ދިވެހިރާއްޖެ އާއި ޗައިނާއާ ދެމެދު އޮތް ގާތް ގުޅުން ބިނާވެފައި ވަނީ ސިޔާދަތީ ހަމަހަމަކަމާއި، ދެ ގައުމުގެ މެދުގައި އޮތް އިހުތިރާމުގެ ބިންގަލުގެ މައްޗަށް ކަމަށް ރައީސް އިބްރާހިމް މުހައްމަދު ސޯލިހު ވިދާޅުވެއްޖެ އެވެ.
ޗައިނާ އާއި ރާއްޖެއާ ދެމެދު ސިޔާސީ ގުޅުން ގާއިމުކުރިތާ 50 އަހަރު ފުރުމުގެ މުނާސަބަތުގައި، ރައީސް ސޯލިހު ވަނީ އެ ގައުމުގެ ރައީސް ޝީ ޖިންޕިން އާއި. އެގައުމުގެ ބޮޑުވަޒީރު ލީ ކީކުޔާންއަށް ތަހުނިޔާ ވިދާޅުވެފަ އެވެ.
އެމަނިކުފާނު ޗައިނާގެ ރައީސަށް ފޮނުއްވި ސިޓީގައި ވިދާޅުވީ ދެ ގައުމުގެ މެދުގައި އޮތް އެކުވެރި ގާތްގުޅުމަކީ، ދިގު ތާރީހެއް އޮތް ގުޅުމެއް ކަމަށާއި އަދި ފާއިތުވި ވިހި އަހަރުގެ ތެރޭގައި، ރާއްޖޭގެ އިޖުތިމާއީ، ސަގާފީ އަދި އިގްތިސާދީ ތަރައްގީގައި ޗައިނާއިން ނުހަނު ބޮޑު ހިއްސާއެއް ވެފައިވާ ކަމަށެވެ.
އެގޮތުން، ދެ ގައުމުން މިއަހަރުގެ ކުރީކޮޅު ސޮއިކުރި ފަސް އެއްބަސްވުމަށް އަލިއަޅުއްވާލައއްވައި އެމަނިކުފާނު ވަނީ އޭގެ ސަބަބުން ދެގައުމުގެ ގުޅުން މުސްތަގުބަލުގައި އިތުރަށް ބަދަހިވެގެން ދިޔުމަށް މަގުފަހިވެގެންދާނޭ ކަމަށް ޔަގީންކުރައްވާ ކަމަށް ވެސް ވިދާޅުވެފަ އެވެ.
"ދިވެހިރާއްޖެއާ ޗައިނާގެ ގުޅުން ބިނާވެފައި ވަނީ، ތާރީހީ ގުޅުންތަކާއި، ސިޔާދަތީ ހަމަހަމަކަމާއި، ދެގައުމުގެ މެދުގައި އޮތް އިހުތިރާމުގެ ބިންގަލުގެ މައްޗަށް ކަމަށެވެ. އަދި، ދިވެހިރާއްޖެއާ ޗައިނާގެ މިގުޅުން ކުރިއަރައި ދެމިގެންދާނޭ ކަމަށްވެސް ޔަގީން ކުރައްވަން،" އެމަނިކުފާނުގެ ސިޓީފުޅުގައި ވިދާޅުވި ކަމަށް ރައީސް އޮފީހުން ބުނެ އެވެ.
އިޖުތިމާއީ ތަރައްގީ އާއި އިގްތިސާދީ ތަރައްގީގެ އާ އުސްމިންތަކަށް ރާއްޖެ ވާސިލުވުމުގައި، ޗައިނާއިން ދެމުން އަންނަ އެއްބާރުލުމާއި ވެދޭ އެހީއާ އެކު، ޗައިނާއަކީ ރާއްޖެއަށް ވަރަށް މުހިންމު ބައިވެރިއެއް ކަމަށް ބޮޑުވަޒީރަށް ވަކިން ފޮނުއްވި ސިޓީއެއްގައި ރައީސް ސޯލިހު ވިދާޅުވި ކަމަށް އެމަނިކުފާނުގެ އޮފީހުން ބުނެ އެވެ.
ރާއްޖެ-ޗައިނާ ޑިޕްލޮމެޓިކް ގުޅުމަށް 50 އަހަރު ފުރިފައިވާއިރު ޗައިނާ ސަރުކާރުގެ އެހީގެ ދަށުން ރާއްޖޭގައި ބިޔަ ޕްރޮޖެކްޓުތައް ހިންގާފައި އެބަހުއްޓެވެ.
ކުރީގެ ރައީސް އަބްދުﷲ ޔާމީންގެ ސަރުކާރުގައި ޗައިނާ އާއި ރާއްޖެއާ ދެމެދު އޮތް ގުޅުން ވަރަށް ބޮޑަށް ބަދަހިވެގެންދިޔަ އެވެ. އެގޮތުން، ޗައިނާގެ ރައީސް ޝީ ޖިންޕިން ރާއްޖެއަށް ރަސްމީ ދަތުރުފުޅެއް ވެސް ކުރެއްވި އެވެ. އަދި، ރައީސް ޔާމީން ވެސް ޗައިނާއަށް ރަސްމީ ދަތުރުފުޅެއް ކުރެއްވި އެވެ.
ރާއްޖޭގެ ހާރިޖީ ސިޔާތުގައި އެންމެ ނުފޫޒު ގަދަ ގައުމަކަށް އޭރު ވެފައި އޮތީ ޗައިނާ އެވެ. އަވަށްޓެރި އިންޑިއާ އާ ދެމެދު އޮތް ގުޅުން ހީނަރުވެގެންދިޔަ އެވެ. ނަމަވެސް، މި ސަރުކާރު އައިސް އަލުން އަނބުރާ އިންޑިއާ އާއެކު އޮތް ގުޅުން ވަނީ އިޔާދަކޮށްފަ އެވެ.
