ސަރުކާރު ހިއްސާވާ ކުންފުނިތަކުގެ ބެލެނިވެރި ފަރާތް ކަމުގައިވާ ޕްރައިވެޓައިޒޭޝަން އެންޑް ކޯޕަރަޓައިޒޭޝަން ބޯޑު (ޕީސީބީ)ގެ ނައިބު ރައީސްގެ މަގާމަށް ހައްޔަންކުރި ފަރާތާމެދު ޝަކުވާއެއް އޮތް ނަމަ ހުށަހަޅަން ރައްޔިތުންގެ މަޖިލީހުން ހުޅުވާލައިފި އެވެ.
މި މަހުގެ ނުވަ ވަނަ ދުވަހު ޕީސީބީގެ ނައިބު ރައީސްގެ މަގާމަށް އައްޔަންކޮށްފައި ވަނީ ހއ. އިހަވަންދޫ އާޒާދީބަހާރު، މުހައްމަދު ފިރާޒު އެވެ.
ތައުލީމީ ދާއިރާގައި ގިނަ ދުވަސްތަކެއް ހޭދަކުރައްވާފައިވާ ފިރާޒުއަށް ރުހުން ހޯދުމުގެ މައްސަލަ ރައްޔިތުންގެ މަޖިލީހުގެ އެސްއޯއީ ކޮމިޓީގައި އޮތްއިރު، އޭނާއާމެދު ޝަކުވާއެއް އޮތް ނަމަ މި މަހުގެ 20 ވަނަ ދުވަހުގެ 11 ޖެހުމުގެ ކުރިން ހުށަހަޅަންޖެހެ އެވެ.
ޝަކުވާ ފޮނުވާނީ ނަމާއި އެޑްރެސް އަދި ގުޅޭނެ ނަންބަރާއެކު stateowned.enterprises_committee@majlis.gove.mv އީމެއިލް އަށެވެ.
ހަތް މެމްބަރުންގެ މައްޗަށް އެކުލެވޭ ޕީސީބީއަކީ 2013 ވަނަ އަހަރު ވުޖޫދަށް އައި ދައުލަތުގެ ވިޔަފާރި ތަންތަން ޕްރައިވަޓައިޒްކުރުމާއި ކޯޕަރަޓައިޒްކުރުމާއި އަދި މޮނިޓާކޮށް އިވެލުއޭޓްކުރުުމުގެ ގާނޫނުގެ ދަށުން އުފެއްދި ބޯޑެކެވެ.
އެ ބޯޑުގެ މެމްބަރުންނާއި ރައީސް އާއި ނައިބު ރައީސަށް މަޖިލީހުގެ ރުހުން ހޯދަންޖެހެ އެވެ.
ޕީސީބީއަކީ ސަރުކާރު ހިއްސާވާ ކުންފުނިތައް ހިންގުމުގައި މުހިންމު ދައުރެއް އަދާކުރާ ބޯޑެކެވެ. މި ބޯޑުގެ ޒިންމާތަކުގެ ތެރޭގައި ސަރުކާރު ކުންފުނިތަކުގެ ހިންގުން ހަރުދަނާކުރަން ކުންފުނިތަކުގެ ބޯޑުތަކުން މަސްއޫލިއްޔަތު އަދާކުރޭތޯ ބެލުމާއި، ކުންފުނިތަކުގެ ހިއްސާ ވިއްކުމާ ގުޅޭ ކަންކަން ކުރުން ހިމެނެ އެވެ.
