އިސްލާމް ދީނާ ދެކޮޅު އަމަލު ހިންގާ މީހުންނަށް ގާނޫނުލްއުގޫބާތުގައި ބަޔާންކޮށްފައިވާ ކުށުގެ އަދަބުގެ ދަރަޖަ ބޮޑު ކުރުމަށް މާމިގިލި ދާއިރާގެ މެންބަރު ގާސިމް އިބްރާހިމް ރައްޔިތުންގެ މަޖިލީހަށް ހުށަހެޅުއްވި ބިލު ބަލައިނުގަނެ ބޭރުކޮށްލައިފި އެވެ.
މި ބިލު ބަލައިގަންނަން ފެންނަ ކަމަށް ވޯޓު ދެއްވީ އެންމެ ނުވަ މެންބަރުންނެވެ. ނުފެންނަ ކަމަށް 24 މެންބަރުން ވޯޓު ދެއްވި އެވެ.
އިސްލާމް ދީނާ ދެކޮޅު އަމަލު ހިންގުން ގާނޫނުލްއުގޫބާތުގައި ބަޔާންކޮށްފައިވަނީ ޖުނަހުގެ އެއްވަނަ ދަރަޖައިގެ ކުށެއްގެ ގޮތުގަ އެވެ.
ގާސިމް އިސްލާހު ހުށަހެޅުއްވީ މި ކުށް ޖިނާޔަތުގެ ދެ ވަނަ ދަރަޖައިގެ ކުށެއް ކަމުގައި ކަނޑައެޅުމަށެވެ. މިއީ 10 އަހަރުގެ ޖަލު ހުކުމެއް އަތުވެދާނެ ފަދަ ކުށެކެވެ.
މި ބިލުގެ އިތުރުން ލިވާތު ކުރުމާއި ސިހާގުގެ ކުށަކީ ޖިނާއީ ބޮޑެތި ކުށްތަކުގެ ތެރޭގައި ހިމެނޭ ދެ ކުށް ކަމުގައި ކަނޑައެޅުމަށް ޖިނާއީ އިޖުރާއަތުގެ ގާނޫނަށް އިސްލާހު ގެނައުމަށް ގާސިމް ހުށަހެޅުއްވި ބިލު ވެސް ވަނީ ބޭރުކޮށްލާފަ އެވެ.
މި ބިލު ބޭރުކޮށްލާފައިވަނީ 25 މެންބަރުންގެ ވޯޓުންނެވެ. ފެންނަ ކަމަށް 13 މެންބަރުން ވޯޓު ދެއްވި އެވެ.
މިހާރު ގާނޫނު އޮތް ގޮތުން, ޖިނާއީ ބޮޑެތި ކުށްތައް ގޮތުގައި ކަނޑައަޅާފައިވަނީ 12 ކުށެކެވެ.
މީގެ އިތުރުން މަޖިލީހުގެ މެންބަރުން އަދަދު 87 ގައި ހިފެހެއްޓުމަށް ގާސިމް ހުށަހެޅުއްވި ބިލު ވެސް މަޖިލީހުން މިއަދު ވަނީ ބޭރުކޮށްލާފަ އެވެ.
