ހދ. ނޭކުރެންދޫގައި ސަރުކާރުން އެޅުމަށް ހަމަޖެހިފައިވާ ޖަލުގެ ފުރަތަމަ ފިޔަވަހީގެ މަސައްކަތް ކުރުމަށް އެއްބަސްވުމުގައި ސޮއިކޮށްފި އެވެ.
ހޯމް މިނިސްޓްރީއިން މި މަސައްކަތް ހަވާލުކޮށްފައިވަނީ ޔުނިކް ޗޮއިސް ޕްރައިވެޓު ލިމިޓެޑާ އެވެ.
މިއަދު ހޯމް މިނިސްޓްރީގައި ބޭއްވި ހަފުލާއެއްގައި މި އެއްބަސްވުމުގައި އެ މިނިސްޓްރީގެ ފަރާތުން ސޮއިކުރެއްވީ ޕާމަނަންޓު ސެކްރެޓަރީ އަބްދުއްރަހްމާން ސަލާހް އެވެ. ޔުނިކް ޗޮއިސްގެ ފަރާތުން އެއްބަސްވުމުގައި ސޮއިކުރެއްވީ އެ ކުންފުނީގެ މެނޭޖިން ޑިރެކްޓަރު ރިޔާޒް އަލީ އެވެ.
ރާއްޖޭގައި މިވަގުތު ގޭންގުތަކާއި ޑްރަގް ނެޓްވޯކް ތަކުގައި ޖެހިފައިވާ ޒުވާނުންނަށް ވަރަށް ބޮޑަށް އަޅާލުންތެރިކަން ބޭނުންވާ ކަމަށް މި ހަފުލާގައި ވާހަކަ ދައްކަވަމުން ހޯމް މިނިސްޓަރު އިމްރާން އަބްދުﷲ ވިދާޅުވި އެވެ.
"އެކަމަށް އޮތް އެންމެ ބޮޑު ހައްލެއް ކަމަށް އަޅުގަނޑު ގަބޫލުކުރަނީ.. މިއަދު ދުނިޔޭގެ ގައުމުތަކުގައި ކާމިޔާބުކަމާއި އެކު ތަންފީޒުކުރަމުން ގެންދާ އިންޑަސްޓްރިއަލް ނުވަތަ އޯޕަން ޕްރިޒަން އެއް ރާއްޖޭގައި ގާއިމުވެގެން ދިއުން" މިނިސްޓަރު ވިދާޅުވި އެވެ.
އަދި، ނޭކުރަންދޫގައި އެޅޭ ޖަލަކީ އިންޑަސްޓްރިއަލް ޕްރިޒަން އެއް ކަމަށާއި އެ ޖަލު ހިންގޭނީ އޯޕަން ޕްރިޒަން ސިސްޓަމްގެ ދަށުން ކަމަށްވެސް ވިދާޅުވި އެވެ.
މީގެ ކުރިން މި ދައުރުގެ ތެރޭގައި ނިމޭނެ ކަމަށް ލަފާކުރެވުނު ނޭކުރެންދޫ ޖަލުގެ މަސައްކަތް ނުފެށި ގިނަ ދުވަސްތަކެއް ވެގެން ދިއުމަށްފަހު ރައްޔިތުންގެ މަޖިލީހުގެ މަކުނުދޫ ދާއިރާގެ މެމްބަރު މުހައްމަދު ރާއީ ކުރެއްވި ސުވާލަކަށް ޖަވާބު ދެއްވަމުން ފޮނުއްވި ސިޓީ އެއްގައި މިނިސްޓަރު އިމްރާން ވަނީ މިހާރު ހަމަޖެހިފައިވާ ބަޖެޓާއި އެކު މި ދައުރުގެ ތެރޭގައި މި ޖަލުގެ މަސައްކަތް އެކީ ނުނިންމޭނެ ކަމަށް ވިދާޅުވެފަ އެވެ.
