މާލެއިން ފުރައިގެން އއ. އުކުޅަހަށް ދަތުރުކުރި ލޯންޗެއް ބަނޑުން ޖަހާލައި، އެކަކު ގެއްލިގެން ހޯދާތާ 24 ގަޑިއިރަށްވުރެ ގިނަ އިރުވެއްޖެ އެއެވެ.
ފުލުހުން ބުނީ އިއްޔެ މެންދުރު ފަހު 1:00 ހާއިރު މާލެއިން ފުރައިގެން އުކުޅަހަށް ދަތުރުކުރި ލޯންޗެއްގެ ހަބަރެއް ނުވެގެން ފުލުހުންނަށް ރިޕޯޓްކޮށްފައިވާ ކަމަށާއި އެ ލޯންޗުން ދަތުރުކުރީ ދިވެހި ދެ ފިރިހެނުން ކަމަށެވެ. އޭގެ ތެރެެއިން އެކަކު އއ. ފެރިދޫ ފުއްޓަރާ ދިމާއިން މިއަދު ފެނިފައިވާ ކަމަށާއި ދެ ވަނަ މީހާ އަދި ނުފެންނަ ކަމަށް ވެސް ފުލުހުން ބުންޏެވެ.
ފެނުނު މީހާއަށް ފެރިދޫ ސިއްހީ މަރުކަޒުގައި މިހާރު އަންނަނީ ފަރުވާ ދެމުންނެވެ. އެހެން ނަމަވެސް އޭނާގެ ހާލަތާ ބެހޭ ތަފްސީލެއް އަދި ނުލިބެ އެވެ.
މާލެއިން ފުރައިގެން އުކުޅަހަށް ދަތުރުކުރި ލޯންޗެއްގެ ހަބަރެއް ނުވެގެން ރިޕޯޓްކޮށްފައިވާ ކަމަށް ފުލުހުން ބުނީ އއ. މާޅުސް ކައިރީ، ބަންޑުން ޖަހާލާފައި އޮތް ލޯންޗެއް ފެނިގެން އެމްއެންޑީއެފް ކޯސްޓްގާޑުން ރިޕޯޓްކުރި ފަހުންނެވެ.
ބަންޑުން ޖަހާލާފައި އޮތް ލޯންޗެއް ފެނިގެން އެމްއެންޑީއެފުން ރިޕޯޓްކުރި އިރު، ދެމީހުންނާ އެކު ލޯންޗެއް ގެއްލިގެން އުޅޭކަމުގެ މައުލޫމާތު އެމްއެންޑީއެފަށް އަދި ނުލިބޭ ކަމަށް، އެމްއެންޑީއެފުން މީޑިއާއަށް ދިން މައުލޫމާތުން އެނގެ އެވެ.
"..އއ.މާޅޮހުގެ ދެކުނުން ބަނޑުން ޖަހާލާފާއި އޮތް ލޯންޗެއް ވަނީ ފެނިފައެވެ. މި ލޯންޗު ފެނުނުއިރު މި ލޯންޗުގައި އެއްވެސް މީހަކު ނެތެވެ. އެހެންކަމުން، މި ލޯންޗާ ބެހޭ އެއްވެސް މަޢުލޫމާތެއް ލިބިފައިވާނަމަ ކޯސްޓްގާޑުގެ ހިލޭ ގުޅޭނަމްބަރު 191 ނުވަތަ 3395981 ،3398898 ނަންބަރަށް އަދި ވައިބަރ ކުރައްވާނަމަ 9931082 އަދި ފެކްސް ކުރައްވާނަމަ 3391665 ނަމްބަރަށް ފެކްސްކުރެއްވުން އެދެން،" އެމްއެންޑީއެފުން މިއަދު މެންދުރު ފަހު 2.40 އެހާކަށް ހާއިރު މީޑިއާއަށް ދިން މައުލޫމާތުގައި ބުންޏެވެ.
