މިއަހަރު ކުރިއަށްގެންދާ ބޯހިމެނުމުގައި މިހާތަނަށް ރާއްޖޭގައި ދިރިއުޅޭ އާބާދީގެ ގޮތުގައި 452،495 މީހުން ގުނިއްޖެ އެވެ.
ގައުމީ ތަފާސްހިސާބު ދުވަހުގެ މުނާސަބާގައި މޯލްޑިވްސް ސްޓެޓިސްޓިކަލް ބިއުރޯއިން ބުނީ، އިއްޔެގެ ނިޔަލަށް ބޯހިމެނުމުގެ ތެރެއިން ރާއްޖޭގައި ދިރިއުޅޭ 335،331 ދިވެހިންނާއި، 97،164 ބިދޭސީން ގުނިފައިވާ ކަމަށެވެ. މިއީ 2014 ވަނަ އަހަރުގެ ބޯހިމެނުމާ އަޅާކިޔާނަމަ 50،424 މީހުންގެ އިތުރުވުމެކެވެ.
ދިވެހިންގެ އަދަދަށް ބަލާއިރު އެއީ 16،897 މީހުންގެ އިތުރުވުމެކެވެ. އަދި ބިދޭސީނަށް ބަލާއިރު 33،527 ބިދޭސީން ވަނީ އަށް އަހަރު ތެރޭ އިތުރުވެފަ އެވެ.
ސްޓެޓިސްޓިކަލް ބިއުރޯއިން ބުނީ މިހާތަނަށް ގުނިފައިވާ އާބަދީއަކީ އިދާރީ ރިކޯޑުތަކުންބަލާއިރު ރާއްޖޭގެ ރެޖިސްޓާޑް އާބާދީގެ 89 ޕަސަންޓު ކަމަށެވެ. ރާއްޖޭގެ ރެޖިސްޓާޑް އާބާދީގެ ތެރޭގައި ރާއްޖެއިން ބޭރުގައި ދިރިއުޅޭ މީހުން ވެސް ހިމެނެ އެވެ. ރާއްޖޭގެ ރެޖިސްޓާޑް އާބާދީއަކީ 397،372 މީހުންނެވެ.
ބޯހިމެނުމުގައި މިހާތަނަށް 97،000 ބިދޭސީން ގުނިފައިވާއިރު، މިއީ 2014 ވަނަ އަހަރުގެ ބޯހިމެނުމުގައި ގުނުނު އަދަދަށްވުރެ 33،527 މީހުން އިތުރު އަދަދެކެވެ. ހަމައެއާއެކު މިއީ އިމިގްރޭޝަނުގެ ރިކޯޑްތަކުން ދައްކާ ބިދޭސީންގެ އާބާދީގެ 65 ޕަސަންޓު ކަމަށް ވެސް ސްޓެޓިސްޓިކަލް ބިއުރޯއިން ބުނެ އެވެ. އިމިގްރޭޝަނުގެ ރިކޯޑުތަކުން ދައްކާ ގޮތުން ރާއްޖޭގައި 150،313 ބިދޭސީން އުޅެ އެވެ.
އެ އިދާރާއިން ބުނީ ބިދޭސީންގެ އަދަދު އިތުރަށް ފުރިހަމަ ކުރުމަށްޓަކައި ވަޒީފާތަކަށް ބިދޭސީން ގެނެސްފައިވާ އެމްޕްލޯޔަރުންނާއި ގުޅިގެން އިތުރު މަސައްކަތްތަކެއް ކުރަމުންދާ ކަމަށެވެ.
