ހއ. އިހަވަންދޫގައި ހިންގަމުންދާ އައިސް ޕްލާންޓެއް ހުރިއިރު، އަދި ރަށުގެ ބަނދަރު ބޮޑުކުރުމުގެ މަޝްރޫއު ކުރިއަށް ދާއިރު، އެ މަނިކުފާނަށް ވެރިކަމުގެ ދެ ވަނަ ދައުރެއް ލިބިވަޑައިގެންފި ނަމަ އެ ރަށުގައި އައިސް ޕްލާންޓެއް އަޅައި، ބަނދަރު ބޮޑުކުރުން ކުރިއަށް ގެންދަވާނެ ކަމަށް ޕީޕީއެމްގެ ރިޔާސީ ކެންޑިޑޭޓް އަދި ކުރީގެ ރައީސް އަބްދުﷲ ޔާމީން ވިދާޅުވެއްޖެ އެވެ.
އިދިކޮޅު ރިޔާސީ ކެންޑިޑޭޓް ޔާމީން އިހަވަންދޫގައި ޖަލްސާއެއް ބޭއްވީ މިދިޔަ ހޮނިހިރު ދުވަހުގެ ރެ އެވެ. އައިސް ޕްލާންޓާއި ބަނދަރު ބޮޑުކުރުމުގެ ޕްރޮޖެކްޓުގެ ވާހަކަ ޔާމީން ދެއްކެވީ އެ މަނިކުފާނުގެ ވެރިކަމެއްގައި އިހަވަންދޫ އަށް ކޮށްދެއްވާނެ ހާއްސަ ކަންތައްތަކުގެ ތެރޭގަ އެވެ.
އިހަވަންދުއަށް ހާއްސަ ކަންތައްތަކުގެ ތެރޭގައި، އިރާދަކުރެއްވިއްޔާ ދެން އަޅުގަނޑުމެންގެ ސަރުކާރަކުން އެންމެ ފުރަތަމަ އައިސް ޕްލާންޓު އަޅާ އަދި ތެޔޮ ލިބޭނެ ގޮތް ހަދާނެ އެއް ރަށަކަށް ވާނެ އިހަވަންދޫ. އިހަވަންދޫގެ މަސްވެރިންނަށް އައިސް ލިބޭނީ ހަމަ އިހަވަންދޫ އިން، އިހަވަންދޫ މަސްވެރިން ނުޖެހޭނެ ފެލިވަރަށް ދާކަށް،" ޔާމީން ވިދާޅުވި އެވެ.
އިހަވަންދޫގައި ބޭނުންކުރާ އައިސް ޕްލާންޓް: އެއީ 2011 ވަނަ އަހަރުން ފެށިގެން ބޭނުން ކުރަމުން އަންނަ ތަނެއް -- ފޮޓޯ: ފައިލް
އިހަވަންދޫގެ ބަނދަރު ބޮޑު ކުރުމުގެ މަސައްކަތް ވެސް ކޮށްދެއްވާނެ ކަމަށް ޔާމީން ވިދާޅުވި އެވެ.
"ހަމަ އެއާއެކީ ދަންނަވާލަން ބޭނުންވަނީ އިހަވަންދޫ މަސްވެރިންގެ ފަރާތުން އައި ޝަކުވާއެއް ބަނދަރުގެ ޝަކުވާ، އިރާދަ ކުރެއްވިއްޔާ އިހަވަންދޫގެ ބަނދަރުގެ މައްސަލަ އަޅުގަނޑު ހައްލުކޮށްދޭނަން، ބަނދަރު ބޮޑުކުރުމާއެކީ،" އިހަވަންދޫގެ ރައްޔިތުންނަށް ހާއްސަކޮށް ވެދެއްވި ރިޔާސީ ވައުދުތައް ތަފުސީލުކޮށްދެއްވަމުން ޔާމީން ވިދާޅުވި އެވެ.
އިހަވަންދޫގައި އައިސް ޕްލާންޓެއް ގާއިމް ކުރީ 2011 ވަނަ އަހަރެވެ. އެއީ ދުވާލަކު 50 ޓަނުގެ އައިސް އުފައްދާ ޕްލާންޓެއް ކަމަށް ފެނަކަ ކޯޕަރޭޝަންގެ އެމްޑީ އަހުމަދު ސައީދު މުހައްމަދު "އަދަދު" އާ ވާހަކަ ދައްކަވަމުން ވިދާޅުވި އެވެ.
ކުރިން އެ އައިސް ޕްލާންޓް ހިންގީ މިފްކޯއިންނެވެ. މިހާރު ހިންގަމުންދަނީ ފެނަކަ ކޯޕަރޭޝަނުންނެވެ.
"މަސައްކަތް މި ކުރަނީ އައިސް ޕްލާންޓްގެ ސްޓޯރޭޖް ކެޕޭސިޓީ ބޮޑުކޮށް ދުވާލަކު 75 ޓަނުގެ އައިސް އުފެއްދޭ ވަރުކުރަން. އަދި ދޯނި ފަހަރާ ހަމައަށް އައިސް ގެންދެވޭ ގޮތް ހަދަން،" ސައީދު ވިދާޅުވި އެވެ.
އިހަވަންދޫގެ ބަނދަރު ބޮޑުކުރުމުގެ މަޝްރޫއު ވެސް ދަނީ ކުރިއަށެވެ. އެ ޕްރޮޖެކްޓުގެ މަސައްކަތް އޮތީ ނިންމެން ކައިރިވެފަ އެވެ.
އެމްޓީސީސީގެ ސީއީއޯ އާދަމް އާޒިމް ވިދާޅުވީ އެ ރަށުގެ ބަނދަރު ބޮޑު ކުރުމުގެ މަސައްކަތް ކުރިއަށް ގެންދަނީ ރަށުގެ ރައްޔިތުން ބޭނުންވާ ގޮތަށް ކަމަށެވެ.
"އަޅުގަނޑުމެން ތަރައްގީ ކުރަމުންދާ ބަނދަރުތަކުގެ ތެރެއިން އެންމެ ގިނަ ދުވަސްވީ އެއް ބަނދަރަކީ އިހަވަންދޫ ބަނދަރު. އެއީ އެ ބަނދަރަށް ރައްޔިތުން ބޭނުންވާ ބަދަލުތައް އެކި ފަހަރު މަތިން ނެނައުމަށް،" އާޒިމް ވިދާޅުވި އެވެ.
އިހަވަންދޫގެ ބަނދަރު: މި ބަނދަރު މިހާރު މިވަނީ ބޮޑުކޮށް ޒަމާނީ ފެންވަރަކަށް ތަރައްގީކޮށްފައި. --ފޮޓޯ: އެމްޓީސީސީ
އެމްޓީސީސީން ކުރިން ބުނެފައިވާ ގޮތުގައި އިހަވަންދޫ ބަނދަރު ތަރައްގީކުރުމުގެ މަޝްރޫއުގައި 284 މީޓަރު ބޭރުތޮށި ހެދުމާއި، 178 މީޓަރު ރިވެޓްމަންޓް ޖެހުމާއި، 120 މީޓަރ ގްރޯއިން ޖެހުމާއި، 95 މީޓަރ އެއްގަމު ތޮށި ހެދުމާއި، ޕޭވްމަންޓް ހެދުމާއި، 2 ނެރު ބައްތި ޖެހުމާއި، ބަނދަރުގައި 27 ބައްތި ޖެހުމާއި، ރޭމްޕެއް ހެދުމާއި 2 މޫރިންގ ބްލޮކްސް ބެހެއްޓުމުގެ އިތުރުން އެއްގަމު ތޮށިން ބޭރުތޮށްޓަށް އެރުމަށް ވޯކްވޭއެއް ހެދުން ހިމެނެއެވެ.
މިއީ 51 މިލިއަން ރުފިޔާގެ މަޝްރޫއު އެކެވެ.
ބަނދަރު ބޮޑުކުރުމުގެ މަޝްރޫއުގެ އިތުރުން އިހަވަންދޫގެ ބިން ހިއްކުން ވެސް ކުރިއަށް ދާ ކަމަށާއި އެ ރަށަށް 25 ހެކްޓަރުގެ ބިން ބޮޑުވެގެން ދާނެ ކަމަށް އާޒިމް ވިދާޅުވި އެވެ.
