އަންނަ އަހަރުގެ ރިޔާސީ އިންތިހާބަށް ކެމްޕޭން ކުރުމުގެ ގޮތުން ކުރީގެ ރައީސް އަބްދުﷲ ޔާމީން ދެން ވަޑައިގަތުމަށް ހަމަޖެހިފައިވަނީ ނ. އަތޮޅުގެ ބައެއް ރައްތަކަށް އަދި އައްޑޫ ސިޓީއަށް ކަމަށް އިދިކޮޅު ކޯލިޝަނުން ބުނެފި އެވެ.
މިދިޔަ ހަފުތާ ހއ. އަތޮޅަށް ކުރެއްވި ދަތުރައްފަހު އިދިކޮޅު ރިޔާސީ ކެންޑިޑޭޓު ޔާމީން ދެން ކުރައްވަން ހަމަޖެހިފައިވާ ދަތުރުތަކުގެ ތަފުސީލު މިއަދު ބޭއްވި ނޫސްވެރިންގެ ބައްދަލުވުމެއްގައި ދެއްވީ އިދިކޮޅު ކޯލިޝަންގެ ތަރުޖަމާނު ހީނާ ވަލީދު އެވެ.
ހއ. އަތޮޅަށް ޔާމީން ކުރެއްވި ދަތުރުފުޅަކީ ކާމިޔާބު ދަތުރުފުޅެއް ކަމަށާއި އެ ދަތުރުފުޅުން ރިޔާސީ މެނިފެސްޓޯ ތައްޔާރުކުރުމަށް ގިނަ މައުލޫމާތުތަކެއް ލިބިގެން ދިޔަ ކަމަށްވެސް ހީނާ ވިދާޅުވި އެވެ.
ހީނާ އިތުރަށް ވިދާޅުވީ ޔާމީން ނ. އަތޮޅަށް ވަޑައިގަތުމަށް ހަމަޖެހިފައިވަނީ މި މަހުގެ 25 އިން 28 އަށް ކަމަށެވެ. އެގޮތުން، އެ ދަތުރުފުޅުގައި ޔާމީން ނ. އަތޮޅުގެ 6 ރަށަކަށް ވަޑައިގަންނަވާނެ ކަމަށް ވިދާޅުވި އެވެ. އެ ރަށްތަކަކީ ކެނދިކުޅުދޫ، މަނަދޫ، ހޮޅުދޫ، ވެލިދޫ، މިލަދޫ އަދި މަގޫދޫ އެވެ.
މި ދަތުރުފުޅުގައި ނ، މަގޫދޫ ޑަބްލިުޑީސީ ބައި އިލެކްޝަންގައި ވާދަކުރާ ޕީޕީއެމްގެ ކެންޑިޑޭޓުގެ ކެމްޕޭން ހަރަކާތްތަކުގައިވެސް ޔާމީން ބައިވެރިވެވަޑައިގަންނަވާނެ ކަމަށް ހީނާ ވިދާޅުވި އެވެ.
އައްޑޫ ސިޓީއަށް ޔާމީން ވަޑައިގަތުމަށް ހަމަޖެހިފައިވަނީ އަންނަ މަހުގެ ތެރޭގަ އެވެ. މިވަގުތު އެ ދަތުރުފުޅުގެ ތާރީހެއްގެ ގޮތުގައި އޮތީ ނޮވެމްބަރު މަހުގެ ތިންވަނަ ދުވަސް ކަމަށާއި ނަމަވެސް އެ ތާރީހަށް ބަދަލެއް އައުން އެކަށީގެންވާ ކަމަށް ހީނާ ވިދާޅުވި އެވެ.
މީގެ އިތުރުންވެސް އަންނަ މަހުގެ ތެރޭގައި ގދ. އަތޮޅު އަދި ފުވައްމުލަކަށް ޔާމީން ވަޑައިގަތުމަށް ރާވަމުންދާ ކަމަށްވެސް ހީނާ ވިދާޅުވި އެވެ.
