ޕެރިސް (އޮކްޓޫބަރު 8) - މިދިޔަ އަހަރެއްހާ ދުވަހަށް ބަލާއިރު، ފުޓްބޯޅަ ކުޅުންތެރިންގެ ތެރެއިން އެންމެ ބޮޑު އާމްދަނީއެއް ލިބިފައިވާ ކަމަށް ފޯބްސްގެ ލިސްޓުގެ އެންމެ ކުރިން ޕީއެސްޖީގެ ތަރި ކީލިއަން އެމްބާޕޭ ޖާގަ ހޯދައިފި އެވެ.
މިއީ ފާއިތުވި ނުވަ އަހަރު ތެރޭ ކްރިސްޓިއާނޯ ރޮނާލްޑޯ އާއި ލިއޮނަލް މެސީ ނޫން ކުޅުންތެރިއަކު މި ލިސްޓުގެ ކުރިއަށް އެރި ފުރަތަމަ ފަހަރެވެ.
މިދިޔަ އަހަރެއްހާ ދުވަސްތެރޭ އެމްބާޕޭ، 23، އަށް ލިބުނު އާމްދަނީގެ ޖުމްލަ އަދަދު 128 މިލިއަން ޑޮލަރަށް އަރަ އެވެ. މި ލިސްޓުގެ ކުރީގައި ގިނަ އަހަރުތަކެއް ވަންދެން އޮތް ރޮނާލްޑޯ އާއި މެސީ އަށް 100 މިލިއަން ޑޮލަރުގެ އާމްދަނީއެއް ލިބިފައިވަނީ އެ ކުޅުންތެރިން އުމުރުން 30 އަހަރަށް ވުރެން އިތުރުވީ ފަހުންނެވެ.
އެންމެ ބޮޑު އާމްދަނީ ލިބުނު 10 ފުޓްބޯޅަ ކުޅުންތެރިންގެ ތެރޭގައި 30 އަހަރުން ދަށުގެ ކުޅުންތެރިންގެ ތެރެއިން ހިމެނެނީ އެމްބާޕޭގެ އިތުރުން އާލިން ބްރައުޓް ހާލަންޑް އެވެ. ހާލަންޑަށް 39 މިލިއަން ޑޮލަރުގެ އާމްދަނީއެއް ވަނީ ލިބިފަ އެވެ.
މިދިޔަ މެއި މަހު ޕީއެސްޖީއާ އެކު އާ ކޮންޓްރެކްޓެއްގައި ސޮއިކުރި އެމްބާޕޭ އަށް ކޮންޓްރެކްޓްގައި ސޮއިކޮށްގެން ލިބުނު ބޯނަހާއި މުސާރައިގެ ގޮތުގައި 110 މިލިއަން ޑޮލަރު ލިބެ އެވެ. ބާކީ 18 މިލިއަން ޑޮލަރަކީ ސްޕޮންސަރުންނާއި އިޝްތިހާރު ޑީލްތަކުގެ ތެރެއިން ލިބޭ އާމްދަނީ އެވެ. އެމްބާޕޭ އަށް އެންމެ ބޮޑު އާމްދަނީއެއް ހޯދައިދޭ ބްރޭންޑްތަކުގެ ތެރޭގައި ނައިކީ، ޑިއޯ، ހުބްލޮޓް އަދި އޯކްލޭ ހިމެނެ އެވެ.
ޕީއެސްޖީއާ އެކު ސޮއިކުރި ކޮންޓްރެކްޓުން ލިބުނު ފައިސާގެ އެހީގައި، އެމްބާޕޭ ވަނީ އޭނާގެ އަމިއްލަ ޕްރޮޑަކްޝަން ކުންފުންޏެއްގެ މަސައްކަތް ވެސް ފަށައިފަ އެވެ. އެ ކުންފުނީގެ ނަމަކީ ޒެބްރާ ވެލީ އެވެ.
ލިސްޓުގެ ދެ ވަނައިގައި އެމްބާޕޭ ފަހަތުން އޮތީ އޭނާއާ އެކު ޕީއެސްޖީ އަށް ކުޅޭ މެސީ، 35، އެވެ. މެސީ އަށް ވަނީ އާމްދަނީ ގޮތުގައި 120 މިލިއަން ޑޮލަރު ލިބިފަ އެވެ. ރޮނާލްޑޯ، 37، ތިން ވަނައިގައި އޮތީ 100 މިލިއަން ޑޮލަރުގެ އާމްދަނީއަކާ އެކު އެވެ.
ނޭމާ އަށް 87 މިލިއަން ޑޮލަރު ލިބުނުއިރު، ސަލާހަށް ވަނީ 53 މިލިއަން ޑޮލަރު ލިބިފަ އެވެ. ހާލަންޑަށް 39 މިލިއަން ޑޮލަރުގެ އާމްދަނީއެއް ލިބުނީ ޑޯޓްމަންޑްގެ ބޯނަހާއި ސިޓީ އަށް ސޮއިކުރިއިރު، ދިން ބޯނަސް ހިމަނައިގެންނެވެ. ރޮބަޓް ލެވަންޑޯސްކީ އަށް ވަނީ 35 މިލިއަން ޑޮލަރު ލިބިފަ އެވެ. އެޑެން ހަޒާޑް އަށް 31 މިލިއަން ޑޮލަރު ލިބިފައިވާއިރު، އަންދްރެެސް އިނިއެސްޓާ އަށް ވަނީ 30 މިލިއަން ޑޮލަރު ލިބިފަ އެވެ. އަދި ލިސްޓުގެ 10 ވަނައިގައި އޮތް ކެވިން ޑިބްރޭނާ އަށް ވަނީ 29 މިލިއަން ޑޮލަރު ލިބިފަ އެވެ.
ގަދަ 10 ގައި މި ފަހަރު ޕީއެސްޖީގެ މެސީ އާއި އެމްބާޕޭ އަދި ނޭމާ ހިމެނުނުއިރު، މިއީ އެއް ކްލަބެއްގެ ތިން ކުޅުންތެރިން ގަދަ ހަތަރެއްގައި ހިމެނުނު ފުރަތަމަ ފަހަރެވެ. ތިން ކުޅުންތެރިންގެ ޖުމްލަ އާމްދަނީ އަށް ބަލާއިރު، 335 މިލިއަން ޑޮލަރު އަރަ އެވެ.
