކުރާ ވަރުކަންތައްކެއް ނޫން," ޔާމީނު ވިދާޅުވި އެވެ.
ރާއްޖޭގެ ކަނޑުގެ ސަރަހައްދުން ވިއްކައިލީ 96،000 އަކަކިލޯމީޓަރު ކަމަށް ތުހުމަތުކުރައްވައި، އެ އީ ކިހާ ބޮޑު ޖާގައެއްކަން ވެސް ސަޕޯޓަރުންނަށް އެމަނިކުފާނު ސިފަކޮށްދެއްވި އެވެ. އެއީ އެމަނިކުފާނު ވިދާޅުވި ގޮތުގައި ކެނދިކުޅުދޫގެ އެންމެ ދިގުމަގުގެ 33 ގުނަ ދިގުމިނާއި ހަމަ އެވަރުގެ ފުޅާމިން ހުންނާނެ ސަރަހައްދެކެވެ.
އެ މައްސަލައިގައި ރައީސް އިބްރާހީމް މުހައްމަދު ސޯލިހު "ރިއެކްޓް ނުކުރައްވާ" ކަމަށާއި އެހެން ނަމަވެސް މިއީ ރައްޔިތުންނަށް އޮޅުންފިލުވައިދޭން ޖެހޭ ކަމެއް ކަމަށް ވެސް ޔާމީނު ވިދާޅުވި އެވެ.
"ކީއްވެގެންތޯ އެސިޓީ [ޗާގޯސް މައްސަލައިގައި މޮރިޝަސްއަށް ތާއީދުކުރާނެ ކަމަށް ވިދާޅުވި ސިޓީ] ފޮނުވަން ޖެހުނީ އޮޅުން ފިލުވައިދޭން ޖެހޭ،" ޔާމީނު ވިދާޅުވި އެވެ.
ފޯޅަވަހި ހިމެނޭ ގޮތުން ޗާގޯސް ޖަޒީރާތަކަކީ މޮރިޝަސްގެ ސިޔާދަތީ ބާރު ހިނގާ ސަރަހައްދަކަށް ހަދަން ބައިނަލްއަގުވާމީ ކަނޑުތަކާ ބެހޭ ކޯޓުގައި އެގައުމުން ކުރާ ދައުވާގައި މޮރިޝަސްއާ އެއްކޮޅަށް ރާއްޖޭގެ ސިޔާސަތު ދީލައިނުލަން ގޮވާލައި އިދިކޮޅުން އިއްޔެ ރައްޔިތުންގެ މަޖިލީހަށް ކުއްލި މައްސަލައެއް ވެސް ހުށަހެޅި އެވެ.
ރައްޔިތުންގެ މަޖިލީހުގެ މަޑުއްވަރީ ދާއިރާގެ ޕީއެންސީ މެމްބަރު އާދަމް ޝަރީފު މަޖިލީހުގެ މިއަދުގެ ޖަލްސާއަށް ހުށަހެޅުއްވި ކުއްލި މައްސަލަ މަޖިލީހަށް ބަލައިގަތީ އެކަމަށް ނެގި ވޯޓުގައި ބައިވެރިވެވަޑައިގެންނެވި 55 މެމްބަރުންގެ ތެރެއިން 54 މެމްބަރުން ވޯޓުދެއްވައިގެންނެވެ.
އާދަމް ޝަރީފު ހުށަހެޅުއްވި ކުއްލި މައްސަލައިގައި ވިދާޅުވީ ޗާގޯސްގެ ސިޔާދަތީ ބާރު ހޯދަން މޮރިޝަސް އިން ކުރާ ދައުވާ އެގައުމާ އެއްކޮޅަށް ނިމިއްޖެ ނަމަ ރާއްޖޭގެ ކަނޑުގެ ސަރަހައްދުން ބައެއް ގެއްލޭނެ ކަމަށެވެ. އެ މައްސަލައިގައި މޮރިޝަސްއާ ދެކޮޅު ސިޔާސަތެއް ރާއްޖޭން މީގެ ކުރިން ދެމެހެއްޓީ އެ ސަބަބާ ހެދި ކަމަށް ވެސް ކުއްލި މައްސަލައިގައި އާދަމް ޝަރީފު ވިދާޅުވި އެވެ.
"...ޗާގޯސްއަކީ މޮރިޝަސްގެ ސިޔާދަތީ ބާރު ހިނގާ ތަނެއް ކަމަށް އިންޓަރނޭޝަނަލް ކޯޓް އޮފް ޖަސްޓިސް އިން ނިންމި މައްސަލައިގެ ގެއްލުން ލިބޭ އެއް ހަސްމަކީ ދިވެހިރާއްޖެކަމަށްވާއިރު، އެ ނިންމުމަކީ ރާއްޖެއަށް އިޔާދަ ނުކުރެވޭވަރުގެ ބޮޑު ގެއްލުމެއް ލިބޭގޮތަށް ނިންމާފައިވާ ނިންމުމަކަށް ވާތީވެ، ދިވެހިރައްޔިތުންގެ އެންމެ މަތީ މަސްލަހަތާ ގުޅުންހުރި އެފަދަ މައްސަލައެއްގައި ސަރުކާ ރުން ގޮތެއް ނިންމަންވާނީ ދިވެހިރާއްޖޭގެ ޖުމްހޫރިއްޔާގެ ގާނޫނުއަސާސީ ގެ (93) ވަނަ މާއްދާގެ (ހ) ގައިވާގޮތުގެމަތިން ރައްޔިތުންގެ މަޖިލީހަށް ހުށަހަޅައި، އެމަޖިލީހުން ފާސްކުރުމަށްފަހު މަޖިލީހުން ނިންމާގޮތެއްގެމަތިން (ނެވެ)،" ކުއްލި މައްްސަލައިގައި އާދަމް ޝަރީފު ވިދާޅުވި އެވެ.
