މި މަހު ފާހަގަ ކުރަމުންދާ ސައިބާ ސޭފްޓީ އެވެއާނެސް މަހުގެ ޕްރޮގްރާމްތަކުގެ ދަށުން ޓެކްނޮލަޖީ މިނިސްޓްރީ އާއި އެންސީއައިޓީ ގުޅިގެން އިންޓަނެޓުގައި ކުޑަކުދިން ރައްކާތެރި ކުރުމުގެ ސެޝަންތަކެއް އަންނަ ހަފުތާގެ ތެރޭގައި ބޭއްވުމަށް ހަމަޖެހިއްޖެ އެވެ.
މި މަހުގެ 17، 18 އަދި 19 ވަނަ ދުވަހު ކުރިއަށް ގެންދިއުމަށް ހަމަޖެހިފައިވާ މި ސެޝަންތަކުގައި ދުނިޔޭގެ ޓެކްނޮލަޖީގެ ދާއިރާއިން އެންމެ އުހުގައި ގުނާލެވޭ އެއް ކުންފުނި ކަމަށްވާ މައިކްރޮސޮފްޓުގެ މާހިރުން ބައިވެރިވާނެ އެވެ.
އަދި ރާއްޖޭގެ އެކި ކަންކޮޅުތަކުން ގިނަ ބަޔަކަށް ބައިވެރިވުމުގެ ފުުރުސަތު ދިނުމުގެ ގޮތުން މި ސެޝަންތައް ބޭއްވުމަށް ހަމަޖެހިފައިވަނީ އޮންލައިންކޮށް ކަމަށްވެސް ޓެކްނޮލަޖީ މިނިސްޓްރީއިން ބުނެފައިވެ އެވެ.
ސެޝަންތަކުގެ ތަފްސީލު ދެމުން އެ މިނިސްޓްރީއިން ބުނެފައިވަނީ 17 ވަނަ ދުވަހު "އޮންލައިން އިންޓަރެކްޝަންސް އެންޑް ރެޑް ފްލޭގްސް" ގެ ނަމުގައި ބޭއްވޭ ފުރަތަމަ ސެޝަންގައި މައިގަނޑު ގޮތެއްގައި އަލިއަޅުވާލެވޭނީ އޮންލައިންކޮށް އެކިއެކި ޕްލެޓްފޯމްތަކުގައި މެސެޖުކޮށް މުއާސަލާތު ކުރުމުގައި ދިމާވެދާނެ ނުރައްކާތަކާއި، ސަމާލު ވާންޖެހޭ ކަންތައްތަކާއި، ނުދަންނަ މީހުނާ އޮންލައިންކޮށް މުއާމަލާތް ކުރުމުގައި ގެންގުޅެންޖެހޭ ރައްކާތެރިކަމުގެ މިންގަނޑުތަކަށް ކަމަށެވެ.
"ބީން އެވެއާ އޮފް ވަޓް ޔޫ ޝެއާ އޮންލައިން" ގެ ނަމުގައި 18 ވަނަ ދުވަހު ބޭއްވޭ ދެވަނަ ސެޝަންގައި ކުދިންގެ ޑިޖިޓަލް ފުޓްޕްރިންޓްތަކާ ބެހޭ ގޮތުންނާއި، އެކުދިންނާ ބެހޭ ގޮތުން އެހެން މީހުންނަށް ހޯދައި ފެންނާނެ މައުލޫމާތާއި، އެއިން ކޮށްފާނެ ނޭދެވޭ އަސަރުތައް ކިޔައިދެވިގެންދާނެ ކަމަށްވެސް ޓެކްނޮލަޖީ މިނިސްޓްރީއިން ބުނެފައިވެ އެވެ.
އެންމެ ފަހު ސެޝަންގެ ގޮތުގައި 19 ވަނަ ދުވަހު "ޕްރޮޓެކްޓިން ކިޑްސް އޮންލައިން" ގެ ނަމުގައި ބޭއްވޭ ސެޝަންއަކީ އޮންލައިން ޕްލެޓްފޯމް ތަކުގައި ކުޑަ ކުދިންގެ ރައްކާތެރިކަމަށް ބޭނުންވާ ހުނަރާއި ވަސީލަތްތައް ދެނެގަތުމަށް މުދައްރިސުންނާއި ބެލެނިވެރިންނަށް އަމާޒުކޮށްގެން ބޭއްވޭ ހާއްސަ ސެޝަން އެކެވެ.
