ރާއްޖޭގެ ގަދީމީ މަސައްކަތެއް ކަމަށްވާ ރާ އެރުމުގައި 72 އަހަރަށް ވުރެ ދިގު މުއްދަތެއް ހޭދަކޮށްފައިވާ އަބްދުﷲ، 87، ގދ. ތިނަދޫ، އާރުޒޫ އަށް ޝަރަފުވެރިކަމުގެ ގައުމީ އިނާމު ސަރުކާރުން މިރޭ ދީފި އެވެ.
އާއްމު ހިދުމަތުގެ ގައުމީ އިނާމާއި ޝަރަފުވެރިކަމުގެ ގައުމީ އިނާމު ދޭން ދަރުބާރުގޭގައި މިރޭ ބޭއްވި ޖަލްސާގައި އަބްދުﷲ އަށް ޝަރަފުވެރިކަމުގެ އިނާމު ހަވާލުކޮށް ދެއްވީ ރައީސް އިބްރާހީމް މުހައްމަދު ސޯލިހެވެ. އޭނާއަށް އާއްމު ހިދުމަތުގެ ޝަރަފުވެރިކަމުގެ އިނާމު ދެއްވީ ދިވެހި ސަގާފަތާއި އާދަކާދައިގެ ދާއިރާއިންނެވެ.
އަބްދުﷲގެ ހާއްސަ ކަމަކީ މިހާ ދޮށީ އުމުރުގައި ވެސް ރާއެރުމުގެ މަސައްކަތް މެދުނުކެނޑި ކުރަމުން އައުމެވެ. އޭނާ މިހާރު ވެސް ފަސް ރުއް ރާކޮށްގެން ބަލަހައްޓަ އެވެ. އަދި އޭނާ އަންނަނީ ދިވެހި ރުކުރަލާއި ދިވެހި ހަކުރު ވިއްކައިގެން ރަނގަޅު އާމްދަނީއެއް ހޯދަމުންނެވެ.
މިދިޔަ އޭޕްރިލް މަހު، "އަދަދު" އަށް ދިން އިންޓަވިއުއެއްގައި އަބްދުﷲ ބުނެފައިވާ ގޮތުގައި އޭނާ ރާވެރިކަމުގެ މަސައްކަތް ފެށީ އުމުރުން އެންމެ 15 ވަރަަކަށް އަހަރުގަ އެވެ. އޭނާ އޭރު ބުނި ގޮތުގައި މިހާ ދިގު މުއްދަތެއްގައި މަސައްކަތް ކުރި އިރު ހަނދާނުން ނުފިލާނެ އެތައް ކަމެއް ދިމާވި އެވެ.
އެފަދަ އެއް ހާދިސާއަކީ ރާވެރިކަން ކުރަން ތިބި ފަޅުރަށަށް ބަޔަކު އަރައި ރުއްތަކުގައި ހުރިއްޔާ ހުރި އެއްޗެއް ކޮށާލައިގެން ގެންދިޔަ ފަހަރެކެވެ. އަނެއް ފަހަރަކީ ރުކުން ވެއްޓި ވަރަށް ބޮޑަށް ފައި ބިންދައިގެން ދިޔަ ފަހަރެވެ.
ރައީސް އިބްރާހިމް މުހައްމަދު ސޯލިހު ވާހަކަފުޅު ދައްކަވަމުން ވިދާޅުވި ގޮތުގައި ރާ އެރުމަކީ ގައުމިއްޔަތާ ގުޅިފައިވާ، އަދި އެކަން ކުރާ މީހުން ވަރަށް މަދުވެފައިވާ ހުނަރުވެރި މަސައްކަތެކެވެ.
