ރާއްޖެ އާއި މޮރިޝަސްގެ ކަނޑުގެ ސަރަހައްދާ މެދު އުފެދިފައިވާ މައްސަލައިގައި ރާއްޖޭގެ ކަނޑުގެ ސަރަހައްދެއް ގެއްލުމުގެ ބިރު ބޮޑުވެ ޖުމްހުރީ ޕާޓީގެ ލީޑަރު ގާސިމް އިބްރާހިމް ކަންބޮޑުވުން ފާޅުކުރައްވައިފި އެވެ.
މި މައްސަލައިގައި ގާސިމް ވިދާޅުވީ ރާއްޖޭގެ ބިމުގެ އިތުރުން ރާއްޖޭގެ ޖައްވާއި ކަނޑުގެ ސަރަހައްދުން އެންމެ އިންޗިއެއް ވެސް ގެއްލޭކަށް ނުވަތަ ބަޔަކަށް ދޭކަށް އެއްވެސް ދިވެއްސަކު ބޭނުންނުވާނެ ކަމަށެވެ. އަދި ބައިނަލްއަގްވާމީ ގާނޫނުން ރާއްޖެއަށް ލިބިދޭ އެއްވެސް ހައްގަކުން ނެގެން އޮތް ފައިދާއެއް އެއްވެސް އިމްތިޔާޒެއް ނެތި ރައްޔިތުންގެ ރުހުމަކާ ނުލާ ދޫކޮށްލުމަކީ އެއްވެސް މީހަކަށް ކުރެވޭނެ ކަމެއް ނޫން ކަމަށާއި ރާއްޖޭގެ ގާނޫނުއަސާސީގެ ރޫހަކީ ވެސް އެއީ ކަމަށް ގާސިމް ވިދާޅުވި އެވެ.
"ދިވެހި ރާއްޖެ އާއި ޗާގޮސް (ފޯޅަވަހި) ފުށުއަރާ ކަނޑުގެ އިން ވަކިކުރުމުގެ މައްސަލައިގައި، އޮތް ހަމައެކަނި ހައްލަކީ 'އިކުޑިސްޓޭންސް' (އެއްވަރަކަށް ދެ ގައުމަށް ކަނޑުގެ ސަރަހައްދު ބަހާލުން) ގެ އުސޫލު ކަމުގައި ދެކި، ބަޔަކު ހަމަ އެދޭއިރަށް ފަސޭހަކަމާއެކު އެގޮތަކަށް ދީލައިލުމަކީ ރާއްޖެއަށް އެންމެ މަސްލަހަތު ހުރި ގޮތްކަމަށް ނުފެނެ," ސަރުކާރު ކޯލިޝަންގައި ވެސް ހިމެނިވަޑައިގަންވާ ގާސިމް ވިދާޅުވި އެވެ.
ގާސިމް އިތުރަށް ވިދާޅުވެފައިވަނީ ރާއްޖޭގެ އާބާދީގެ ބޮޑު ބައެއް ޒަމާނުއްސުރެ ކަނޑު ރޯއްޖަށް ބަރޯސާވާއިރު މިހާތަނަށް ވެސް އަދި ކުރިއަށް އޮތްތާ ވެސް އަސްކަރީ ބަނދަރެއްގެ ގޮތުގައި ފޯޅަވަހި އޮތުމުގެ ސަބަބުން އދ. ގެ ގާނޫނީ ހަމައިން ރާއްޖެއަށް އައްސޭރިން ފެށިގެން 200 މޭލު ކްލެއިމްކުރެވޭނެ ކަމަށެވެ.
"ދިވެހިން އެދެނީ ދިވެހި ސަރުކާރުން، ރާއްޖޭގެ އަންނަން އޮތް ޖީލްތަކުގެ މަސްލަހަތުގެ ހިމާޔަތުގައި ކުރެވެން އޮތް ހުރިހާ މަސައްކަތެއް ވެސް އިހްލާސްތެރިކަމާއެކު ކުރާތަން ފެނުން. ފީނެން އޮތް އެންމެ ފުނަކަށް ފީނާތަން ދެކުން. ތިމާގެ އަމިއްލަ މުދަލެކޭ ހިތައި އެހެން ބައެއްގެ މިލްކެއް 'ބޮޑުބޭބެ' ގެ އެދުމަކަށް ދޫކޮށްނުލާކަން ސާބިތުވުން," މިއަދު ކުރެއްވި ޓުވީޓެއްގައި ގާސިމް ވިދާޅުވި އެވެ.
ރާއްޖޭގެ ދެކުނުން އޮންނަ ޗާގޮސް އައިލެންޑްސްއަކީ މޮރިޝަސްގެ ބައެއް ކަމަށް ބުނެ އެ ގައުމުން 2019 ވަނަ އަހަރު ކަނޑުގެ ގާނޫނާ ބެހޭ ބައިނަލްއަގުވާމީ ޓްރައިބިއުނަލަށް ހުށަހެޅި މައްސަލައިގައި ބުނެފައިވަނީ ރާއްޖޭގެ ކަނޑުގެ ސަރަހައްދާއި ޗާގޮސް އައިލެންޑްގެ ކަނޑުގެ ސަރަހައްދާ ފުށޫ އަރާ ކަމަށެވެ.
ނަމަވެސް ރާއްޖޭން ކުރިން ގަބޫލުކުރި ގޮތުގައި ޗާގޮސް އައިލެންޑްސްއަކީ އިނގިރޭސިވިލާތުގެ ބައެކެވެ. މިހާރު ވެސް އިނގިރޭސިން އެމެރިކާއަށް ކުއްޔަށް ދޫކޮށްފައިވާ ޗާގޮސް އައިލެންޑްސްގެ ޑިއެގޯ ގާސިއާގައި އެމެރިކާގެ އަސްކަރީ މަރުކަޒެއް ހުރެ އެވެ. ނަމަވެސް މި މައްސަލަ ރާއްޖެ އާއި ދެކޮޅަށް ނިމިއްޖެނަމަ ރާއްޖޭގެ ކަނޑުގެ ސަރަހައްދުން ބައެއް ގެއްލިގެންދާނެ ކަމުގެ ބިރު އެބަ އޮތެވެ.
