އއ. މާޅޮހު ދެކުނުން ބަންޑުން ޖާހަލައިފައި އޮއްވާ ފެނުނު ލޯންޗުން ގެއްލުނު މީހާ ހޯދުމަށް 35 އަކަ ނޯޓިކަލް މޭލުގެ ސަރަހައްދެއް ބަލާފައިވާ ކަމަށް އެމްއެންޑީއެފް އިން ބުނެފި އެވެ.
އެމްއެންޑީއެފް އިން އިތުރަށް ބުނެފައިވަނީ ގެއްލިގެން ހޯދަމުންދަނީ އުމުރުން 28 އަހަރުގެ ސ.ހިތަދޫ، މިންހާ, މުޙައްމަދު މިންހާޖު ކަމަށެވެ. އަދި, އެންމެ ފަހުން އޭނާ ލައިގެން ހުރީ އަޅި ކުލައިގެ އަތް ދިގު ޓީޝާޓަކާއި ނޫކުލައިގެ ޖިންސެއް ކަމަށް ބުނެފައިވެ އެވެ.
މިންހާޖު ހޯދުމަށް އެމްއެންޑީއެފްއިން ކުރިއަށް ގެންދާ އޮޕަރޭޝަނުގައި އެމްއެންޑީއެފް ކޯސްޓްގާޑް ޝިޕް ޝަހީދު އަލީ އާއި ފާސްޓް އިންޓަސެޕްޓް ކުރާފްޓް "ހަކުރާ" އަދި އެމްއެންޑީއެފްގެ ޑޯނިއާ ފްލައިޓް ދަނީ އެ ސަރަހައްދުގައި ހަރަކާތްތެރިވަމުން ކަމަށް ވެސް ވަނީ މައުލޫމާތު ދީފަ އެވެ.
މިންހާޖު އާއި ބެހޭ އެއްވެސް މައުލޫމާތެއް ލިބިއްޖެ ނަމަ ހިލޭ ގުޅޭނަމްބަރު 191 ނުވަތަ 3395981 ،3398898 ނަންބަރަށް އަދި ވައިބަރ އިން ނަމަ 9931082 އަދި ފެކްސް އިން ނަމަ 3391665 ނަމްބަރަށް ފެކްސްކުރުމަށް އެމްއެންޑީއެފްއިން ވަނީ އެދިފަ އެވެ.
މިންހާޖު ގެއްލުނީ މި މަހުގެ ފަސް ވަނަ ދުވަހު މާލެއިން ފުރައިގެން އއ. އުކުޅަހަށް ދަތުރުކުރަނިކޮށް ލޯންޗު ބަންޑުން ޖަހާލައިގެން ކަމަށް ބުނެ އެވެ.
އޭނާއާ އެކު ދެން އެ ލޯންޗުން ދަތުރުކުރި ކ. ގާފަރަށް ނިސްބަތްވާ މީހާ ވަނީ ލޯންޗު ފެނުނު މާޅޮހާއި ކައިރީގައި އޮންނަ ފެރިދޫ ފުއްޓަރު ފަރާތުން ފެނިފަ އެވެ. އާއިލާގެ އެދުމުގެ މަތިން އޭނާ މާލެ ގެނެސް އައިޖީއެމްއެޗުގައި މިހާރު އަންނަނީ ފަރުވާދެމުންނެވެ.
