ކޮވިޑުގެ ދަތިކަމުން އަރައިގަނެ އިގްތިސާދު ކުރިއަރަމުން އަންނަ މި ދަނޑިވަޅުގައި ޗައިނާގެ ފަތުރުވެރިން ރާއްޖެ އަނަން ފެށުން ވެގެންދާނީ ރާއްޖޭގެ އިގްތިސާދީ ދުވެލި ހަލުވިވެގެންދާނެ ކަމަކަށް ކަމަށް ރައީސް އިބްރާހިމް މުހައްމަދު ސޯލިހު ވިދާޅުވެއްޖެ އެވެ.
ރާއްޖެ އާއި ޗައިނާއާ ދެމެދު ޑިޕްލޮމެޓިކް ގާއިމުކުރިތާ 50 އަހަރު ފުރުމުގެ ގޮތުން ބޭއްވި ހާއްސަ ރަސްމިއްޔާތުގައި ރައީސް ސޯލިހު ވަނީ ޗައިނާ އިން ރާއްޖެއަށް އިގްތިސާދީ ގޮތުންނާއި އިޖުތިމާއީ ގޮތުން ބޮޑެތި ބަދަލުތަކެއް ގެނައުމަށް އެހީތެރިކަން ފޯރުކޮށްދީފައިވާ ކަމަށް ވިދާޅުވެ އެކަންކަމަށް ޝުކުރު އަދާކުރައްވާފަ އެވެ.
"ސިޔާސީ ގުޅުން ގާއިމުކުރުމުގެ މާ ކުރިންސުރެ ވެސް، އަޅުގަނޑުމެންގެ ދެގައުމުގެ ދެމެދުގައި ވަރަށް ގާތް ގުޅުމެއް އޮތް. ރާއްޖޭގެ ތަރައްގީގެ ދަތުރުގައި ކުރަމުންމިގެންދާ މަސައްކަތުގައި ޗައިނާގެ އެހީތެރިކަން އަބަދުވެސް ލިބެމުންދޭ. ހާއްސަކޮށް ވޭތުވެ ދިޔަ 30 އަހަރު ދުވަހުތެރޭ އަޅުގަނޑުމެންގެ ގުޅުން މިވަނީ އިތުރަށް ބަދަހިވެފަ،" ރަންޔޫބީލް ޖަލްސާގައި ވާހަކަ ދައްކަވަމުން އެމަނިކުފާނު ވިދާޅުވި އެވެ.
ރާއްޖޭގެ އިގްތިސާދުގައި ޗައިނާ އިން މުހިންމު ދައުރެއް އަދާކުރަމުން އަންނައިރު އެގައުމުގެ އެތައް ސިޓީއަކުން ރާއްޖެއަށް ގިނަ ފްލައިޓުތަކެއް ދިޔައީ ބާއްވަމުންނެވެ. އަދި، ރާއްޖޭގެ ގައުމީ އެއާލައިން، މޯލްޑިވިއަންގެ ދަތުރުތައް ވެސް އެގައުމަށް ބޭއްވި އެވެ. ނަމަވެސް، ކޮވިޑު ފެނުނު ފަހުން އެ ގައުމާއި ރާއްޖެއާ ދެމެދު ކުރަމުންދިޔަ ސީދާ ދަތުރުތައް ވަނީ ހުއްޓާލާފަ އެވެ. ކޮވިޑު ފެނުނު ފަހުން އެ ގައުމާއި ރާއްޖެއާ ދެމެދު ކުރަމުންދިޔަ ސީދާ ދަތުރުތައް ވަނީ ހުއްޓާލާފަ އެވެ.
ރާއްޖެ އާއި ޗައިނާއާ ދެމެދު ސީދާ ދަތުރުތައް އަވަސް މުސްތަގުބަލެއްގައި ފެށިގެންދާނެ ކަމަށް އުންމީދު ކުރައްވާ ކަމަށް މިއަދުގެ ޖަލްސާގައި ވާހަކަފުޅު ދައްކަމުން އެމަނިކުފާނު ވިދާޅުވި އެވެ.
"އިގްތިސާދު އަމިއްލަ ފައިމައްޗަށް ތެދުވަމުން އަންނަ މިދަނޑިވަޅުގައި، އަދި ރާއްޖެއަށް ޒިޔާރަތްކުރާ ފަތުރުވެރިންގެ އަދަދު އިތުރުވަމުން އަންނައިރު، ޗައިނާއިން އަންނަ ފަތުރުވެރިންގެ އަދަދާއެކު، ރާއްޖޭގެ އިގްތިސާދީ ދުވެލި މިހާރަށްވުރެ ހަލުވިވެގެންދާނެ،" ރައީސް ވިދާޅުވި އެވެ.
ބައިނަލްއަގްވާމީ މަޝްރަހުގައި ކަންކަން ބަދަލުވަމުންދާ ގޮތަށް ބަލާއިރު ޗައިނާގެ ދައުރު ބޮޑުވަމުންދާކަން ފާހަގަކުރައްވައި ރައީސް ސޯލިހު ވަނީ ގިނަ ގައުމުތަކަކަށް ޗައިނާގެ އެހީތެރިކަން ލިބެމުންދާ ކަމަށް ވިދާޅުވެފަ އެވެ.
"ބައިނަލްއަގުވާމީ މުޖްތަމަޢުގައި އަޅުގަނޑުމެން މަސައްކަތް ކުރަމުން މިއަންނަނީ ދޭދޭ ގައުމުތަކާ ދެމެދު ވަރަށް ގާތް ގުޅުމެއް އުފައްދަން. ބައިނަލްއަގުވާމީ މުޖްތަމަޢަށް ތަފާތު ބަދަލުތައް އަންނަ މިދަނޑިވަޅުގައި، އެކިއެކި މައިދާންތަކުގައި ޗައިނާގެ ދައުރު އަންނަނީ ކުރިއަށް ވުރެ ބޮޑަށް ފުޅާވަމުން،" ޗައިނާއާ ގުޅޭގޮތުން ރައީސް ސޯލިހުގެ ވާހަކަފުޅުގައި ވިދާޅުވި އެވެ.
އަވަސް މުސްތަގުބަލެއްގައި ޗައިނާ އާއި ރާއްޖެއާ ދެމެދު ވައިގެ ދަތުރުތައް ފެށި ޗައިނާ ރައްޔިތުން ރާއްޖެއަށް ޒިޔާރަތްކުރުމުގެ މަގުފަހިވެގެންދާނެ ކަމުގެ ސިގްނަލެއް ޗައިނާއިން ރާއްޖެއަށް ކަނޑައަޅާފައި ހުންނަވާ ސަފީރު ވާން ލިޖިން ވެސް ވަނީ ދެއްވާފަ އެވެ.
ޗައިނާގައި މިހާރު ވެސް އަމަލުކުރަމުން އަންނަނީ ޒީރޯ ކޮވިޑްގެ ސިޔާސަތަށެވެ. އެއް ކޭސް ފެނިއްޖެނަމަ ވެސް ސިޓީތަކާއި ޓައުންތައް ލޮކްޑައުންކޮށް މާސް ޓެސްޓިން ކުރިއަށްގެންދެ އެވެ. އަދި، އެ ގައުމަށް އެތެރެވުމާއި ބޭރުވުމުގައި ވެސް ހަރުކަށި ޕްރޮޓޮކޯލްތަކެއް ވަނީ އެކުލަވާލަފަ އެވެ.
ކޮވިޑް ފެނުމުގެ ކުރިން 2019 ވަނަ އަހަރު ރާއްޖެއަށް 1.7 މިލިއަން ޓޫރިސްޓުން ދަތުރުކުރި އެވެ. އޭގެ ތެރެއިން 267،875 ޓޫރިސްޓުންނަކީ ޗައިނާ ރައްޔިތުންނެވެ. އެއީ، އެ އަހަރު ރާއްޖެ އައި ޓޫރިސްޓުން 17.5 އިންސައްތަ އެވެ.
