ކީރިތި ރަސޫލާގެ ސީރަތުން ލިބިގަންނަންވީ އެންމެ އަގުހުރި ފިލާވަޅަކީ، ތަފާތު ވިސްނުންތަކާއި ތަފާތު ހިޔާލުތަކުގެ މީހުނާ އެކުގައި، އެއްބަނޑުއެއްބަފާ ގުޅުމެއްގެ ތެރޭގައި ދިރިއުޅުން ކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހް ވިދާޅުވެއްޖެ އެވެ.
މިއަދު ފާހަގަކުރާ ކީރިތި ރަސޫލާގެ އީދު މީލާދުގެ މުނާސަބަތުގައި ފޮނުއްވި ހިތޯބުގައި ރައީސް ވިދާޅުވީ މައުލިދުއް ނަބަވީގެ ވަސްމީރު ޒިކުރާ އާކުރަނީ، އެކަލޭގެފާނުގެ ނަބަވީ ސީރަތުން ލިބިދޭ އިބުރަތްތެރި ފިލާވަޅުތަކުން، ދެދުނިޔެ ބާއްޖަވެރި ކުރުމުގެ މަތިވެރި މަގުސަދުގައި ކަމަށެވެ.
ތަފާތު ހިޔާލުތަކުގެ މީހުނާއެކު އެއްބަނޑުއެއްބަފާ ގުޅުމެއްގެ ތެރެއިން ދިރިއުޅެން ޖެހޭކަން ފާހަގަކުރައްވަމުން ރައީސް ވިދާޅުވި އިސްލާމީ އުންމަތް އުފެދި ބިނާވެގެން އައީ، އަދި އޭރު ދުނިޔޭގައި އޮތް ބާރުތަކާއި ހަޟާރަތްތަކުގެ މައްޗަށް އިސްލާމީ އުންމަތް ކާމިޔާބު ހޯދީ، އެ ވަރުގަދަ ގުޅުމުގެ ސަބަބުން ކަމަށެވެ.
ރައީސްގެ ހިތޯބުގައި ވިދާޅުވީ އެކަލޭގެފާނުގެ ނަބަވީ ރިސާލަތުގެ މައިގަނޑު ފަލްސަފާއަކީ، ހުކްމަތްތެރިކަމާއި މަޑުމައިތިރިކަމާއެކު މީސްތަކުންނާ ގުޅުން ބަދަހިކުރައްވައިގެން އެބައިމީހުންގެ ހިތްތައް ފަތަހަ ކުރެއްވުން ކަމަށެވެ. އަދި ދެކޮޅުވެރިންނާއި އަދާވާތްތެރިންނާ ވެސް އެކަލޭގެފާނު މުއާމަލާތުކުރެއްވީ، އޯގާތެރިކަމާއެކު ރިވެތި ބަސްތަކުން ކަމަށެވެ.
"ބަދަލު ހިއްޕެވުމުގެ މައްޗަށް އިސް ކުރެއްވީ އަފޫކުރެއްވުން. ރުޅިވެރިކަމުގެ މައްޗަށް އިސްކުރެއްވީ އެކުވެރިކަމާއި ސުލްހަވެރިކަން. ގުޅުން ކެނޑުއްވުމުގެ ބަދަލުގައި ކޮންމެ ބަޔަކާ އެކުގައިވެސް ގުޅުން ބަދަހިކުރެއްވުމަށް އިސްކަން ދެއްވި" އޭގެ ސަބަބުން، ދުނިޔޭގެ ތާރީހު ބަދަލުކޮށްލި ހެޔޮލަފާ އުންމަތެއް އުފަންވެގެން ދިޔަކަން ފާހަގަކުރައްވާ ރައީސް ވިދާޅުވި އެވެ.
އަޅުގަނޑުމެންނަކީ ވެސް، އެ މަތިވެރި އުންމަތުގެ ފަރުދުން ކަމަށްވާއިރު، އެ މަތިވެރި ސިފަތަކުން ޒީނަތްތެރިވުމަށް މަސައްކަތްކުރުމަކީ، އެ މާތް ޒިކުރާ އާކުރުމުގެ އެންމެ މުހިންމު ބޭނުން
ރައީސް ވިދާޅުވީ ދިވެހިންގެ ތެރެއަށް އިސްލާހީ އެތައް ބަދަލުތަކެއް މިއަދު ބޭނުންވާ ކަމަށެވެ. އެމަނިކުފާނު ވިދާޅުވީ އަދަބު އަހުލާހުގެ ރޮނގުން އުޅުމަށް އިންގިލާބީ ބަދަލުތަކެއް ގެންނަންޖެހޭ ކަމަށާއި އިޖްތިމާއީ ހަމަތަކާއި އުސޫލުތަކަށް އިހުތިރާމުކުރުމުގެ އާދަ އަށަގަންނުވަން ޖެހޭ ކަމަށެވެ. އަދި އަނެކުންނަށް އިހުތިރާމު ކުރުމާއި އޯގާތެރިވެ އެހީތެރިވުމުގެ މަތިވެރި ސިފަ ހަރުލައްވަންޖެހޭ ކަމަށެވެ. ރައީސް ވިދާޅުވީ އެއިން ކޮންމެ ކަމަކަށް ހުރި އެންމެ މަތިވެރި ނަމޫނާއަކީ ނަބަވީ ސީރަތް ކަމަށެވެ.
ހިތޯބުގައި ރައީސް އިތުރަށް ވިދާޅުވީ އަހަރަކު އެއްފަހަރު، މައުލިދުއް ނަބަވީ ފާހަގަކުރާ އިރު، ދިވެހިންގެ ދިރިއުޅުމުން ހެޔޮ ބަދަލުތަކެއް ފެންނަންޖެހޭ ކަމަށެވެ. މުޖްތަމައުގައި ހަމަޖެހުމާއި އުފާވެރިކަން ގާއިމުވެ އޮންނާނީ އެފަދަ ބަދަލުތަކެއް ގެނެވިގެންކަން ފާހަގަކުރައްވައި ރައީސް ވިދާޅުވީ ހަސަދަވެރިކަމާއި ދެކޮޅުވެރިކަން ދޫކޮށް، ހިތްހެޔޮކަމާއި ހިތްތިރިކަމާއެކު އަނެކުންނާ މުއާމަލާތު ކުރުމަކީ، އިޖުތިމާއީ ހަމަޖެހުން ގާއިމުވުމުގެ އިތުރުން، ނަފްސާނީ ދުޅަހެޔޮކަމަށް ވެސް ނުހަނު ބޭނުންތެރި ކަމެއް ކަމަށެވެ.
ހަމައެއާއެކު ކޮންމެ މީހަކާ ވެސް ހިނިތުންވުމާއި އުފާވެރި މޫނަކާއެކު ބައްދަލުކުރުމަށް އަޒުމު ކަނޑައަޅަން ޖެހޭ ކަމުގައި ވެސް ރައީސް ވިދާޅުވި އެވެ.
