ސަރުކާރުގެ އިގުތިސާދީ ސިޔާސަތަށާއި، އިގުތިސާދާ ބެހޭ ގޮތުން ފިނޭންސް މިނިސްޓަރު އިބްރާހީމް އަމީރު ދައްކަވާ ވާހަކަތަކަށް ކުރީގެ ރައީސް އަބްދުﷲ ޔާމީނު މިރޭ ވަރަށް ބޮޑަށް ފާޑުވިދާޅުވެއްޖެ އެވެ.
އަންނަ އަހަރު ރާއްޖޭގައި ބާއްވާ ރިޔާސީ އިންތިހާބުގައި ތާއީދު ހޯދަން، ޕީޕީއެމްޕީއެންސީން ތިލަދުންމަތީގެ ރަށްތަކަށް ކުރާ ދަތުރުގައި ހއ. ދިއްދޫގައި މިރޭ ބޭއްވި ޖަލްސާއެއްގައި ޔާމީން ވިދާޅުވީ އިގުތިސާދު ކުރިއަށް ދާ ކަމަށް ވިދާޅުވެ، ފިނޭންސް މިނިސްޓަރު އިބްރާހީމް އަމީރު ދައްކަވާ ވާހަކަ ތަފާސް ހިސާބުން ދައްކަވަން ޖެހިވަޑައިގަންނަވާ ކަމަށެވެ. ރާއްޖޭގެ އިގުތިސާދު މިދިޔަ އަހަރު 46 ޕަސެންޓް ކުރިއަށް ދިޔަ ކަމަށް އަމީރު ވިދާޅުވި ނަމަވެސް ކުރިއަށް ދިޔައީ އަމީރު ދައްކަވާ ބޭކާރު ވާހަކަ ކަމަށް ޔާމީން ވިދާޅުވި އެވެ.
"އަމީރު ދައްކާ ވާހަކަ ސަތޭކަ ސާޅީސް ހަ ޕަސެންޓް މިއުޅެނީ ކުރިއަށް ޖެހިގެން. މީނާއަކަށް ނޭނގޭ މީނާއަށް ދެއްކޭ ވާހަކައެއް. ކީއްވެގެންތޯ ތަފާސް ހިސާބުން މި ނުދެއްކިގެން މިއުޅެނީ؟" ޔާމީން ވިދާޅުވި އެވެ.
ޔާމީން ވިދާޅުވީ އެމަނިކުފާނުގެ ވެރިކަމުގައި ރައްޔިތުންގެ ބޮލުގައި އެޅުވިކަމަށް ބުނާ ވަރުގެ ދަރަންޏެއް ނާޅުއްވާނެ ކަމަށް ރައީސް އިބްރާހީމް މުހައްމަދު ސޯލިހު ވިދާޅުވި ކަމަށެވެ. އެހެން ނަމަވެސް ސޯލިހުގެ ވެރިކަމުގެ އެންމެ ހަތަރު އަހަރުގެ ތެރޭގައި އެތައް ގުނައަކަށް އިތުރުވެފައިވާ ކަމަށް ވެސް ޔާމީން ވިދާޅުވި އެވެ.
"އަދި މިއުޅެނީ ހަތަރު އަހަރު ނުވެގެން. ހަތަރު އަހަރުގެ ތެރޭގައި މި ދަރަނި، ރައީސް ޔާމީނުގެ ސަރުކާރުގައި 80،000.ރ ބޮލަކަށް ޖެހޭ ކަމަށް ވަންޏާ މިހާރުގެ ދަރަންޏަކީ [ބޮލަކަށް] 184،000،" ޔާމީން ވިދާޅުވި އެވެ.
ދިއްދޫގައި މިރޭ އެމަނިކުފާނު އެރަށު ރައްޔިތުންނަށް ވައުދުތަކެއް ވެސް ވެވަޑައިގެންނެވި އެވެ. ރަައީސްކަމަށް އަލުން ވަޑައިގެންނެވިއްޖެ ނަަމަ އެރަށުގެ ފަޅުން ބިން ހިއްކައިގެން އެއާޕޯޓެއް އަޅުއްވައިދެއްވާނެ ކަަމަށް އެގޮތުން ވިދާޅުވި އެވެ.
ތިލަދުންމައްޗަށް ކުރައްވާ ދަތުރުފުޅުގައި ޔާމީން ވަނީ ބާރަށާއި ކެލަޔަށް ވެސް ވަޑައިގެންފަ އެވެ.
