މޫސުން ގޯސްވުމުގެ ސަބަބުން، އިދިކޮޅު ރިޔާސީ ކެންޑިޑޭޓު އަބްދުﷲ ޔާމީން އަބްދުލްގައްޔޫމް ތިލަދުންމައްޗަށް ކުރައްވަން ނިންމެވި ދަތުރު ފަސްކުރައްވައިފި އެވެ.
ހއ. އަތޮޅުގެ ފަސް ރަށަކަށް ޔާމީން ކުރައްވާ ދަތުރު ފަށަން ހަމަޖެހިފައި އޮތީ މިއަދު އެވެ. ނަމަވެސް ޕީޕީއެމް އިން މިއަދު ބުނީ މޫސުން ގޯސްވުމުގެ ސަބަބުން، އެމަނިކުފާނު ފުރާވަޑައިގަންނަވާނީ އަންނަ ހޮނިހިރު ދުވަހު ކަމަށެވެ.
މި ދަތުރުފުޅުގައި އެމަނިކުފާނު އެ އަތޮޅުގެ ކެލާ، ބާރަށް، އިހަވަންދޫ، ދިއްދޫ އަދި ތުރާކުނަށް ވަޑައިގަންނަވާނެ އެވެ.
މި ދަތުރުގެ ތެރެއިން ޕީޕީއެމްގެ މެނިފެސްޓޯއަށް މައުލޫމާތު އެއްކުރުމާއި، ރައްޔިތުން ބޭނުންވާ ކަންކަން ދެނެގަތުމުގެ މަސައްކަތް ކުރިއަށް ދާނެ ކަމަށް ޕީޕީއެމުން ބުނެ އެވެ.
ޕީޕީއެމްގެ ރިޔާސީ ކެންޑިޑޭޓުގެ ހައިސިއްޔަތުން ޔާމީން ވަނީ މިދިޔަ މަހު ދ. ކުޑަހުވަދޫއަށް ވެސް ވަޑައިގެންފަ އެވެ.
ޔާމީން ލީޑު ކުރައްވާ އިދިކޮޅު ކޯލިޝަނުން އެންމެ ބޮޑަށް ވަކާލާތު ކުރަމުން ދަނީ މިހާރު އޮތް ސަރުކާރުން އިންޑިއާއާއެކު ބާއްވާ ގުޅުންތަކާއި ޚާރިޖީ ސިޔާސަތު ގައުމުގެ މިނިވަންކަމަށް އަސަރުކުރާ ކަމަށެވެ.
"އިންޑިއާ މިލިޓަރީ އައުޓް" ގެ ނަމުގައި ކެމްޕޭން ހަރަކާތެއް ވެސް ހިންގި އެވެ. ނަމަވެސް އެ ހަރަކާތް ހުއްޓުވަން ވެގެން ސަރުކާރުން ދަތި ކުރަމުން ދާތީ މި ވަގުތަށް މަޑުޖައްސާލާފައިވާ ކަމަށް ޔާމީން މި ފަހުން ޓީވީ ޕްރޮގްރާމެއްގައި ވިދާޅުވެފައިވެ އެވެ.
ޔާމީންގެ އިތުރުން ރިޔާސީ އިންތިހާބަށް ދެން ޝައުގުވެރިކަން ފާޅުކުރައްވާފައިވަނީ މިހާރުގެ ރައީސް އިބްރާހީމް މުހައްމަދު ސޯލިހާއި، ރައްޔިތުންގެ މަޖިލީހުގެ ރައީސް މުހައްމަދު ނަޝީދާއި، އެމްއެންޕީގެ ރައީސް މުހައްމަދު ނާޒިމާއި، އެމްޑީއޭގެ ލީޑަރު އަހުމަދު ސިޔާމް މުހައްމަދާއި، ކުރީގެ ހޯމް މިިނިސްޓަރު އުމަރު ނަސީރެވެ.
