ކުޅުދުއްފުށި ސިޓީގައި ޝަހީދު ހުސައިން އާދަމްގެ ހަދާނީ ބިނާއެއް އެޅުމަށް ކުޅުދުއްފުށީ ސިޓީ ކައުންސިލުން ނިންމައި އެ ބިނާ ފަރުމާ ކުރާނެ ބަޔަކު ހޯދުމަށް އިއުލާން ކޮށްފި އެވެ.
ކުޅުދުއްފުށީ ސިޓީ ކައުންސިލުން އިއްޔެ ކުރި އިއުލާނެއްގައި ބުނެފައިވަނީ ޝަހީދު ހުސައިން އާދަމްގެ ޖިހާދު ރަމްޒު ކޮށްދޭ އެ ބިނާ ފަރުމާކޮށް އެ ފަރުމާ ހުށަހެޅުމުގެ ފުރުސަތު މި މަހުގެ 25 ވަނަ ދުވަހުގެ 14:00 އާ ހަމައަށް ހުޅުވާލާ ކަމަށެވެ.
ކުޅުދުއްފުށީ ކައުންސިލްގެ އިއުލާނުގައި ބުނެފައިވާ ގޮތުން މި ބިނާ ވާންވާނީ ޝަހީދު ހުސައިން އާދަމްގެ ޖިހާދު ރަމްޒުކޮށްދޭ ފަރުމާއަކަށެވެ. އަދި ހުށަހެޅޭ ފަރުމާ ހުންނަންވާނީ ބާޒާރުން ފަސޭހައިން ލިބޭ ދިގު މުއްދަތައް ދެމިހުންނަ މެޓީރިއަލްއަކުން ހެދޭ ގޮތަށް ކަމަށާއި ފަރުމާ ވާންވާނީ ބަލާލަން ރީތި، އިސްލާމްދީނާއި އާންމު އިޖްތިމާއީ މިންގަނޑުތަކަށް ފެތޭ ފަރުމާއަކަށް ކަމަށް ވެސް ބުނެފައިވެ އެވެ.
ކުޅުދުއްފުށީ ކައުންސިލުން އިތުރަށް ބުނެފައިވަނީ އެ ސިޓީއަށް ނިސްބަތްވާ ނަސްރުގެ ދުވަހުގެ ބަތަލު ޝަހީދު ހުސައިން އާދަމްގެ ހަދާނީ ބިނާ ބެހެއްޓިގެން ދާނީ އެ ސިޓީގެ އާންމު ސަރަހައްދެއްގައި ކަމަށެވެ.
މީގެ އިތުރުން ހުށަހެޅޭ ފަރުމާތަކުގެ ތެރެއިން ހޮވޭ އެންމެ ރަނގަޅު ފަރުމާއަކަށް 5،000 ރުފިޔާގެ ފައިސާގެ އިނާމެއް ލިބިގެންދާނެ ކަމަށް ވެސް ސިޓީ ކައުންސިލްގެ އިއުލާނުގައި ބުނެފައިވެ އެވެ.
