އައްޑޫގެ ދެކުނުން ރާއްޖޭގެ އިގުތިސޯދީ ސަރަހައްދު މޮރިޝަސްގެ ދަށުގައި އޮންނަ ޗާގޯސް ސަރަހައްދަށް ވަންނަ ކަމަށް މޮރިޝަސްއިން ބުނާ މައްސަލާގައި ރާއްޖެއިން ނަގާފައިވާ ސްޓޭންޑު ބަދަލު ނުވާ ކަން ސާފުކުރުމަށް ރައްޔިތުންގެ މަޖިލީހަށް ގަރާރެއް ހުށަހަޅައިފި އެވެ.
ރާއްޖޭގެ ކަނޑުގެ ސަރަހައްދުގެ ބައެއް ގެއްލުމުގެ ބިރު ހީވެފައިވާ މި ދަނޑިވަޅުގައި، ޗާގޮސްގެ މައްޗަށް އޮތް މޮރިޝަސްގެ ސިޔާދަތީ ބާރާ ބެހޭ ގޮތުން އިންޓަނޭޝަނަލް ކޯޓް އޮފް ޖަސްޓިސް (އައިސީޖޭ) އިން ނިންމާފައިވާ ނިންމުމަށް އދ ގައި ރާއްޖެއިން ވަނީ ތާއީދުކުރަން ނިންމާފަ އެވެ.
ރާއްޖެއިން އެގޮތަށް ނިންމުމުން ގިނަ ބަޔަކަށް އޮޅުން އަރައި، ރާއްޖޭގެ ކަނޑުގެ ސަރަހައްދުގެ މައްސަލާގައި ރާއްޖޭގެ ސްޓޭންޑު ބަދަލު ކުރި ކަމަށް ގަބޫލު ކުރެވި، ފާޑުކިއުންތައް ވަނީ އަމާޒުވެފަ އެވެ.
ދަނގެތީ ދާއިރާގެ މެންބަރު މުހައްމަދު ނާޒިމް ހުށަހެޅުއްވި ގަރާރުގައި ވަނީ އެޓާނީ ޖެނެރަލް އިބްރާހިމް ރިފްއަތު އިންޓަނޭޝަނަލް ކޯޓް އޮފް ޖަސްޓިސް (އައިސީޖޭ) އިން ނިންމާފައިވާ ނިންމުމަށް އދ ގައި ރާއްޖެއިން ވަނީ ތާއީދުކުރަން ނިންމާފައިވާ ކަމަށް ވިދާޅުވި ވާހަކައާ ގުޅިގެން ފުށުއެރުންތަކެއް ހުރި ކަމަށެވެ.
މި މައްސަލައިގައި ސަރުކާރުން ނިންމުން ބަދަލުކުރުމުގައި ވަށައިގެންވާ ސަބަބުތައް ދެނެގަނެ، އެ މައްސަލައިގެ ތެރެއަށް ފައިސާއާއި ނުފޫޒު ނުވަންނަ ކަމާއި ސިޔާސަތު ބަދަލުކޮށްފައިވަނީ ގާނޫނީ ތަރަހައިގެ ތެރެއިން ކަން ޔަގީން ކުރުމަށް ވެސް ގަރާރުގައި އެދިފައިވެ އެވެ.
ޗާގޮސްގެ މައްޗަށް މޮރިޝަސްގެ ސިޔާދަތީ ބާރާ ބެހޭގޮތުން ނިންމި ނިންމުމަށް ރާއްޖެއިން ތާއިދު ކުރާއިރު، ޗާގޯސްގެ މައްޗަށް ރާއްޖޭގެ ސިޔާދަތީ ބާރު އޮތް ކަމަށް އެއްވެސް އިރެއްގައި ރާއްޖެއިން ދައުވާ ނުކުރާ ކަމަށް ސަރުކާރުން މިއަދު ވަނީ ބުނެފަ އެވެ.
ރާއްޖޭގެ ދެކުނުން އޮންނަ ޗާގޮސް އައިލެންޑްސްއަކީ މޮރިޝަސްގެ ބައެއް ކަމަށް ބުނެ އެ ގައުމުން 2019 ވަނަ އަހަރު ކަނޑުގެ ގާނޫނާ ބެހޭ ބައިނަލްއަގުވާމީ ޓްރައިބިއުނަލަށް ހުށަހެޅި މައްސަލައިގައި ބުނެފައިވަނީ ރާއްޖޭގެ ކަނޑުގެ ސަރަހައްދާއި ޗާގޮސް އައިލެންޑްގެ ކަނޑުގެ ސަރަހައްދާ ފުށު އަރާ ކަމަށެވެ.
ނަމަވެސް ރާއްޖޭން ކުރިން ގަބޫލުކުރި ގޮތުގައި ޗާގޮސް އައިލެންޑްސްއަކީ އިނގިރޭސިވިލާތުގެ ބައެކެވެ. މިހާރު ވެސް އިނގިރޭސިން އެމެރިކާއަށް ކުއްޔަށް ދޫކޮށްފައިވާ ޗާގޮސް އައިލެންޑްސްގެ ޑިއެގޯ ގާސިއާގައި އެމެރިކާގެ އަސްކަރީ މަރުކަޒެއް ހުރެ އެވެ. ނަމަވެސް މި މައްސަލަ ރާއްޖެ އާ ދެކޮޅަށް ނިމިއްޖެނަމަ ރާއްޖޭގެ ކަނޑުގެ ސަރަހައްދުން ބައެއް ގެއްލިގެންދާނެ ކަމުގެ ބިރު އެބަ އޮތެވެ.
