ލާމަރުކަޒީ ގާނޫނުގެ ދަށުން ކައުންސިލުތަކުން އެކުލަވާލައި ޕްލޭނިން މިނިސްޓްރީން ފާސްކުރަން ޖެހޭ ރަށްރަށުގެ ލޭންޑް ޔޫސް ޕްލޭން މައި ސަރުކާރުން ފާސްކުރަން ނުޖެހޭ ކަމަށާއި އެމަނިކުފާނުގެ ވެރިކަމެއްގައި އެކަން އެގޮތަށް ބަދަލު ކުރައްވާނެ ކަމަށް ޕްރޮގްރެސިވް ޕާޓީ އޮފް މޯލްޑިވްސް (ޕީޕީއެމް) ގެ ރިޔާސީ ކެންޑިޑޭޓު އަދި ކުރީގެ ރައީސް އަބްދުﷲ ޔާމީން ވިދާޅުވެއްޖެ އެވެ.
ތިން މަސް ދުވަހުގެ ތެރޭގައި އެކުލަވާލަން ހަވާލުކުރި ޕްލޭނުތައް ހެދުމުގައި ދިމާވި ފަންނީ ދަތިތަކާއި ގުޅިގެން އަދިވެސް ގިނަ ކައުންސިލުތަކަށް އެ ޕްލޭނުތައް ހުށަހެޅިފައެއް ނުވެ އެވެ. އެކަމާއި ގުޅިގެން ސަރުކާރަށް ފާޑުކިޔުންތައް ވެސް ވަނީ އަމާޒުވެފަ އެވެ.
"އަޅުގަނޑު ވެސް މި ލޯކަލް ކައުންސިލުތައް ހިނގާ ގޮތް ދެ ދައުރެއްގައި އިހުސާސްކޮށްފިން، ތަޖުރިބާކޮށްފިން. އަޅުގަނޑަކަށް ގަބޫލެއް ނުކުރެވޭ މިހާރު އޮތް ގޮތަށް އޮވެގެން މިކަން ހިންގޭނެ ކަމަކަށް. މިހާރު އޮތް ގޮތަށް އޮވެގެން އެއްވެސް ރަށެއްގެ ރައްޔިތުން ބޭނުންވާ އަދި އިގްތިސާދި މަންފާއެއް ހޯދުމަށް ސިނާއީ މަސައްކަތް ކުރުމަށް ބިން ދެވޭނެ ގޮތެއް ނޯވޭ،" ލާމަރުކަޒީ ނިޒާމާ ގުޅޭގޮތުން ވާހަކަފުޅު ދައްކަވަމުން މިރޭ ހއ. ކެލާގައި ބޭއްވި ޖަލްސާގައި ޔާމީން ވިދާޅުވި އެވެ.
ލޭންޑް ޔޫސް ޕްލޭނު ހަދައިގެން ސަރުކާރާ ހަމައަށް ދިޔުމުން އެކަން ކޮށްދޭން ބޭނުން ނުވާނަމަ އެ ހިސާބުން ޕްލޭނު "ބޮޑު ފޮއްޓަށް ލެވި ނިމުނީ" ކަމަށް ޔާމީން ވިދާޅުވި އެވެ.
"ކީއްކުރަންތޯ ކޮންމެހެން ލޭންޑްޔޫސް ޕްލޭން ހަދަންވީ. ލޭންޑް ޔޫސް ޕްލޭން ހަދައިގެން ފާސްކުރާނެ ކަމެއް ނެތް. އަޅުގަނޑު ގަބޫލުކުރާ ގޮތަކީ މިއީ. އަޅުގަނޑުމެންގެ ސަރުކާރެއްގައި މިކަން ކައުންސިލުތަކަށް ނޫނިއްޔާ ރައްޔިތުން ބާރުވެރިކުރުވުމަށް އެ ޕްލޭނަކީ އެއްގޮތަކަށް ވެސް މައި ސަރުކާރުން ފާސްކުރަން ޖެހޭ އެއްޗެއްގެ ގޮތުގައި މިހާރު އޮތް އޮތުން ނައްތާލާނަން،" އެމަނިކުފާނު ވައުދުވެ ވަޑައިގަތެވެ.
ބިން ބޭނުންކުރަންވާ ގޮތް ނިންމާނީ އެ ރަށެއްގެ ރައްޔިތުން ކަމަށާއި އެމަނިކުފާނުގެ ވެރިކަމުގައި ލޭންޑް ޔޫސް ޕްލޭނުގެ ކަންކަން ފަސޭހަ ކުރުމަށް އެ ޕްލޭނުގެ ބައެއް ބައިތަކަށް އެކަނި ބެލުމަށް ހައުސިން މިނިސްޓަރު ޑރ. މުހައްމަދު މުއިއްޒުއަށް ދެންނެވި ކަމަށް ޔާމީން ވިދާޅުވި އެވެ.
"ލޭންޑް ޔޫސް ޕްލޭން ހައްދަވާނީ އެ ރަށެއްގެ ރައްޔިތުން. މާލެއާ ހަމައަށް ފޮނުއްވަން ނުޖެހޭނެ. ފާސްކުރައްވާކަށް ނުޖެހޭނެ. އެ ލޭންޑް ޔޫސް ޕްލޭން ހަދައިގެން ބުރަ ވެސް އުފުލާނީ އަދީ އޭގެއިން ފައިދާ ވެސް ލިބޭނީ އެ ރަށެއްގެ ރައްޔިތުންނަށް. އެއީ ދެއްތޯ ރައްޔިތުން ބާރުވެރިކުރުމަކީ،" އެމަނިކުފާނުގެ ސަރުކާރެއްގައި ކަންކަން އިންތިޒާމު ކުރައްވާނެ ގޮތްތަކާ ގުޅޭގޮތުން އެމަނިކުފާނު މިރޭ ވިދާޅުވި އެވެ.
ދެކެން ބޭނުންވާ ތަރައްގީ ދެކެން ބޭނުންވާ ބާރު މިނުގައި އަންނާނީ އެގޮތަށް ކަންކަން ބަދަލުވުމުން ކަމަށް ޔާމީން ވިދާޅުވި އެވެ.
އެންމެ ފަހުން ލިބިފައިވާ މައުލޫމާތަށް ބަލާއިރު، ޕްލޭނިން މިނިސްޓްރީން މިހާތަނަށް ވަނީ 19 ރަށެއްގެ ލޭންޑް ޔޫސް ޕްލޭން ފާސްކޮށްދީފަ އެވެ.
